ငွေကြေးချမ်းသာသူများ ပိုချမ်းသာပြီး ဆင်းရဲသူများ ပိုဆင်းရဲလာကြောင်း လွှတ်တော်ကော်မတီ အစီရင်ခံစာ၌ ဖော်ပြ

ပို့စ်တင်ချိန် - 2/26/2014 09:06:00 AM

ရန်ကုန်တိုင်းဒေသကြီး အင်းစိန်မြို့နယ်အတွင်း တစ်နေရာအား တွေ့ရစဉ် (ဓာတ်ပုံ-အောင်မျိုးသန့်)
၂၀၁၃-၂၀၁၄ ဘဏ္ဍာနှစ် ပထမခြောက်လအတွင်း အစိုးရ၏ တစ်နှစ်လုံး စီမံချက်များအပေါ် ၃၂ ရာခိုင်နှုန်းကျော်သာ အကောင်အထည် ဖော်နိုင်ခဲ့ပြီး လက်ရှိပကတိ အခြေအနေမှာ ငွေကြေးချမ်းသာသူများ ပို၍ချမ်းသာလာပြီး ဆင်းရဲသူများ ပို၍ဆင်းရဲလာကြောင်း ပြည်ထောင်စုလွှတ်တော်၊ စီမံကိန်းများနှင့် ဘဏ္ဍာရေးဖွံ့ဖြိုးတိုးတက်မှု ပူးပေါင်းကော်မတီ၏ အစီရင်ခံစာတွင် ဖော်ပြထားသည်။
ဖေဖော်ဝါရီ ၂၅ ရက်တွင် ကျင်းပသည့် ပြည်ထောင်စုလွှတ်တော် အစည်းအဝေးသို့ အမျိုးသားစီမံကိန်းနှင့် စီးပွားရေးဖွံ့ဖြိုးတိုးတက်မှု ၀န်ကြီးဌာနမှ ပေးပို့လာသော ၂၀၁၃-၂၀၁၄ ဘဏ္ဍာနှစ်၊ ပထမခြောက်လပတ် အမျိုးသားစီမံကိန်းဆောင်ရွက်မှု အစီရင်ခံစာအပေါ် ပြည်ထောင်စုလွှတ်တော်၊ စီမံကိန်းများနှင့် ဘဏ္ဍာရေး ဖွံ့ဖြိုးတိုးတက်မှု ပူးပေါင်းကော်မတီမှ လေ့လာသုံးသပ်ကာ အစီရင်ခံစာ တင်သွင်းခဲ့ခြင်းဖြစ်သည်။
အစီရင်ခံစာတွင် “စီးပွားရေး ပြုပြင်ပြောင်းလဲမှုတွင်လည်း နိုင်ငံတော်အစိုးရအနေဖြင့် လုပ်ငန်းရှင်ကြီးများ၊ အသေးစား၊ အလတ်စား လုပ်ငန်းရှင်များ၊ လုပ်ငန်းငယ်များနှင့် အခြားကာယညာဏ အလုပ်သမားများ၊ လယ်သမားများ၊ ပြည်သူများအတွက် အဆင်ပြေ ချောမွေ့စေရန် တတ်နိုင်သောအားဖြင့် ဖြေလျှော့မှုများ ဆောင်ရွက်ပေးခဲ့သော်လည်း လက်ရှိပကတိ အခြေအနေမှာ ငွေကြေးချမ်းသာသူများ ပို၍ချမ်းသာခြင်း၊ ဆင်းရဲသူများ ပို၍ဆင်းရဲခြင်း၊ ကွာဟမှု အမှန်တကယ် ဖြစ်ပေါ်လာမှုကို လက်တွေ့ကျကျ အမှန်အတိုင်း ပကတိရှိမှု မရှိမှု၊ ပွင့်လင်းမြင်သာအောင် ရပ်ကွက်၊ ကျေးရွာအဆင့်မှသည် နိုင်ငံတော်အဆင့်အထိ အဆင့်ဆင့် ပွင့်လင်းမြင်သာသော လုပ်ငန်းစဉ်များ ချမှတ်ဆောင်ရွက်ရန် မဖြစ်မနေ အကောင်အထည်ဖော် လုပ်ဆောင်ရန် လိုအပ်နေပြီဖြစ်သည်။ လုပ်ငန်းကို စောသေးသည် နောင်မှလုပ်မည်ဆိုသည့် သဘောဖြင့် မရတော့ပါ။ အချို့သာဓကအားဖြင့် အိုးမဲ့အိမ်မဲ့ပြည်သူများ များပြားလာခြင်း၊ လယ်သမားများ လယ်ယာလုပ်ငန်း၊ ကုန်ထုတ်လုပ်မှုစရိတ်နှင့် ၀င်ငွေရရှိမှုတို့ မမျှတခြင်းကြောင့် အရှုံးပေါ်၍ အချို့လယ်သမားများ အကြွေးသံသရာလည်ပြီး လယ်မဲ့ယာမဲ့ဘ၀ ရောက်ရှိနေခြင်း၊ နိုင်ငံခြားရင်းနှီးမြှုပ်နှံမှု ၀င်ရောက်လာမှုများ အားနည်းခြင်း၊ တရားမ၀င် ကုန်သွယ်မှုများ ရှိနေသေးခြင်းတို့သည် စီးပွားရေး ပြုပြင်ပြောင်းလဲမှု ယန္တရားအတွင်း ဖြစ်ပေါ်လာသော အကျိုးဆက်များဖြစ်ကြောင်း သုံးသပ်ပါသည်” ဟု ဖော်ပြထားသည်။
ထို့ပြင် နိုင်ငံတော်အနေဖြင့် ဗဟိုဦးစီးစနစ်ကို ဖြေလျှော့၍ ပြည်သူဗဟိုပြုစနစ်ဖြင့် အကောင်အထည်ဖော် ပြုပြင်ပြောင်းလဲသည်မှာ ကောင်းပါသည်။ အောက်ခြေမှစ၍ ဖွံ့ဖြိုးတိုးတက်ရေး အထောက်အကူပြု အဖွဲ့များဖွဲ့၍ အဆင့်ဆင့်ဆောင်ရွက်မှုများ လုပ်ဆောင်ရာတွင်မူ သဘောအရ အလွန်ကောင်းသည်။ သို့သော်ဝန်ကြီးဌာန အဆင့်ဆင့်၊ ဌာနဆိုင်ရာ အဆင့်ဆင့်၏ ကြိုးနီစနစ်၊ လုပ်ငန်းလုပ်ဆောင်မှု မပျောက်ပျက်မှု အခြေအနေနှင့် အောက်ခြေကစသည့် အခြေအနေကွာဟပြီး ပုံသဏ္ဌာန်မကျ ဖြစ်နေသည်ကို ဂရုစိုက်ရန် လိုအပ်မည်ဖြစ်ပါသည်ဟု အစီရင်ခံစာတွင် ဖော်ပြထားသည်။
Credit: EMG