အချိန်တန်ပြီ
ပို့စ်တင်ချိန်
- 1/19/2014 03:52:00 PM
ယနေ့ ကမ္ဘာတစ်ဝန်း ၌ သိပ္ပံနှင့် နည်းပညာများ ၊ သတင်း အချက်အလက် များနှင့် ဆက်သွယ်ရေး နည်းပညာများ တိုးတက် လာမှုကြောင့် နိုင်ငံ အသီးသီး၏ လူမှုစီးပွား ဘဝသည် တစ်ရှိန်ထိုး တိုးတက် ပြောင်းလဲ လာခဲ့ ပေသည်။
ယနေ့ ကျောင်းသား လူငယ်များ သည်လည်း နောင် အနာဂတ်၏ ကြယ်ပွင့် လေးများ ဖြစ်သည်နှင့် အညီ တိုးတက် ပြောင်းလဲ လာသော ကမ္ဘာကြီးကို အမီ လိုက်နိုင် စေရန် ၊ ခေတ်မီဖွံ့ဖြိုး တိုးတက်သော နိုင်ငံတော်ကြီး တည်ဆောက် ရာတွင် တစ်ဖက် တစ်လမ်းမှ အားကိုး အားထားပြု ရမည့် အသီးအပွင့် လေးများ ၊ အသိပညာရှင် ၊ အတတ် ပညာရှင် မျိုးဆက်သစ် လေးများပင် ဖြစ်ပေသည်။
ယခုအခါ နိုင်ငံတော် အစိုးရ အနေဖြင့် ကျောင်းသား ၊ ကျောင်းသူလေး များကို ဘက်စုံ ထူးချွန်သော ကျောင်းသား လူငယ်လေးများ ဖြစ်လာစေရန် ပြုစု ပျိုးထောင် ပေးလျက် ရှိပေသည်။ ပညာထူးချွန် ထက်မြက်သည် သာမက စိတ်ဓာတ်နှင့် စည်းကမ်း ကောင်းမွန်ပြီး ကျန်းမာ ကြံ့ခိုင်သည့် သူများ ဖြစ်လာ စေရန်လည်း မျှော်မှန်း ဆောင်ရွက် ပေးလျက် ရှိသည်။
ယခုအခါ ၂ဝ၁၃ - ၂ဝ၁၄ ပညာသင်နှစ် တွင် တစ်နှစ်ပတ်လုံး ပညာသင်ကြား ခဲ့ရသည့် သင်ကြား ပြီးမြောက် ခဲ့သော ကျောင်းစာများကို ကျောင်းသား ၊ ကျောင်းသူ လေးများ အနေဖြင့် ပြန်လည် လေ့ကျင့် ကျက်မှတ် နေကြရပြီ ဖြစ်သည်။ ပျင်းရိနေ၍ မရပေ။ '' ပျင်းရိသော သူသည် အတတ်ပညာ မရနိုင်ပေ ၊ အတတ်ပညာ မရှိလျှင် ဥစ္စာပစ္စည်း မရနိုင်ပေ ၊ ဥစ္စာပစ္စည်း မရှိသူတွင် အဆွေ ခင်ပွန်းကောင်း မရနိုင်ပေ။ အဆွေ ခင်ပွန်းကောင်း မရှိသူသည် ချမ်းသာသုခ မရနိုင်ပေ။ ချမ်းသာသုခ မရှိသူသည် ကောင်းမှု ကုသိုလ် မရနိုင်ပေ ၊ ကောင်းမှု ကုသိုလ်မရှိ သူသည် နိဗ္ဗာန်ကို အဘယ်မှာ မျက်မှောက် ပြုနိုင်အံ့နည်း ''ဟု လောကနီတိ က ဆိုထားသည်။
ထို့ကြောင့် ကျောင်းသား လူငယ်လေးများ အနေဖြင့် စာမေးပွဲ ဖြေဆိုရန် အချိန် နီးကပ် နေပြီဖြစ်ရာ ကျန်းမာရေးကို ဂရုစိုက်ပြီး သင်ကြား ပြီးသော ဘာသာရပ် အလိုက် ကျက်စာ များကို ကောင်းစွာ လေ့လာ ကျက်မှတ်ပြီး တွက်စာများကို စဉ်ဆက်မပြတ် လေ့ကျင့် တွက်ချက် နေရမည့် အချိန်သို့ ရောက်ရှိ နေပြီ ဖြစ်သည်။
သို့ဖြစ်ရာ နိုင်ငံတော် အတွက် တစ်ချိန် တစ်ခါတွင် တစ်ထောင့် တစ်နေရာက အားထားရမည့် ယနေ့ ကျောင်းသား လူငယ်များ သည် ပညာပြည့်ဝ နှလုံးလှသည့် အသိ ပညာရှင် ၊ အတတ် ပညာရှင် များ ဖြစ်လာရေး အတွက် ကျောင်း သင်ခန်းစာ များကို နည်းလမ်း မှန်ကန်စွာ လေ့လာ ကျက်မှတ်ပြီး စာမေးပွဲ ဖြေဆို ကြရာတွင်လည်း စိတ်ကြည်လင် ချမ်းမြေ့စွာ ဖြေဆို နိုင်ကြစေရန် ကျန်းမာရေးကို အထူး ဂရုပြု နေထိုင်သင့် ပါကြောင်း အသိပေး ရေးသား လိုက်ရ ပေသည်။
( ၁၉-၁-၂၀၁၄ ရက် ရတနာပုံနေ့စဉ်သတင်းစာ အယ်ဒီတာ့အာဘော် )
Myawady News
