ဂျပန်လေကြောင်းလိုင်းမှ စီးပွားရေးကြော်ငြာကြောင့် တောင်းပန်ခဲ့ရ

ပို့စ်တင်ချိန် - 1/20/2014 08:00:00 PM

ဇန်နဝါရီ ၂၀။

ဂျပန်ခရီးသည်တင်ယာဉ်လိုင်း All Nippon Airways (ANA) မှ တနင်္လာနေ့တွင် လူမျိုးရေး ခွဲခြားမှုဆန်သော တီဗွီကြော်ငြာကြောင့် တိုင်တန်းခဲ့ကြသည့် ခရီးသည် တစ်ဦးချင်းစီအား တောင်းပန်ကြောင်း ကြေငြာခဲ့သည်။ တိုကျိုရှိ ဟာနဲဒါးလေဆိပ်မှ နိုင်ငံတကာ လေကြောင်းလိုင်းများ၏ မတ်လအတွင်း အချိန်ဇယားများ အကြောင်းကို အာပေးမြှင့်တင်ရန် ရည်ရွယ်သည့် စက္ကန့်သုံးဆယ်ကြာ တယ်လီဗေးရှင်းကြော်ငြာအား ANAလေကြောင်းလိုင်းမှ စနေနေ့တွင် စတင်ထုတ်လွှင့်ခဲ့သည်။

ကြော်ငြာအတွင်း ANA လေကြောင်းလိုင်ဝတ်စုံ ဝတ်ဆင်ထားသည့် အမျိုးသားနှစ်ဦးမှ ၎င်းတို့ နိုင်ငံတကာ လေကြောင်းလိုင်း အနေဖြင့် ပုံရိပ်မြှင့်တင်ရန် အကြောင်းကို အင်္ဂလိပ်လို ပြောဆိုဆွေးနွေးနေကြသည်။ တစ်ဦးက “ဂျပန်လူမျိုးတွေရဲ့ ပုံရိပ်ကို ပြောင်းလဲကြစို့”ဟု ပြောကြားချိန်တွင် ရွှေရောင်ဆံပင်အတု နှင့် မဖြစ်နိုင်လောက်အောင် ရှည်လျားသည့် ရာဘာနှာခေါင်းရှည် အတုကို တပ်ဆင်ပြောင်းလဲထားသည့် ကျန်တစ်ဦးမှ “အေး”ဟု ပြန်ပြောခဲ့ခြင်းဖြစ်သည်။

ဂျပန်နိုင်ငံတွင် အနောက်နိုင်ငံသား လူဖြူအများစုမှာ နှာခေါင်းကြီးကြီး၊ မျက်လုံးပြာပြာနှင့် ရွှေရောင်ဆံပင်များ ရှိကြသည်ဟု ဂျပန်လူမျိုးအများစုမှ ယုံကြည်ကြသည်။ ၎င်းကြော်ငြာသည် ဂျပန်ရှိ  ဆိုရှယ်မီဒီယာများကို အင်္ဂလိပ်ဘာသာဖြင့် သုံးစွဲသူများအကြားတွင် ဂယက်ရိုက်ခဲ့သည်။

ANA မှ ပြောရေးဆိုခွင့်ရှိသူ အမျိုးသမီးမှ “ ကြော်ငြာကြောင့် ခရီးသည်များထံမှ တိုင်ကြားချက်များ ရရှိခဲ့ကြောင်း၊ အများစုမှာ နိုင်ငံခြားသားများ ဖြစ်ကြောင်းပြောကြားခဲ့ပြီး ၎င်းတို့လေကြောင်းလိုင်းမှ ကြော်ငြာကြောင့် မသက်မသာ ခံစားခဲ့ရတဲ့ ခရီးသည်တစ်ဦးချင်းစီကို တောင်းပန်ပါကြောင်းနှင့် ယခုလို ကိစ္စကို ဖော်ထုတ်ပေးတဲ့အတွက်လည်း ကျေးဇူးတင်ပါကြောင်း” AFP သို့ ပြောကြားသွားသည်။

“’ဒီကိစ္စနဲ့ ပတ်သက်ပြီး ကြော်ငြာဌာနအကြီးအကဲကို အကြောင်းကြားပြီးပါပြီ။ ဒါပေမဲ့ ဒီကြော်ငြာကို ဘယ်လိုလုပ်ရမလဲဆိုတာ ကျွန်မတို့ မဆုံးဖြတ်ရသေးပါဘူး” ဟုလည်း ပြောကြားခဲ့သည်။ ဂျပန်နိုင်ငံသည် ပြောင်းရွှေ့နိုင်ငံသားများနှင့် နှိုင်းစာလျှင် ကြီးမားသည့် လူမျိုးစု လွှမ်းမိုးမှုရှိသည့် နိုင်ငံဖြစ်သည်။

REF: AFP
The Myanma Age