ရွေးကောက်ပွဲကို ဖေဖော်ဝါရီ ၂ ရက် ကျင်းပမည်ဟု ထိုင်းအစိုးရ ထပ်မံအတည်ပြု

ပို့စ်တင်ချိန် - 1/15/2014 11:00:00 PM

ထိုင်းဝန်ကြီးချုပ် ယင်းလပ် (ဓာတ်ပုံ – Reuters)
ထိုင်းရွေးကောက်ပွဲကို နဂို စီစဉ်ထားတဲ့အတိုင်း ဖေဖော်ဝါရီ ၂ ရက်နေ့မှာ ကျင်းပမယ်လို့ ထိုင်းအစိုးရက ဒီနေ့ ထပ် အတည်ပြုပါတယ်။

ရွေးကောက်ပွဲကော်မရှင်က အဆိုပြုထားတဲ့ ရွေးကောက်ပွဲ ရွှေ့ဆိုင်းရေးကိစ္စကို ၀န်ကြီးချုပ် ဦးဆောင် ဆွေးနွေးပြီးတဲ့နောက်မှာ ဒုဝန်ကြီးချုပ်က ထပ်အတည်ပြုလိုက်တာပါ။

“အစည်းအဝေး တက်ရောက်လာတဲ့ အများစုက ရွေးကောက်ပွဲကို စီစဉ်ထားတဲ့အတိုင်းပဲ ကျင်းပဖို့ သဘောထားပေးကြတယ်။ ရွေးကောက်ပွဲကော်မရှင်အနေနဲ့လည်း ရွေးကောက်ပွဲ ဥပဒေနဲ့အညီ ရွေးကောက်ပွဲကို ကျင်းပရပါမယ်”လို့ ဒုဝန်ကြီးချုပ် ပွန်သပ် သပ်ခန်းချနာက ပြောပါတယ်။

ဝန်ကြီးချုပ် ယင်းလပ်က နိုင်ငံရေးပါတီတွေ အားလုံးနဲ့ အစိုးရ ဆန့်ကျင် ဆန္ဒပြနေတဲ့ အဖွဲ့တွေကို ရွေးကောက်ပွဲ ရွှေ့ဆိုင်းရေးကိစ္စ ဒီနေ့ ဆွေးနွေးခဲ့ပေမယ့် အများစုက အစည်းအဝေး မတက်ကြပါဘူး။

အစိုးက အခုလို ဆုံးဖြတ်လိုက်တဲ့ နောက်မှာ ဆန္ဒပြသမားတွေဟာ ဘန်ကောက်မြို့လယ် ရတ်ချပရာဆွန် အ၀ိုင်းမှာ ဆက်ပြီးတော့ သပိတ်စခန်းဖွင့်ထားပါတယ်။

ဆန္ဒပြနေသူ ဖွန်သီပေါင်ကတာ့ ဘန်ကောက်မြို့ပေါ် အခြေအနေက အခုထက် ပိုတင်းမာလာနိုင်တယ်လို့ ပြောပါတယ်။

“အခြေအနေတွေက ပိုဆိုးလာလိမ့်မယ်။ ဒီနေ့ ဆန္ဒပြနေကြတဲ့ လူတွေ ဘယ်လောက်များသလဲဆိုတာကို ၀န်ကြီးချုပ် ယင်းလပ်သာ သိရင် သူအနေနဲ့ ရာထူးကနေ နုတ်ထွက်ပြီးတော့ အာဏာကို ပြည်သူတွေ လက်ထဲကို ပြန်အပ်သင့်တယ်ဆိုတာကို နားလည်သွားလိမ့်မယ်လို့ ထင်ပါတယ်။”

ဆန္ဒပြသမား အခြားတဦးကလည်း “အဲဒီရက်မှာပဲ ရွေးကောက်ပွဲ ကျင်းပမယ်ဆိုရင် ရွေးကောက်ပွဲတော့ သွားမယ်။ ဒါပေမယ့် ဘယ်သူကိုမှ မဲပေးမှာတော့ မဟုတ်ဘူး” လို့ ပြောပါတယ်။

ဆန္ဒပြခေါင်းဆောင် ဆူထေ့ပ်ကို ထောက်ခံသူတွေဟာ ဘန်ကောက်မြို့က လမ်းဆုံလမ်းခွကြီး အနည်းဆုံး ၇ ခုကို ပိတ်ဆို့ထားပြီး အစိုးရ ၀န်ကြီးဌာနရုံးတွေကိုလည်း အလုပ်လုပ်လို့ မရအောင် အနှောင့်အယှက်ပေးဖို့ ကြိုးစားနေကြပါတယ်။

ဝန်ကြီးဌာနရုံး တော်တော်များလည်း လောလောဆယ် ပိတ်ထားရပြီး ၀န်ထမ်းတွေဟာ အရေးပေါ် အရန်ထားတဲ့ ရုံးခန်းတွေ၊ ဒါမှမဟုတ် အိမ်တွေကနေပဲ အလုပ်လုပ်နေကြပါတယ်။

ဆန္ဒပြခေါင်းဆောင်တွေကတော့ ယင်းလပ် ဦးဆောင်တဲ့ အစိုးရနေရာမှာ ပြည်သူ့ကောင်စီနဲ့အစားထိုးနိုင်တဲ့အထိ မြို့ကိုဆက်ပြီးတော့ ပိတ်ဆို့ထားမယ်လို့ ပြောထားပါတယ်။

လက်ရှိ စနစ်တွေအောက်မှာ ရွေးကောက်ပွဲကို ကျင်းပဖြစ်ရင်တော့ ယင်းလပ်ရဲ့ ပါတီကပဲ အနိုင်ရမယ့် ပုံရှိပါတယ်။

ဒါကြောင့် ဆန္ဒပြခေါင်းဆောင် ဆူထေ့ပ်က ရွေးကောက်ပွဲရလဒ်မှာ အပြောင်းအလဲတွေ ဖြစ်လာစေမယ့် ရွေးကောက်ပွဲစနစ်ကို ပြောင်းလဲဖို့ အဓိက ရည်ရွယ်နေတာပါ။
DVB