ရှမ်းနှစ်ပါတီ ပူးပေါင်းရေးအတွက် SNLD ထပ်မံ ကမ်းလှမ်းမည်

ပို့စ်တင်ချိန် - 12/08/2013 10:45:00 PM

ရန်ကုန်၊ ဒီဇင်ဘာ ၆

ရှမ်းတိုင်းရင်းသားပါတီ နှစ်ခု တစ်ပေါင်း တစ်စည်းတည်း ဖြစ်စေရန်အတွက် ရှမ်းတိုင်းရင်းသားများ တိုးတက်ရေးပါတီ (SNDP) ကို ရှမ်းအမျိုးသား ဒီမိုကရေစီ အဖွဲ့ချုပ် (SNLD) က ကမ်းလှမ်း ထားသော်လည်း အကြောင်းပြန်ခြင်း မရှိသည့်အတွက် ဒီဇင်ဘာလ အတွင်းတွင် ဒုတိယအကြိမ် ထပ်မံကမ်းလှမ်းမှု ပြုလုပ်သွားမည် ဖြစ်ကြောင်း SNLD ပါတီအတွင်းရေးမှူး ဦးစိုင်းညွန့်လွင်က ပြောကြားသည်။

အဆိုပါ ရှမ်းတိုင်းရင်းသားပါတီ နှစ်ခု ပေါင်းစည်းရေး အတွက် နိုဝင်ဘာလအတွင်း SNLD က ကြေညာချက်ထုတ်ကာ ကမ်းလှမ်း ခဲ့သော်လည်း SNDP က ယနေ့အထိ ပြန်ကြားခြင်း မရှိသေးကြောင်း ၎င်းကဆိုသည်။
“တစ်လပြည့်တဲ့အထိ မထူးခြားရင် ထပ်မံ ကမ်းလှမ်းသွားမယ်။ ပါတီ ပေါင်းဖို့အတွက် လူထုကပဲ ဆုံးဖြတ်လိမ့်မယ်” ဟု ၎င်းကဆိုသည်။

ရှမ်းတိုင်းရင်းသား နှစ်ပါတီ ပေါင်းစည်းရေးအတွက် SNDP ပါတီ၏ သုံးကြိမ်မြောက် ညီလာခံ အပြီးတွင် စတင်နိုင်မည် ဖြစ်ကြောင်း အဆိုပါ ပါတီအတွင်းရေးမှူး ဦးစိုင်းလှကျော်က ဆိုသည်။

SNLD ပါတီက ကမ်းလှမ်းလာသော ပါတီနှစ်ခု ပေါင်းစည်းရေး ကို ဆွေးနွေးရန်အတွက် နိုဝင်ဘာ ၂၅ ရက်နှင့် ၂၆ ရက်များတွင် အစည်းအဝေး ပြုလုပ်ရန် စီစဉ်ခဲ့သော်လည်း ဗဟိုကော်မတီဝင်များ ခရီးသွားလာ နေကြသောကြောင့် မဖြစ်မြောက်ခဲ့ကြောင်း SNDP ထံမှ သိရသည်။

SNLD ပါတီ ငွေရတု အခမ်းအနားအပြီး နိုဝင်ဘာ ၁၆ ရက်နေ့တွင် ပါတီနှစ်ခု ပေါင်းစည်းရေးအတွက် SNDP ကို ကြေညာချက် ထုတ်ကာ ကမ်းလှမ်းခဲ့ခြင်း ဖြစ်သည်။
The Voice Weekly