လူငယ်တွေရဲ့ အသည်းစွဲ

ပို့စ်တင်ချိန် - 1/27/2014 01:00:00 AM

(Tech Space ကွန်ပျူတာ၊သိပ္ပံနှင့် နည်းပညာဂျာနယ် Vol-2 Issue-40 တွင်ဖော်ပြခဲ့ပြီးဖြစ်ပါသည်)
လင်းလင်း(IA)

လူငယ်တော်တော်များများ အနေနဲ့ ဘယ်လို ကားမျိုးလိုချင် တက်မက်တယ်၊ စီးနင်းမောင်းနှင်ချင်ကြတယ် ဆိုတဲ့ စစ်တမ်း ကောက်ယူ သုံးသပ် တင်ပြတာမျိုး ကျွန်တော်တို့နိုင်ငံမှာ မရှိပေမယ့် ကျွန်တော် ကိုယ်တိုင်တောင်မှာ စိတ်ကြိုက်ကားတစ်စီးလောက် ပိုင်ဆိုင်မောင်းနှင်ခွင့် ရမယ် ဆိုရင် Sportတစ်စီးလောက် လိုချင်မိနေတာပါ။ ဘာကြောင့်လဲ ဆိုတော့ ပထမတစ်ချက်က လူငယ်တွေ ဖြစ်တာကြောင့်ပါ။ စိတ်မြန်တယ်၊ သွက်လက်တယ်၊ ကိုယ်ကိုယ်တိုင် သွက်လက် မြန်ဆန်ကြသလို ကိုယ်နဲ့ တွဲဖက်၊ အသုံးအဆောင် အရာအားလုံး သွက်လက် မြန်ဆန်တာမျိုးလိုချင်ကြတဲ့ သဘာဝကြောင့် ကားဆိုရင်လည်း အဲဒီလို မြန်ဆန် သွက်လက်တဲ့ Sportလို ကားတွေကို လူငယ်တွေ ကြိုက်နှစ်သက်တာ ဖြစ်ပါတယ်။


နောက်တစ်ချက်ကတော့ ဒီဇိုင်း အပိုင်းပါ။ လက်ရှိ ကမ္ဘာပေါ်မှာ အကောင်းဆုံး ဇိမ်ခံ လူစီးကားအဖြစ်နဲ့ သတ်မှတ်ထားတဲ့ Roll Royceရဲ့ Sedanတွေတောင်မှ Featureအပိုင်းနဲ့ ကျန်တဲ့ စွမ်းဆောင်ရည်လို အပိုင်းတွေမှာသာ အကောင်းဆုံး အဖြစ် ရပ်တည်နိုင်နေတာ ဖြစ်ပေမယ့် ဒီဇိုင်း အပိုင်းကတော့ Sportတွေလောက် လူကြိုက်မများတာ လက်တွေ့ပါပဲ။ အလွယ်ကြည့်ရင်တောင်မှ ရာစုနှစ်၊ ဆယ်စုနှစ်ရဲ့ ဆွဲဆောင်မှု အရှိဆုံးဆိုတဲ့ ကားတွေဟာ Ferrariရဲ့ မော်ဒယ်တွေ အများစု ရပ်တည်နိုင်ကြတာကို ကြည့်ရင်ပဲ အဖြေပေါ်ပါတယ်။ ဒါကြောင့် Sportတွေရဲ့ အဓိက အားသာချက်ကို ပြောပါဆိုရင် မြန်ဆန်တယ်၊ ဒီဇိုင်းလှတယ်၊ ဒါကြောင့် လူငယ်ကြိုက်တယ်၊ ဒါပါပဲ။


Sportကားတွေကို Sport Car အဖြစ်နဲ့ရော Sportcarအဖြစ်နဲ့ပါ သုံးနှုန်း ကြပြီးတော့ ယေဘူယျကြည့်မယ်ဆိုရင် သူတို့ဟာ အရွယ်သေးငယ်ပြီးတော့ နှစ်ယောက်စာ ထိုင်ခုံပဲ တပ်ဆင်ထားတတ်ပါတယ်။ နောက်ပြီး တံခါး ပေါက်တပ်ဆင်မှု အပိုင်းမှာလည်း တံခါးနှစ်ချပ်တည်းသာ တပ်ဆင်ထုတ်လုပ်လေ့ရှိတာကို တွေ့ရပါတယ်။


ဒီနေရာမှာ Sportကား ထုတ်လုပ်သူတော်တော်များများက စွမ်းဆောင်ရည် မြင့်မားပြီး အမြန်နှုန်း မြင့်မြင့် မောင်းနှင်နိုင်မယ့် ကားတွေကို ဖန်တီး ထုတ်လုပ်လေ့ရှိတာ တွေ့ရပြီးတော့ အမြန်နှုန်း မြင့်တဲ့ ကားတွေရဲ့ အသက်ဖြစ်တဲ့ လက်ကိုင်ပိုင်း ထိန်းချုပ်မောင်းနှင်ရမှုမှာလည်း အထူးကောင်းမွန်အောင် ထုတ်လုပ်ကြသလို ဘရိတ်ပိုင်းမှာလည်း အရည်အသွေးကို ကမ္ဘာ့အဆင့်ရှိအောင် ထုတ်လုပ်တတ်ကြပါတယ်။
Sportကားတွေရဲ့ အရင်ဆုံး မြစ်ဖျားကို ကြည့်မယ် ဆိုရင် Touring Carတွေနဲ့ Roadsterတွေကနေ ဆင်းသက်လာတယ်လို့ ပြောနိုင်မှာ ဖြစ်ပြီးတော့ ဒီကားတွေကို တောင်ကြားလို လမ်းကြောတွေမှာ ပြိုင်ပွဲတွေ ကျင်းပရာကနေ Sportတွေ မွေးဖွားလာတာ ဖြစ်ပါတယ်။


ကမ္ဘာ့ပထမဆုံး Sportတစ်စီးကို လက်ညှိုးထိုးပြပါဆိုရင် ၁၉၁၀ခုနှစ် အတွင်း မင်းသား ဟင်နရီ စီးနင်းခဲ့တဲ့ ၃လီတာသုံး အင်ဂျင်တပ် Vauxhall ကား ဒါမှမဟုတ်ရင် Austro-Diamlerလို့ ပြောရမှာ ဖြစ်ပါတယ်။

ဘယ်ကားက ကမ္ဘာ့ ပထမဆုံး Sportကားပဲ ဖြစ်ဖြစ် သေချာတာကတော့ အဲဒီကားနှစ်စီးလုံးကို ဒီဇိုင်းရေးပေးတာက ဖာဒီနန် ပိုရှေးပဲ ဖြစ်ပါတယ်။
အဲဒီနောက်ပိုင်း အရောက် ၁၉၂၁ခုနှစ်မှာ Ballotက ၂.၀လီတာသုံး DOHCမော်ဒယ်တွေကို ထုတ်လုပ်ခဲ့တာ တွေ့ရပြီး အဲဒီ ကားတွေဟာ မြင်းကောင်ရေ ၇၅ကောင်အား ထွက်ရှိသလို အဆိုပါ ကားတွေကို ဒီဇိုင်နာ အားနက် ဟင်နရီက ရေးဆွဲထုတ်လုပ်ခဲ့သေးတာ တွေ့ရပြီးတော့ အဲဒီကားဟာ တစ်နာရီကို မိုင်၉၀နှုန်းလောက်ထိအောင် အမြန်ဆုံး မောင်းနှင်နိုင်လာခဲ့ပါတယ်။ ဒီလို မြန်နှုန်း ပမာဏက ခုခေတ်မှာ စာမဖွဲ့လောက်ပေမယ့် အဲဒီခေတ်မှာတော့ ဘုရင် ဖြစ်ခဲ့ပြီး တစ်နှစ်ကို အစီးရေ တစ်ရာလောက်ထိအောင် ထုတ်လုပ်ရောင်းချနိုင်ခဲ့တယ်လို့ ဆိုပါတယ်။ နောက်ဆက်တွဲ အနေနဲ့ SOHC 2LTနဲ့ 2LTSတွေကို ထုတ်လုပ်ခဲ့ပါတယ်။


နောက်ပိုင်း ၁၉၂၄ခုနှစ် အရောက် Simsonကလည်း ဒီဇိုင်နာ ပေါလိဟင့်ရဲ့ အားကိုးနဲ့ မြင်းကောင်ရေ ၆၀ကောင်အား ထွက်တဲ့ DOHC2နဲ့ Simson Supra Type Sလို ကားတွေကို ရေးဆွဲထုတ်လုပ်လာသလို အဲဒီကားတွေမှာ ထူးခြားချက် အနေနဲ့ဆိုရင် ကားကာဘရိုက်တာကို နှစ်လုံးထိအောင် ထည့်သွင်းအသုံးပြုထားပါတယ်။ အဲဒီကာလတွေဟာ ဆီထိုးသွင်းခြင်း စနစ် အကောင်းဆုံး ဖြစ်အောင် ဖန်တီး သုံးစွဲနိုင်ခြင်း မရှိသေးတာကြောင့် ကားအင်ဂျင်တွေမှာ ကာဘရိုက်တာစနစ်ကို အသုံးပြုနေသေးတဲ့ ကာလလည်း ဖြစ်ပါတယ်။


၁၉၂၅ခုနှစ် အရောက်မှာတော့ Sportကားတွေမှာ ထိုင်ခုံလေးနေရာစာ ထည့်သွင်းတပ်ဆင် ထုတ်လုပ်မှု ခေတ်စားလာပြီး နှစ်ယောက်စီး Sportတွေကို သတ်သတ်မှတ်မှတ် ထုတ်လုပ်သူများ အဖြစ်နဲ့ကတော့ Alvis, Aston-Martinနဲ့ Frazer-Nashတွေပဲ ရှိခဲ့ပါတယ်။ ဒါပေမယ့် အဲဒီ ကားကုမဏီတွေကလည်း ရင်းနှီးမြှပ်နှံသူ နည်းနေသေးတဲ့ အချိန်ဖြစ်တာကြောင့် ကုမဏီထုတ်ကားတွေကို အရေအတွက် ကန့်သတ်ပြီးတော့လောက်သာ ထုတ်လုပ်ရောင်းချနိုင်ခဲ့ကြသလို တီထွင်ဆန်းသစ်မှု လုပ်ကိုင် နိုင်စွမ်းလည်း နည်းခဲ့ကြပါတယ်။ နောက်ပိုင်း Sportကား စစ်စစ်ပါလို့ ပြောနိုင်မယ့် ကားတွေကိုတော့ Austinကား ကုမဏီက Sevenမော်ဒယ်နဲ့ Morris Garagesကုမဏီက Midgetကားတွေကို ၁၉၂၈ခုနှစ်မှာ ပွဲထုတ်လာတာတွေ့နိုင်ပါတယ်။


Sportတွေရဲ့ Layoutအပိုင်းမှာတော့ FF Layoutကို အသုံးနည်းတာ တွေ့ရပြီးတော့ အများစုကတော့ FR Layoutနဲ့ FMR Layoutတွေ ဖြစ်ပါတယ်။ FRစနစ်ကိုတော့ Caterham 7, Mazada MX-5နဲ့ Chevrolet Convetteမှာ မြင်တွေ့နိုင်မှာ ဖြစ်ပြီးတော့ FMRစနစ်ကိုတော့ Ferrariနဲ့ Lamborghiniလို ကားတွေမှာ အသုံးပြု ထုတ်လုပ်တာ တွေ့နိုင်ပါတယ်။ နောက်ထပ် နာမည်ကျော် လူသုံးများတဲ့ Layoutတစ်မျိုးကတော့ RR Layoutစနစ် ဖြစ်ပြီးတော့ Porscheကားတော်တော်များများမှာ အသုံးပြုတာ တွေ့နိုင်ပြီး အလွယ်ဆုံး အနေနဲ့ ဆိုရင် နာမည်ကျော် Porsche 911မှာ မြင်နိုင်ပါတယ်။
ထိုင်ခုံနေရာ တည်ဆောက်မှုကို ပြောရမယ် ဆိုရင်တော့ ပုံမှန် Sportကားတစ်စီးဟာ ထိုင်ခုံနှစ်ခုံနဲ့ နှစ်ယောက်စီး ကားအဖြစ်နဲ့သာ ထုတ်လုပ်တတ်ကြပေမယ့် နောက်ပိုင်းကျတော့ ကလေးငယ် တစ်ယောက်ထိုင်ခုံ တစ်လုံးကို ထည့်သွင်း ဖန်တီးလာတာမျိုးတွေ့ရသလို နောက်ပိုင်းကျတော့ တံခါးနှစ်ပေါက် စနစ်ဖြစ်ပေမယ့် ထိုင်ခုံနေရာ ၄နေရာ ဒါမှမဟုတ် ၅နေရာစာလောက်ထိအောင် လိုက်ပါစီးနင်းနိုင်လာအောင် ထုတ်လုပ်ထားကြပါတယ်။

ကဲ ဒါကတော့ Sportကားတွေအကြောင်း အခြေခံထက် အခြေခံကျတဲ့ သမိုင်းကြောင်း၊ သတ်မှတ်ချက်နဲ့ သိသင့်တဲ့ အချက်တွေ ဖြစ်ပါတယ်။ ဒီလောက်ဆိုရင် Sportတစ်စီး မျက်စိရှေ့ရောက်လာရင်တော့ ဘေးလူတွေကို ဆရာလုပ်နိုင်လောက်ပါပြီနော်။

====================

လင်းလင်း (IA)
Tech Space