အစိုးရယန္တရား အတွင်း လူတစ်ထောင်လျှင် တစ်ဦးသာ အပြောင်းအလဲ လိုလားဟု ဦးစိုးသိန်းပြော

ပို့စ်တင်ချိန် - 12/02/2013 09:00:00 AM

မြန်မာနိုင်ငံတွင် ဒီမိုကရေစီပြုပြင် ပြောင်းလဲမှုများ ဆောင်ရွက်လာသည်မှာ သုံးနှစ်နီးပါး ကြာမြင့်ပြီ ဖြစ်သော်လည်း အစိုးရယန္တရား အတွင်းရှိ လူဦးရေ တစ်ထောင်လျှင် တစ်ဦးကသာ အပြောင်းအလဲ ပြုလုပ်လိုသူများ ဖြစ်ကြောင်း သမ္မတ ရုံးဝန်ကြီးဌာန ပြည်ထောင်စုဝန်ကြီး ဦးစိုးသိန်းက ပြောကြားသည်။

ရန်ကုန်တက္ကသိုလ် စိန်ရတုခန်းမ၌ နိုဝင်ဘာလ ၃၀ ရက်နေ့က ကျင်းပသည့် တည်ငြိမ်အေးချမ်းသည့် နိုင်ငံတော် တည်ဆောက်ရေးတွင် လူထုအခြေပြု အဖွဲ့အစည်းများ၏ အခန်းကဏ္ဍ ဆွေးနွေးပွဲ နိဂုံးချုပ် ဆွေးနွေးရာတွင် ၄င်းက အထက်ပါ အတိုင်း ပြောဆိုခြင်းဖြစ်သည်။

"လူဦးရေ သန်းခြောက်ဆယ်မှာ Government Sector က တစ်သန်းကျော် လေးပဲရှိတယ်။ အဲဒါမှာ ခင်ဗျားကို ကျွန်တော် ပြောမယ်။ တစ်ထောင်လောက်ပဲရှိတယ် Reform လုပ်ချင်တဲ့သူက။ ကျန်တဲ့လူ ကတော့ ဒရွတ်တိုက် လိုက်တုန်းပဲ" ဟု ဦးစိုးသိန်းက ထုတ်ဖော်ပြောဆိုသည်။

ယနေ့ဆွေးနွေးပွဲ၌ ပါဝင်ဆွေးနွေး သူများ၏ ပြောကြားချက်များကို များစွာ နားထောင်သင့်သော်လည်း ဆွေးနွေးပွဲ တက်ရောက်သူ အစိုးရယန္တရား အဖွဲ့ဝင် များနှင့် လွှတ်တော်ကိုယ်စားလှယ် များမှာ အရေအတွက် လွန်စွာ နည်းပါးကြောင်း ၄င်းက ဝေဖန်ပြောကြားသည်။

အစိုးရခေါင်းဆောင် များက အရပ်ဘက် အဖွဲ့အစည်းများ အားကောင်းရန် လိုအပ်သည်ဟု ပြောဆိုနေသော်လည်း အခြေခံပညာ ကျောင်းများ၊ တက္ကသိုလ် များ၌ ဆရာများအသင်း၊ ကျောင်းသား သမဂ္ဂစသည်ဖြင့် ဖွဲ့စည်းဆောင်ရွက်ရာတွင် အုပ်ချုပ်ရေးအာဏာပိုင် များက တားဆီး ပိတ်ပင်မှု၊ ဖမ်းဆီးအရေးယူမှုများ ရှိနေပြီး အဖွဲ့အစည်း များ၌ ပါဝင်လှုပ်ရှားသူ ဝန်ထမ်းများကို အလုပ်ထုတ်ခြင်း၊ ကျောင်းသားများကို ကျောင်းထုတ်ခြင်းများ ကြုံတွေ့နေရကြောင်း ဆွေးနွေးပွဲ တက်ရောက်သူ တက္ကသိုလ်ကျောင်းသား တစ်ဦးက ပြစ်တင်ပြောကြားသည်။

အစိုးရက ပြုလုပ်နေသည့် အပြောင်းအလဲ များကို လက်တွေ့ အကောင်အထည် ဖော်နေသူများမှာ လူထုအပါအဝင် အရပ်ဘက် အဖွဲ့အစည်းများနှင့် လိုက်လျော ညီထွေမှု မရှိဘဲ အခွင့်အာဏာ ရှိသူများကို တွေ့ဆုံရန်ပင် များစွာ ခက်ခဲနေသေးကြောင်း ဆွေးနွေးပွဲ တက်ရောက်လာသူ အချို့က ပြောဆိုသည်။

မြန်မာနိုင်ငံ၏ အပြောင်းအလဲ များတွင် လူငယ်အဖွဲ့အစည်း များနှင့် ပိုမို ပူးပေါင်းဆောင်ရွက်ရေး ကို မဖြစ်မနေ လုပ်ဆောင်သွားမည် ဖြစ်ပြီး လူထုတွေ့ဆုံပွဲ များကို နှစ်စဉ်ကျင်းပရန် အကြံပြုသည့် အတိုင်း ဆောင်ရွက်မည် ဖြစ်ကြောင်း နိုင်ငံတော်သမ္မတ ဦးသိန်းစိန်က ဆွေးနွေးပွဲတွင် ကတိပြုခဲ့သည်။

The Voice Weekly