လူအချင်းချင်းလှည့်ပတ်ခြင်း ကင်းရှင်းကြပါစေ

ပို့စ်တင်ချိန် - 1/29/2014 02:31:00 PM

မြန်မာဘက်မှဝယ်ယူသော ကော်စေ့တန် ၂၀ အစား ကွန်တိန်နာဖြင့် ကျောက်ခဲများသာ ပေးပို့ခဲ့မှုအား တွေ့ရစဉ်

(Written by: မြမြင့်မိုရ်)

ဤခေါင်းစဉ်မှာ ကျေးဇူးရှင် မင်းကွန်းဆရာတော်ကြီး၏ ပါဠိမှ မြန်မာဘာသာပြန် မေတ္တာပို့စာစုမှ အပိုဒ်တစ်ပိုဒ် ဖြစ်ပါသည်။ မေတ္တာပို့ဆိုသည်ထက် လောကီထုပ္ပတ် လူတို့ဇာတ်အရှုပ်အထွေးကိုကြည့်ပြီး လွတ်မြောက်အေးချမ်းစေလိုသော ဆန္ဒနှင့် ကရုဏာရှေ့ထားကာ ဆုတောင်းပေးခဲ့သည့် သူတော်စင်တစ်ဦး၏ မှာတမ်းပါပဲ။ သည်ခေတ်အခါမှာတော့ မကြာခဏ ဆုတောင်းရသည့် စကားလည်းဖြစ်ပါသည်။

အင်း ကျွန်တော်ဘာပြောချင်တာပါလိမ့်၊ သိပြီ။ ပထမဦးစွာ ၂၃-၁-၂၀၁၄ နေ့ထုတ် The Daily Eleven သတင်းစာတွင်ပါသော Public Voice အထူးအချပ်ပို စာမျက်နှာ C ၌ “လှည့်ပတ်ခြင်း ကင်းရှင်းကြပါစေ” ဆိုသည့် ဆောင်းပါးမှ စာပိုဒ်ကို ဖော်ပြလိုပါသည်။

“စီးပွားရေးလုပ်ငန်းကြီးတွေ အပြိုင်အဆိုင် ပေါများလာမှုနှင့်အတူ ဘယ်သူသေသေ ငတေမာပြီးရောဆိုသည့် စကားအတိုင်း စီးပွားရေး ၀ိသမလောဘသမားတွေ များပြားလာပါသည်။ ငွေရဖို့လောက်ကိုသာ အဓိက ထားလာကြသည်။ စီးပွားရေးအရ အယောင်ဆောင်ပြီး ဟန်ဆောင်နေသူတွေကို ရှောင်နိုင်ဖို့ကလည်း အရေးကြီးလှပါသည်။ အကျင့်သီလ သိက္ခာမရှိသည့် ၀ိသမ စီးပွားရေးသမား၊ လောဘသမားတွေရဲ့ လှည့်စားဉာဏ်၊ အလိမ်ဉာဏ်၊ ပရိယာယ်မာယာဉာဏ်တွေကလည်း များလွန်းလှတော့ သူတို့တစ်တွေရဲ့ မျက်နှာမှာ ကောက်ကျစ်စဉ်းလဲမှုတွေ မပေါ်အောင် ဟန်ဆောင်အပြုံးတွေနှင့် ဖုံးဖိထားကြသော်လည်း ကျားငစဉ်းလဲလို၊ မြေခွေးလို အမြဲကောက်ကျစ်စဉ်းလဲမယ့် အကြံဉာဏ်တွေကို ထုတ်နေကြတဲ့ စီးပွားရေးသမား၊ ၀ိသမလောဘသမားတွေရဲ့ လှည့်ပတ်ခြင်း အန္တရာယ်ကိုတော့ အစဉ်သတိထားသင့်ကြောင်း” ရေးသားထားရာ လူအများစုကြီးအတွက် ဆောင်းပါးရှင်၏ စေတနာစကားဟု နှလုံးသွင်းမိသည်။ တစ်ပြိုင်နက်တည်းမှာပဲ ငွေကြေးနှင့် အာဏာပိုင်ကို ထင်သလို ခြယ်လှယ်နိုင်သော ၀ိသမလောဘသမားတို့ ပေါက်ဖွားရာမြစ်ဖျားကိုလည်း ပြန်ဆန်းစစ်မိသည်။

၁၉၄၈ ခုနှစ်မှာ မြန်မာနိုင်ငံ သူ့ကျွန်ဘ၀က လွတ်လာတော့ လွတ်လပ်ရေးအတွက် စိတ်ရင်းစေတနာမှန်နှင့် ကြိုးစားတည်ဆောက်ခဲ့ကြသော ဗိသုကာ နိုင်ငံ့ခေါင်းဆောင်ကြီးအချို့ ကွယ်လွန်ခဲ့ကြပြီးဖြစ်သည်။ ကျန်ရစ်ခဲ့သော ခေါင်းဆောင်တွေက ပြည်သူလူထုကို ဦးဆောင်ကာ လွတ်လပ်ရေးနှင့် ထိုက်တန်သော ဂုဏ်သိက္ခာရှိသည့် နိုင်ငံတစ်နိုင်ငံအဖြစ် နိုင်ငံဖွံ့ဖြိုးရေးကို အင်တိုက်အားတိုက် မလုပ်နိုင်မီ ပြည်တွင်းစစ်နွံ၌ နစ်ကာ နှစ်ပေါင်း ၅၀၊ ၆၀ လောက် ကျွန်တော်တို့တစ်သက် ဆိုပါတော့။ တိုင်းပြည်ဖွံ့ဖြိုးတိုးတက်မှု နောက်ကျခဲ့ရသည်။ လွတ်လပ်ရေးရသည်နှင့် ချိန်ကိုက်မလုပ်နိုင်ခဲ့။ ထိုနောက်ကျချိန်ကို အခွင့်ကောင်းယူပြီး အစိုးရ၊ အကျင့်ပျက်ဝန်ထမ်းနှင့် ၀ိသမလောဘသမားတို့ နီးနီးစပ်စပ်ပေါင်းကာ နှစ်ပေါင်း ၅၀၊ ၆၀ အတွင်းခေတ်က ခေတ်သူရဲကောင်းများကို မွေးထုတ်သလို၊ ခေတ်ပျက်သူဌေးများကိုလည်း မွေးထုတ်ပေးခဲ့သည်။

သန့်ရှင်းသောအစိုးရနှင့် ကောင်းမွန်သောအုပ်ချုပ်ရေး မပေါ်ပေါက်မီ ညစ်ပတ်သောအစိုးရနှင့် အဂတိလိုက်စားသော အုပ်ချုပ်ရေးအောက်တွင် အဲဒီခေတ်ပျက်သူဌေးတွေပဲ မီဂါသူဌေးကြီးတွေဖြစ်၊ မီဂါလုပ်ငန်းရှင်ကြီးတွေဖြစ်၊ အဲဒီသူတွေပဲ မီဂါစီမံကိန်းကြီးတွေ အကောင်အထည်ဖော်၊ မီဂါပါဝါတွေ ထူထောင်ပြီး မြန်မာနိုင်ငံအပေါ် ထင်တိုင်းကြဲကြသည်။ ပြီးတော့သူတို့တစ်တွေပဲ ပြဋ္ဌာန်းဥပဒေတွေကို လက်တစ်လုံးခြား ရှောင်းတိမ်းကြ၊ အခွင့်အရေးတွေ ယူကြသည်။ ပညာရှင်တွေကိုလည်း နည်းမျိုးစုံနှင့်ဝယ်ကာ သူတို့လုပ်ငန်းတွေကို အကာအကွယ်ယူကြသည်။ နင့်နေအောင်ရခဲ့သော အမြတ်ငွေများထဲမှ အစွန်းထွက်လောက်သုံးကာ မိမိအတ္တကို ဖုံးကွယ်ဖို့၊ ဂုဏ်သိက္ခာထူထောင်ဖို့ ပရဟိတလုပ်ငန်းတွေ၊ အလှူအတန်းတွေနှင့် ချမ်းသာကြွယ်ဝမှု အပေါ်တွင် ဂုဏ်သတင်းကောင်းတွေ ထပ်ဆောင်းဖို့ လုပ်ကြသည်မှာ ခေတ်ပျက်သူဌေးအချို့၏ ဘ၀နေထိုင်မှု ပုံသေနည်းများ ဖြစ်လာကြသည်။ သူတို့စိတ်ရင်းကဘာလဲ။ မေးခွန်းထုတ်စရာ များစွာနှင့်အတူ ဆင်းရဲချမ်းသာကွာဟမှု ချောက်ကမ်းပါးမှာ နက်လဲနက်၊ ကျယ်လဲကျယ်လာသည်။ ထိုအခြေအနေ၌ ချမ်းသာသူကလည်း ထင်တိုင်းကြဲ၍ ဆင်းရဲသူကလည်း ညစ်တွန်းတွန်းခဲ့ရာ နောက်ဆုံးတိုင်းပြည်လည်း အဆင်းရဲဆုံးဘ၀ရောက်ပြီး အခွင့်အရေးပေါင်းများစွာ ဆုံးရှုံးခဲ့ရသည်။

ယနေ့ထိတိုင်လည်း မြန်မာနိုင်ငံ၏ လူ့အခွင့်အရေးဆိုသည်မှာ ကလေးတစ်ယောက်က ဖိုးလမင်းကြီးထံမှ ထမင်းဆီဆမ်းကို ရွှေလင်ပန်းနှင့် တောင်းသလိုမျိုး စကားအဖတ်တင်နေခဲ့သည်မှာ ကြာပါပြီ။ လုပ်သားအခွင့်အရေး ဆိုတာလည်း အလုပ်လက်မဲ့နှုန်း မြင့်မားသော တိုင်းပြည်ဖြစ်သလို ရရာအလုပ်ကို ၀င်လုပ်ရင်း ကျားသနားမှနွားချမ်းသာ ဆိုသကဲ့သို့ အလုပ်ရှင်မျက်နှာတွေ ကြည့်နေရဆဲဖြစ်ကြောင်း၊ ရန်ကုန်မြို့တွင် ဟိုတယ်ကြီးတစ်ခု ဆောက်နေသော လုပ်ငန်းခွင်၌ နေ့စား၊ လစား ၀န်ထမ်းများမှာ တစ်နေ့ ၁၂ နာရီ နေ့ဆိုင်း၊ ညဆိုင်း ပိတ်ရက်မရှိ အလုပ်ဆင်းနေကြရပြီး တစ်နေ့အချိန်ပို လေးနာရီခိုင်းသည့် အချိန်ပိုလုပ်ခ၊ စနေ၊ တနင်္ဂနွေပိတ်ရက်ဆင်းရသည့် အချိန်ပိုလုပ်ခတွေကို ဘယ်လိုတွက်ချက် ရှင်းပေးနေသလဲ မသိပါဟု ၀န်ထမ်းလူငယ်တချို့၏ ရင်ဖွင့်သံမှတစ်ဆင့် သိခဲ့ရသည်။ သဘာဝပတ်ဝန်းကျင် ထိန်းသိမ်းရေးကတော့ သုညပါပဲ။ အစိုးရနှင့်နီးစပ်သော ကုမ္ပဏီများနှင့် အကျင့်ပျက်ဝန်ထမ်းတို့ ပူးပေါင်းကာ မြေပေါ်မြေအောက် သယံဇာတတွေ အလွန်အကျွံ ထုတ်ယူမှုကြောင့် ဂေဟစနစ် တော်တော်များများ ပျက်စီးနေပြီး ဒီကြားထဲ NASA က ထုတ်ပြန်သည်ဆိုသော သတင်းတစ်ပုဒ်၌ ၂၀၁၃ ခုနှစ်မှာ ကမ္ဘာ့အပူနွေးဆုံး နှစ်တွေထဲပါဝင်နေပြီး ၂၀၁၄ ခုနှစ်တွင်လည်း အယ်လ်နီညို ပြန်ဖြစ်နိုင်သဖြင့် ပိုပြီးပူနွေးဦးမည်တဲ့။ သဘာဝတရားကနှိပ်စက်၊ လူလည်လူနပ်တွေကနှိပ်စက်နှင့် ပြည်သူလူထု၏ ရုပ်အခြေအနေနှင့် စိတ်အခြေအနေတို့မှာ ပိုမိုနိမ့်ကျသွားဖို့သာ ရှိတော့သည်။ ပြီးတော့ အဂတိလိုက်စားမှု၊ အဲဒီကိစ္စကတော့ တရားဥပဒေစိုးမိုးမှု နိမ့်ကျခြင်းနှင့်အတူ မြန်မာနိုင်ငံမှာ ဌာနတိုင်း အသားကျနေခဲ့တာကြာပါပြီ။

ထိုအခြေအနေ၌ “UNGC ၌ ယခင်အစိုးရနှင့် နီးစပ်သော ကုမ္ပဏီများပါဝင်” ဆိုသည့် သတင်းတစ်ပုဒ်ကို The Daily Eleven သတင်းစာ၌ပင် ထပ်ဆင့်ဖတ်ရပြန်ရာ စောစောကဖတ်ခဲ့သော ဆောင်းပါးနှင့် ဆက်စပ်စဉ်းစားသွားရသည်။ UNGC ဆိုတာဘာလဲ။ အဲဒီအဖွဲ့ရဲ့ ရည်ရွယ်ချက်၊ လုပ်ဆောင်ချက်တွေက ဘာလဲ၊ ဘယ်လိုအကျိုးအပြစ်တွေ ရှိသလဲ...စသဖြင့်။

UNGC ဆိုသည်မှာ UN Global Compact ဆိုသည့် အဖွဲ့အစည်းတစ်ခုဖြစ်သည်။ စီးပွားရေးလုပ်ကိုင်သည့် အချိန်တွင် လူမှုအကျိုးပြုလုပ်ငန်းများ လုပ်ကိုင်ခြင်း (Corporate Social Responsibility) လုပ်ငန်းများအား အဓိကလုပ်ကိုင်သည့် ကုမ္ပဏီများ ဖြစ်လာရေး တွန်းအားပေးသည့် နိုင်ငံတကာ သိက္ခာရှိ အဖွဲ့အစည်းဖြစ်သည်ဟု ဆိုသည်။ ဤအဖွဲ့၏ Active Level ၌ ပါဝင်ခြင်းဖြင့် နိုင်ငံတကာသိက္ခာရှိ အဖွဲ့အစည်းတစ်ခုအဖြစ် ရပ်တည်နိုင်မည်။ အဲဒီအဖွဲ့က လူ့အခွင့်အရေး၊ လုပ်သားအခွင့်အရေး၊ သဘာဝပတ်ဝန်းကျင် ထိန်းသိမ်းရေးလုပ်ငန်းများနှင့် အဂတိလိုက်စားမှု တိုက်ဖျက်ရေးများ လုပ်ဆောင်မည်ဟုဆိုသည်။ ထို UNGC ၌ မြန်မာနိုင်ငံအခြေစိုက် ကုမ္ပဏီ ၁၀၀ နီးပါး ပါဝင်နေသည်ဟု ဆိုပါသည်။

UNGC ၏ ရည်ရွယ်ချက်ကောင်းပါသည်။ ကမ္ဘာ့နိုင်ငံ တော်တော်များများတွင် ပြဿနာဖြစ်နေသည်က လူ့အခွင့်အရေး၊ လုပ်သားအခွင့်အရေး၊ သဘာဝပတ်ဝန်းကျင် ထိန်းသိမ်းရေးနှင့် အဂတိလိုက်စားမှု ပပျောက်ရေးများပင်ဖြစ်ရာ အဓိကကျသော ယင်းပြဿနာများကို ဖြေရှင်းရမည်သာဖြစ်သည်။ ဘာပဲဖြစ်ဖြစ် ယခင်အစိုးရနှင့် နီးစပ်သည်ဖြစ်စေ၊ မနီးစပ်သည်ဖြစ်စေ အင်အားရှိသော ကုမ္ပဏီကြီးများ UNGC ၏ မူဘောင်ထဲဝင်ကာ Active Level ၌ ပါဝင်လာကြသည်ကို ကြိုဆိုရမည်သာဖြစ်သည်။ သို့သော် ထိုကုမ္ပဏီကြီးများ၏ လူ့အခွင့်အရေးမှတ်တမ်း၊ လုပ်သားအခွင့်အရေးမှတ်တမ်း၊ သဘာဝပတ်ဝန်းကျင် ထိန်းသိမ်းရေးမှတ်တမ်းနှင့် အဂတိလိုက်စားမှု မှတ်တမ်းများအပေါ်၌ မမေ့မလျော့ဆန်းစစ်ရန် လိုသည်ဟု ယူဆမိပါသည်။ ယခင်အစိုးရနှင့်နီးစပ်သော ကုမ္ပဏီတော်တော်များများမှာ ထိုအခြေနေများကို မျက်ကွယ်ပြုခဲ့သော သမိုင်းနောက်ခံ ရှိကြသည်။

သို့သော် ပညာရှင်တစ်ဦး၏ အဆိုအရ ပြီးခဲ့တာတွေထားတော့။ UNGC ၏ စည်းကမ်းတွေ လိုက်နာရင်ရပြီ။ ယခု “ပိုနေမြဲ၊ ကျားနေမြဲ” အခြေအနေ၌ပင် လူမှုအကျိုးပြု လုပ်ငန်းတွေ လုပ်ရင်ပြီးပြီဆိုသည့် သဘောမျိုး ရောက်တဲ့နေရာက စစေချင်သည်။ သို့သော် ယနေ့အခြေအနေမှာ ကျားကထောင်ချောက်ထဲတွင်ရောက်ပြီး မောင်ပိုကအပြင်ဘက်တွင် ရှိနေရမည့်အစား မောင်ပိုက ထောင်ချောက်ထဲတွင် ရောက်နေပြီး ကျားကအပြင်ဘက်တွင် ရှိနေသော အခြေအနေမျိုး ဖြစ်နေရာ။

လူအချင်းချင်းလှည့်ပတ်ခြင်း ကင်းရှင်းကြပါစေဟူ၍သာ ဆုတောင်းနေမိပါကြောင်း။

Eleven Media Group