တရုတ်ကျောင်းတက်နေသော “ ၀ ” ကလေးငယ်များ UWSA “ ၀ ” ယူနီ ဖောင်းဝတ်မှသာ အိမ်ပြန်ခွင့်ရ

ပို့စ်တင်ချိန် - 1/23/2014 06:30:00 AM

22.1.2014

မိုင်းဆတ်မြို့နယ် ဆီဟုတ်ကျေးရွာရှိ UWSA “ ၀ ” အဖွဲ့မှ ဖွင့်လှစ်ထားသော တရုတ်စာသင်ကျောင်းတွင် ကျောင်းတက်နေသော ၀မ်ဟုန်ဒေသမှ ကလေးငယ်များသည် “ ၀ ” ယူနီဖောင်းဝတ်၍ ဇန်န၀ါရီ (၂၀) ရက်နေ့ မနက်ပိုင်းတွင် အိမ်ပြန်ကြရကြောင်း ယင်းမြို့ခံတချို့ထံမှ သိရသည်။

“ ကလေးတွေက ၁၀ နှစ် ၁၁ နှစ် အရွယ်တွေပါ ၊ အရေအတွက်ကတော့ ၁၀၀ လောက်ရှိမယ်၊ တရုတ်ကျောင်း ပိတ်လို့ ရွာပြန်ကြတာ၊ UWSA “ ၀ ” အဖွဲ့က ၀တ်တဲ့ ၀တ်စုံတွေ ၀တ်ထားတာ တွေ့တယ် ” ဟု ဆီဟုတ်ရွာမှ ကိုအိုက်ချန် က ပြောသည်။

အဆိုပါ ကျောင်းသားကျောင်းသူ (၁၀၀) ဦးခန့်သည် ၀မ်ဟုန်ဒေသမှ တရုတ်ကျောင်းလာတက်နေသူများဖြစ် ကြောင်း၊ ကျောင်း (၁) လခန့် ပိတ်သဖြင့် ၀မ်ဟုန်ဒေသသို့ ပြန်ကြခြင်းဖြစ်ကြောင်း၊လက်မောင်း တံဆိပ်မပါသော “ ၀ ” ယူနီဖောင်း ၀တ်မှသာ အိမ်ပြန်ခွင့် ပြုမည်ဟု UWSA “ ၀ ” ခေါင်းဆောင်ပိုင်းမှ ညွှန်ကြားထား သဖြင့် ယခုကဲ့သို့ ၀တ်ဆင်ရခြင်းဖြစ်ကြောင်း ကျောင်းသားမိဘတစ်ဦးက ပြောကြားသွားသည်။

တရုတ်စာသင်ကျောင်းမှ ကျောင်းသားကျောင်းသူများအား ၀မ်ဟုန်ဒေသသို့ တီအီး (၆) ဘီး စစ်စိမ်းရောင် ယာဉ် (၂) စီးဖြင့် ခေါ်ဆောင်သွားကြောင်း ယင်းကျောင်းမှ ဆရာမ တစ်ဦး၏ ပြောပြချက်အရ သိရသည်။

တရုတ်- မြန်မာ နယ်စပ်ရှိ တိုင်းရင်းသားအရေးလေ့လာသူ အလွတ်သတင်း ထောက်တစ်ဦးက “ တရုတ်က “၀” အပေါ် ဘယ်လောက်ထိ လွှမ်းမိုးမှုရှိတယ် ဆိုတာ ပညာရေးကစပြီး သက်သေပြနေတာပဲ၊ တရုတ်စာသင်ပြီး တရုတ် စကားပဲ ပြောတတ်တယ်၊ ဒီ “၀” ကလေးတွေဟာ သူတို့ကိုယ်သူတို့ တရုတ် တွေလို့ပဲ ထင်တော့မှာပဲ လေ ”

“၀” ကလေးတွေဟာ မြန်မာပြည်ထဲက အခြားသော တိုင်းရင်းသားတွေနဲ့ ထိတွေ့ခွင့် မရဘူး၊ ဒီတော့ သူတို့ဆီမှာ တရုတ်ရဲ့ အငွေ့အသက်တွေပဲ လွှမ်းမိုးနေမှာပဲလေ၊ အခုလို ဘာမှ မသိသေးတဲ့ ကလေးတွေကို UWSA “ ၀ ” အဖွဲ့အနေနဲ့ ယူနီဖောင်းဝတ်ပြီး ပြန်ခိုင်းတယ်ဆိုတာ ကလေးတွေရဲ့ လွတ်လပ်ခွင့်ကို ထိန်းချုပ် ကန့်သတ်တာပဲလေဗျာ၊ အရွယ်မရောက်သေးတဲ့ ကလေးတွေရဲ့ ဦးနှောက်ထဲမှာ UWSA “ ၀ ” အဖွဲ့ရဲ့ လုပ်ရပ်တွေအပေါ် အရိုးစွဲသွားမှာပဲ စိုးရိမ်မိပါတယ်၊ နောင်ဆိုရင် သူတို့ဟာ UWSA “ ၀ ” လိုပဲ မြန်မာနိုင်ငံဆို တာထက် တရုတ်နိုင်ငံကို ပိုပြီး မှီခိုသွားနိုင်တယ်လေ ” ဟု သုံးသပ် ပြောကြားသွားခဲ့သည်။

အိုက်ပီး
Shan News