မေတ္တာစိတ်ဖြင့် အောင်နိုင်မည်

ပို့စ်တင်ချိန် - 1/15/2014 03:10:00 PM

ဤလောက၌ ပြိုင်ဆိုင်မှုများ ပြင်းထန်လာရာ အကျိုးစီးပွား နှင့် စပ်လျဉ်း၍ သတိပြု ဖွယ်ရာများ လှသည်။ အကျိုးစီးပွားဟု ဆိုရာ၌ မိမိ အကျိုးစီးပွား ထိပါး လာလျှင် ဖြစ်စေ ၊ ငြူစူခြင်း ၊ မနာလိုခြင်း သဘောအရ ဖြစ်စေ ထိပ်တိုက် ရင်ဆိုင်ခြင်း ၊ ဖျက်လို ဖျက်ဆီး လုပ်ခြင်းတို့ ရှိလာ တတ်သည်။

အကျိုးစီးပွား တွင် လူတစ်ဦး တစ်ယောက် အကျိုး၊ တစ်စုတစ်ဖွဲ့ ၏ အကျိုးနှင့် အများအကျိုး ထိရှိလာ၏။ လူဟူသည် အမှားနှင့် မကင်းတတ်ပေ။ အမှန်ကို လုပ်ရာတွင် အမှားဟု မှတ်ထင် တတ်သည်။ လိုရင်းမှာ အမှားရှိလျှင် အမှန်ပြင်ဖို့ လိုသည်။

ယနေ့အချိန်တွင် မိမိအကျိုး အများအကျိုး ဟူသည့် အတ္တနှင့် ပရ မျှတအောင် ဆောင်ရွက် ကြသည့် အမျိုးကောင်းသား များအဖို့ ထိုအချက်ကို သတိပြု သင့်ကြ ပေသည်။ အရာရာတွင် အတ္တချည်း မရှိအပ် သလို ၊ သာမန် ပုထုဇဉ် တစ်ယောက် အနေဖြင့် ပရချည်းလည်း ရှိမည် မဟုတ်ပေ။

မည်သို့ပင် ဖြစ်စေ စိတ်ထား ကောင်းဖြင့် မွန်မြတ်သော ဘဝကို မှန်းထား သူများ အနေဖြင့် မိမိ အပေါ်တွင် မမှန်ကန်သည့် ဣဿာ မစ္ဆရိယစိတ် ရှိသူများ အပေါ်တွင်ပင် ရန်မတုံ့ပြန်ဘဲ စိတ်ကောင်းဖြင့် မေတ္တာ ထားနိုင် ရမည် ဖြစ်ပေသည်။

မေတ္တာသည် ရေနှင့်တူပြီး ဒေါသသည် မီးနှင့်တူ၏။ ရေများ ရေနိုင် ၊ မီးများ မီးနိုင် သဘောရှိ လေရာ ရေများလေ အပူမီးများ ငြိမ်းလေ ဖြစ်သည်။ ထို့ကြောင့် ဒေါသ နည်းအောင် ကျင့်၍ မေတ္တာများ တိုးပွားအောင် ကြိုးစား အားထုတ် ကြရမည် ဖြစ်ပေသည်။

မိမိ၏ကံ ၊ ဉာဏ် ၊ ဝီရိယ အစွမ်းကြောင့် သာလွန် တိုးတက် နေသူကို ဣဿာ ဖြစ်စေခြင်းဖြင့် ထိုသူမှာ အကျိုး မယုတ်ဘဲ ပြုမိသူ သည်သာ ဝန်းကျင်၏ အထင်အမြင် အသေးခံ ရတတ်သည့် အပြင် ပြုသူ၏ အကျိုးစီးပွား လည်း ပျက်ပြား တတ်သည့် သဘော ရှိပေသည်။

သို့အတွက် တစ်ယောက် အပေါ် တစ်ယောက် ၊ တစ်ဦးအပေါ် တစ်ဦး အကျိုးစီးပွား လိုလားခြင်း သည်သာ ကြီးပွား တိုးတက်အောင် စောင့်ရှောက်ခြင်း သည်သာ ချစ်ခင်မှု မေတ္တာအစစ် မည်ထိုက် သဖြင့် မည်သို့ပြုပြု မေတ္တာဖြင့် လွှမ်းခြုံ ထားပါက မိမိစီးပွား ဘဝ လုံခြုံမည်သာ ဖြစ်ပေသည်။

ယနေ့ကာလတွင် မိမိတို့ ဦးတည်ရာ ရည်မှန်းချက် လုပ်ငန်းစဉ် များကို ဆောင်ရွက် ရာတွင် ထိုတရား သဘောအတိုင်း မိမိအလုပ်ကို မှန်ကန်စွာ လုပ်ကိုင်နိုင်ဖို့ လိုမည် ဖြစ်ပေသည်။ သို့ဖြစ်ရာ လူတိုင်း လူတိုင်းသည် မိမိ၏ ရန်သူပင် ဖြစ်လင့်ကစား မေတ္တာစိတ် ထားနိုင်အောင် ကျင့်ကြံ အားထုတ် နိုင်ပါလျှင် မည်သည့်အရာ မဆို အောင်နိုင်မည် ဖြစ်ပါကြောင်း မေတ္တာရှေ့ထား ရေးသား လိုက်ရ ပေသည်။

( ၁၅-၁-၂၀၁၄ ရက် ရတနာပုံနေ့စဉ်သတင်းစာ အယ်ဒီတာ့အာဘော် )
MYAWADY Daily