အ၀လွန်ကလေးများသတိထားပါ

ပို့စ်တင်ချိန် - 1/30/2014 01:40:00 PM

အသက်(၁၀)နှစ်ဝန်းကျင် ၀၀ဖိုင့်ဖိုင့်ကလေးများ အခန်းရှေ့တွင် ဆေးကုသမှုခံယူရန် စောင့်ဆိုင်းနေကြသည်။ ထိုကလေးများတွင် ဖျားနာနွမ်းလျနေသည့် ရောဂါလက္ခဏာတစ်စုံတစ်ရာမတွေ့ရ။

ထိုကလေးများမှာ အသက်အရွယ်၊ အရပ်အမောင်းနှင့်တွက်ချက်ပါက ကိုယ်အလေးချိန် များပြားနေသည့်အတွက် အ၀လွန်ကလေးများအား ဆေးကုသမှုပေးနေသည့် ဆေးရုံ၏ လူနာခန်းရှေ့တွင် စောင့်ဆိုင်းနေကြခြင်းဖြစ်သည်။

“ကိုယ်အလေးချိန်လျှော့ချဖို့ သူတို့နေ့တိုင်းစားသောက်နေတဲ့ အချိုရည်တွေ၊ ဟမ်ဘာဂါတွေနဲ့ အချိုတွေလျှော့စားဖို့ အဓိကစည်းရုံးရတယ်”ဟု အ၀လွန်ကလေးများအား အာဟာရပိုင်းဆိုင်ရာကုသမှုများ ဆောင်ရွက်နေသည့် အာဟာရပညာရှင်တစ်ဦးကပြောသည်။

ယနေ့ခေတ်ကလေးများ စားသောက်နေသည့် အစားအစာပုံစံသည် အသက်ငယ်ငယ်ဖြင့် ရောဂါများရရှိပြီး ရောဂါများဖြင့် ကြီးပြင်းလာနိုင်မည့် အခြေအနေများရှိနေကြောင်း အာဟာရဆိုင်ရာပညာရှင်များက ပြောကြားကြသည်။

သုတေသနပညာရှင်များက ကလေးများ သရေစာအဖြစ် စားသုံးနေသည့် အစားအစာများဆိုင်ရာ သုတေသနတစ်ခုကို ရန်ကုန်မြို့အလုံမြို့နယ်ရှိ အထက်တန်းကျောင်းတစ်ခုတွင် တစ်နှစ်ကြာသည်အထိ ပြုလုပ်ခဲ့သည်။

သုတေသနအရ ကလေးအများစု နေ့စဉ်စားသောက်နေသည့် သရေစာများမှာ အချိုရည်များ၊ အထုပ်လှလှဖြင့် ထုပ်ပိုးထားသည့် အကြွပ်ကြော်များဖြစ်နေပြီး ထိုအစားအစာများကို နေ့စဉ်တစ်ကြိမ်ထက် ပိုမိုစားသုံးနေကြောင်း ထိုသုတေသနကတွေ့ရှိခဲ့သည်။

ထိုကလေးများသည် အချိုရည်များ၊ အာလူးကြော် စသည့်အကြော်များ၊ ချိုချဉ်၊ သကြားလုံး စသည့်အစားအစာများကို အများဆုံးစားသုံးနေပြီး ထိုကလေးများထဲတွင် ၂၆ ရာခိုင်နှုန်းမှာ မြန်မာမုန့်လုံးဝစားသုံးခြင်းမရှိခြင်း၊ ၂၅ ရာခိုင်နှုန်းမှာ နွားနို့လုံးဝသောက်သုံးခြင်းမရှိခြင်းနှင့် ၄၁ ရာခိုင်နှုန်းမှာ အိုဗာတင်းကဲ့သို့သော အာဟာရဓာတ်ပါဝင်သည့်အရည်များ သောက်သုံးခြင်းမရှိသည်ကို တွေ့ရှိရသည်ဟု ထိုသုတေသနပြုလုပ်ခဲ့သည့် ဒေါက်တာမြဥမ္မာကပြောသည်။

အာဟာရတန်ဖိုးများပြားသည့် မြန်မာအစားအစာများ၊ နို့ထွက်အစားအစာများနှင့် စားသုံးသင့်သည့် သစ်သီးကဲ့သို့သော အစားအစာများမှာ သန့်ရှင်းမှုအပါအ၀င် အရင်းအနှီးများပြားသည့်အတွက် တစ်နိုင်ငံလုံးရှိ ကျောင်းမုန့်ဈေးတန်းအများစုတွင်ရှိနေသည့် အစားအစာများမှာ အချိုရည်များ၊ အသင့်ထုပ်ပိုးထားသည့် အရောင်လှလှမုန့်များဖြစ်နေသည်။

ထိုအစားအသောက်များမှာ ကလေးများအတွက် ပြဿနာကြီးနှစ်ခုကို သယ်ဆောင်လာခြင်းဖြစ်သည်။ ပထမတစ်ခုမှာ အာဟာရတန်ဖိုးနည်းပါးသည့် ထိုအစားအစာများကြောင့် ကလေးများ နေ့စဉ်လိုအပ်သည့် အာဟာရမရရှိခြင်းကြောင့် ပုံမှန်ကိုယ်အလေးချိန်မရှိသည့် ကလေးများဖြစ်လာခြင်းပင်ဖြစ်သည်။

ထိုသုတေသနတွင်ပင် ပုံမှန်ကိုယ်အလေးချိန်ထက် လျော့နည်းနေသည့် ကလေးအများအပြားတွေ့ရှိခဲ့သည်။ ကလေးများ အာဟာရချို့တဲ့ခြင်းကြောင့် အသိသာဆုံးသည် အရပ်ပုသေးကွေးခြင်း ဖြစ်သည်။ ထိုမှ နောက်ဆက်တွဲ အာဟာရချို့တဲ့မှုကြောင့် ရောဂါကာကွယ်နိုင်စွမ်းများ လျော့နည်းပြီး ရောဂါများ အလွယ်တကူ ၀င်ရောက်နိုင်ခြင်းတို့ဖြစ်သည်။

“ပိုက်ဆံကုန်တာချင်းအတူတူ ကလေးတွေက အာဟာရမရှိတဲ့အစားအစာတွေကို ပိုစားနေတာတွေ့နေရတယ်”ဟု ဆေးသုတေသနဦးစီးဌာန အာဟာရဌာနမှ
ညွှန်ကြားရေးမှူးတစ်ဦးကပြောသည်။

နောက်တစ်ခုမှာ အချိုရည်များနှင့် ကယ်လိုရီပါဝင်မှုများပြားသော အစားအစာများ စားသုံးမှုများပြားခြင်းကြောင့် ကလေးများ အ၀လွန်လာသည့်ပြဿနာဖြစ်သည်။

အများစုမှာ အလွယ်ရနိုင်သည့်အကြော်ထုပ်များ စားနေကြပြီး ထို့ထက်ပိုတတ်နိုင်သူများမှာ ကယ်လိုရီပါဝင်မှုများပြားသည့်အစားအစာများ စားသုံးနေကြသည်။ ထိုအစားအစာများ အစားများလာသည့်အခါ ခန္ဓာကိုယ်အတွင်း လိုအပ်သည့်ကယ်လိုရီထက် ပိုမိုများပြားစွာရောက်ရှိလာပြီး အ၀လွန်လာခြင်းဖြစ်သည်။

အ၀လွန်ကလေးများတွင် ဆက်စပ်ဖြစ်ပွားသည့်ရောဂါများ သိရှိစေရန် သာမန်နှင့် အ၀လွန်မြန်မာကလေးများတွင် ဇီဝဖြစ်စဉ်ရောဂါလက္ခဏာ ရှာဖွေလေ့လာခြင်း သုတေသနတစ်ခုကိုလည်း လွန်ခဲ့သည့်နှစ်အနည်းငယ်က ပြုလုပ်ခဲ့သည်။

ဇီဝဖြစ်စဉ်ရောဂါလက္ခဏာဖြစ်ပေါ်ခြင်းသည် လူကြီးဘ၀တွင် ဆီးချိုရောဂါ၊ နှလုံးသွေးကြောကျဉ်းရောဂါများကို ဖြစ်ပွားစေနိုင်ပြီး အ၀လွန်ကလေးများ ထိုလက္ခဏာစုမှာ အနည်းဆုံးတစ်ခုစီ တွေ့ရှိခဲ့ရသည်။

ပြည်တွင်း၌ ခေတ်စားလာသည့် အသင့်စားအစားအသောက်များ၊ အချိုရည်များ၊ လှုပ်ရှားမှုနည်းပါးခြင်းများ စသည်တို့ကြောင့် ယနေ့ခေတ်တွင် လူလတ်ပိုင်းမှစ၍ သက်ကြီးရွယ်အိုများတွင် သွေးတိုး၊ နှလုံး၊ ဆီးချိုကဲ့သို့ရောဂါများ အဖြစ်များလာသည့်အချိန်တွင် ယခုကလေးများ စားသောက်နေသည့် အစားအသောက်များက ထိုရောဂါများ ငယ်ငယ်ရွယ်ရွယ်ဖြစ်လာနိုင်ခြေရှိကြောင်း သုတေသနပြုလုပ်ခဲ့သူ ဒေါက်တာမြဥမ္မာကပြောသည်။

ထို့အပြင် စီးပွားရေးလမ်းစပွင့်လာသည့်အချိန်တွင် ပြည်တွင်းသို့ နိုင်ငံတကာမှအချိုရည်များ၊ အသင့်စား အစားအသောက်ဆိုင်များ အများအပြားဝင်ရောက်လာပြီး ဆိုင်တိုင်းတွင်လည်း အားပေးဝယ်ယူသူများဖြင့် ကြိတ်ကြိတ်တိုးစည်ကားနေသည်။

အိမ်နီးချင်းနိုင်ငံများမှလည်း အာဟာရနည်းပါးသော်လည်း စားသုံးသူအပြင် ရောင်းချသူကိုပါ ဆွဲဆောင်နိုင်သည့် မုန့်မျိုးစုံဝင်ရောက်နေသည်။

ဖွံ့ဖြိုးပြီးနိုင်ငံများတွင် မကူးစက်နိုင်သည့်ရောဂါများကြောင့် သေဆုံးမှုသည် ကူးစက်နိုင်သည့်ရောဂါများကြောင့် သေဆုံးမှုနှုန်းထက်မြင့်တက်နေသည်။ မြန်မာနိုင်ငံတွင်မူ ယနေ့အချိန်အထိ ကူးစက်နိုင်သည့်ရောဂါများနှင့် မကူးစက်နိုင်သောရောဂါများကြောင့် သေဆုံးမှုနှုန်း ကိန်းဂဏန်းတူညီနေပြီဖြစ်သည်။

သို့သော် နောက်ပိုင်းတွင် ကူးစက်ရောဂါများအား ထိန်းချုပ်နိုင်သည့်အချိန်တွင် နေထိုင်မှုပုံစံ၊ စားသောက်မှုအလေ့အထများကြောင့် ဖြစ်ပွားလာမည့် ထိုမကူးစက်နိုင်သောရောဂါများကြောင့် သေဆုံးမှုများပြားလာမည်ဖြစ်သည်။ ဖြစ်ပွားမှုများပြားနေသည့် အနောက်နိုင်ငံများတွင် ကယ်လိုရီပါဝင်မှုများပြီး ကျန်းမာရေးနှင့်မညီညွတ်သည့် အစားအစာများကို ပြန်လည်ဆင်ခြင်စားသုံးပြီး ရောဂါဖြစ်မှုကို ကာကွယ်လာသည့်အချိန်တွင် မြန်မာနိုင်ငံတွင်လည်း နောက်မျိုးဆက်မှာ အသက်ငယ်ငယ်တွင် ရောဂါများဖြင့် ကြီးပြင်းလာမှုကို အချိန်မီကာကွယ်ရန်တော့ လိုအပ်ပါသည်။

ကလေးများ အာဟာရတန်ဖိုးရှိသည့် အစားအသောက်များ ရွေးချယ်စားသုံးတတ်စေရန် အသိပညာပေးမှုများအပါအ၀င် ကျောင်းမုန့်ဈေးတန်းများတွင်လည်း သန့်ရှင်းပြီးအာဟာရရှိသော အစာအစားများ လက်လှမ်းမီရရှိစေရန် အသိပညာပေးမှုများ လိုအပ်နေပြီဖြစ်ကြောင်း ကျန်းမာရေးပညာရှင်များက ထောက်ပြပြောဆိုသည်။

“အဲဒီရောဂါတွေက လူကြီးတွေမှာဖြစ်ပေမယ့် အခုဆိုရင် လူလတ်ပိုင်းမှာ ဖြစ်လာနိုင်ပါတယ်”ဟု ဆေးသုတေသနဦးစီးဌာန အာဟာရဌာနမှ တာဝန်ရှိသူတစ်ဦးကပြောသည်။

ရေးသားသူ- ၀တ်ရည်အောင်
7Day News Journal