KIA ဖမ်းသွားတဲ့ ရှမ်းရွာသားများ အားလုံးပြန်လွတ်

ပို့စ်တင်ချိန် - 12/23/2013 11:16:00 AM

ဗန်းမော်ခရိုင် မန်စီမြို့နယ်မှာ အခုလဆန်းပိုင်းက ကချင်လွတ်မြောက်ရေးတပ်မတော် ကေအိုင်အေတပ်တချို့ ဖမ်းဆီးသွားခဲ့တဲ့ ဒေသခံ ရှမ်းတိုင်းရင်းသားအားလုံးကို ပြန်လွှတ်ပေးလိုက်ပြီလို့ မြစ်ကြီးနားမြို့ အခြေစိုက် ငြိမ်းချမ်းရေးအကျိုးဆောင် PCG အဖွဲ့က ဒီနေ့ပြောပါတယ်။

အဖမ်းခံထားရတဲ့ ရှမ်းတိုင်းရင်းသားတွေကို လွှတ်ပေးဖို့ ပြီးခဲ့တဲ့ သောကြာနေ့က မြစ်ကြီးနားမြို့မှာ ရှမ်းမျိုးနွယ်စုတွေ လူထုအစည်းအဝေးကျင်းပပြီး တောင်းဆိုခဲ့ကြပါတယ်။ ရှမ်းမျိုးနွယ်စု ခေါင်းဆောင်တွေက မြစ်ကြီးနားမှာရှိတဲ့ ငြိမ်းချမ်းရေး အကျိုးဆောင်အဖွဲ့ရုံးမှာ အကူအညီတောင်းခဲ့တဲ့အတွက် ကေအိုင်အိုနဲ့ ဆက်သွယ်ဆောင်ရွက်ခဲ့တာလို့ သိရပါတယ်။

အခုအခါမှာ ဖမ်းထားတဲ့ရှမ်းတိုင်းရင်းသားတွေ အားလုံးကို လွှတ်ပေးလိုက်ပြီဖြစ်ကြောင်း PCG အဖွဲ့ဝင် ဦးအင်ရှန်ဆန်းအောင်က ပြောပါတယ်။

"တပ်စုဆောင်းခဲ့တာတော့ တောက်လျှောက်ရှိမယ်၊ ရှမ်းချည်းပဲ မဟုတ်ဘူး၊ တခြားဟာတွေလည်း တောက်လျှောက်စုဆောင်းခဲ့တယ်လို့ သိရတယ်၊ ကျနော်က အားလုံးလွှတ်ပြီးပြီလို့ပဲ သိရပါတယ်၊ ၂ဝ ကျော် ပြန်လွှတ်ပေးတာပေ့ါနော်၊ အဲဒီမှာ ၄ ယောက်ကတော့ ကျနော်တို့စစ်သားပဲလုပ်ချင်ပါတယ် မပြန်ချင်ပါဘူးဆိုတယ်၊ အဲဒါမျိုးလေးတွေက ကျန်ခဲ့တာပါ၊ သူတို့ကိုယ်တိုင်ရဲ့ဆန္ဒပြီးရင် အဲဒီ ၅ဝ၊ ၆ဝ ဆိုတဲ့ဟာက ရှမ်းချည်းပဲ မဟုတ်ပါဘူး၊ ကချင်တွေရောပါနေတယ်၊ ကချင်တွေက လွတ်တဲ့အထဲမှာ မပါပါဘူး"

ဒီဇင်ဘာလ ၄ ရက်နေ့လောက်ကတည်းက မန်စီမြို့နယ် မန်ဖွကျေးရွာနဲ့ ကောင်လွင်ကျေးရွာက ဒေသခံပြည်သူ ၅၀ ကျော်ကို ကေအိုင်အေက ဖမ်းဆီးသွားတယ်လို့ ရှမ်းမျိုးနွယ်စုရေးရာအဖွဲ့နဲ့ ဒေသခံတွေက ပြောပါတယ်။

ဒီကိစ္စအတွက် ကချင်ပြည်နယ်လွှတ်တော်မှာ လွန်ခဲ့တဲ့ဒီဇင်ဘာလ ၁၉ ရက်နေ့က အရေးပေါ်အဆိုတင်ပြီး ဆွေးနွေးခဲ့ပါတယ်။ အဲဒီ လွှတ်တော်အစည်းအဝေးမှာ ကချင်ပြည်နယ်အစိုးရ နယ်စပ်လုံခြုံရေးဝန်ကြီးက အဖမ်းခံရတဲ့ ၅၀ ထဲက ၂၅ ယောက် လွတ်မြောက်လာကြောင်း ဖြေကြားတယ်လို့ သိရပါတယ်။

အဲဒီနောက် ဒီဇင်ဘာလ ၂၀ ရက်နေ့က RFA ကမေးမြန်းတဲ့အခါမှာ ကချင်တိုင်းရင်းသားတွေ အပါအဝင် ၃၂ ယောက် ပြန်လည်လွတ်မြောက်လာတယ်လို့ PCG အဖွဲ့က ပြောပါတယ်။

RFA Burmese