တေးသံရှင် ကောင်းမြတ်အိမ်မှကား ခြိမ်းခြောက်လုယူခံရ၊ ယာဉ်ငါးစီးထက် မနည်း တိုက်ပြီး ချက်ချင်းပြန်မိ
ပို့စ်တင်ချိန်
- 12/27/2013 03:09:00 PM
ရန်ကုန်၊ ဒီဇင်ဘာ ၂၆
ဗဟန်းမြို့နယ် ပုလဲကွန်ဒိုဝင်းအနီး ကမ္ဘာအေး ဘုရားလမ်းမပေါ်တွင် ဒီဇင်ဘာလ ၂၆ ရက် ညနေ ၃ နာရီခန့်က တေးသံရှင် ကောင်းမြတ်၏ မိဘနှစ်ဦး စီးနင်းလာသော နစ်ဆန်း ဆလွန်ယာဉ်ကို အသက် ၂၃ နှစ်အရွယ် အမျိုးသားတစ်ဦးက ဓားပြကာ ခြိမ်းခြောက်လုယူ မောင်းနှင် ထွက်ပြေးခဲ့ရာမှ လမ်းတစ်လျှောက်တွင် အခြားသော မော်တော်ယာဉ် ငါးစီးထက်မနည်း တိုက်မိခဲ့ပြီးနောက် ယာဉ်လုယူသွားသူကို ပြန်လည် ဖမ်းမိကြောင်း ရန်ကင်းမြို့နယ် ယာဉ်ထိန်းရဲ တပ်ဖွဲ့စုမှူးရုံးနှင့် မျက်မြင် တွေ့သူများထံမှ စုံစမ်းသိရှိရသည်။
ဆလွန်းယာဉ်မှာ ကမ္ဘာအေး လမ်းမပေါ်သို့ ထွက်ရန် စောင့်ဆိုင်းနေစဉ် ယင်းလုယက်သူက အိမ်သုံးဓားဖြင့် ခြိမ်းခြောက်ကာ ယာဉ်ပေါ်တွင်ရှိနေသူ တေးသံရှင် ကောင်းမြတ်၏ မိဘနှစ်ဦးကို ဆင်းခိုင်းခဲ့ပြီး ယာဉ်ကိုလုယူကာ ရန်ကင်းမြို့နယ် စက်မှု (၁) လမ်းမှ စည်ပင်လမ်းသစ်လမ်းသို့ မောင်းနှင်သွားကြောင်း၊ ယင်းသို့ မောင်းနှင်သွားစဉ် အငှားယာဉ်နှစ်စီး အပါအဝင် ယာဉ်ငါးစီးကို တိုက်မိခဲ့ကြောင်း၊ ယင်းနောက် မော်တော်ယာဉ်ကြော ပိတ်ဆို့မှုကြောင့် ရှေ့ဆက်မောင်း၍ မရသဖြင့် နောက်သို့ ပြန်ကွေ့ရန် ကြိုးစားခဲ့ကြောင်း၊ ယာဉ်တိုက်မှု ဖြစ်ပွားရာ အနီးတွင် ထမင်းဆိုင်ဖွင့်လှစ်သူ အသက် ၃၀ ကျော်အရွယ် အမျိုးသားတစ်ဦးက ပြောကြားသည်။
ယင်းနောက် မော်တော်ယာဉ် ကွေ့မရဖြစ်ကာ ၎င်းတိုက်မိခဲ့သော မော်တော်ယာဉ် အပါအဝင် အနီးရှိ အခြား မော်တော်ယာဉ် ပိုင်ရှင်များနှင့် ပြည်သူများက ဝိုင်းဝန်းပိတ်ဆို့ခဲ့စဉ် လုယက်သူက ၎င်း၏ ရင်ဝကို ဓားဖြင့်ထောက်ကာ ငြိမ်နေပြီး မည်သည့် စကားတစ်ခွန်းမှ မပြောကြောင်း၊ ရဲများ ရောက်လာစဉ် ၎င်းကို ဖမ်းဆီးနိုင်ခဲ့ကြောင်း ၎င်းက ပြောကြားသည်။
“သူက ရှေ့က ကားကို တိုက်မိတော့ အတိုက်ခံရတဲ့ ကားက ရပ်လိုက်တယ်၊ ဒါကို သူစီးလာတဲ့ကားနဲ့ ထပ်တွန်းတယ်၊ ကားဘီးက ချော်ပြီး အင်ဂျင်မှာ မီးခိုးတွေ အများကြီး ထွက်လာပြီး သူစီးလာတဲ့ ဆလွန်းကိုတောင် မမြင်ရတော့ဘူး၊ ကားမီးလောင်မှာ ကြောက်လို့ ဘေးနားက ကားတွေပေါ်က လူတွေလည်း ဆင်းပြေးကြတယ်” ဟု ၎င်းက ပြောဆိုသည်။
အဆိုပါ ကားလုပြေးသူသည် စကားပြန်မပြောဘဲ၊ စိတ်နှင့်လူ မကပ်သကဲ့သို့ ဖြစ်ပေါ်နေခြင်းကြောင့် မူးယစ်ဆေးဝါး သုံးစွဲထားသည်ဟု ယူဆကြောင်း မျက်မြင် တွေ့ရှိသူနှင့် စစ်ဆေးသူ ရဲအရာရှိတို့က မှတ်ချက်ပြု ပြောကြားသည်။
“ကားကပတ်ပြီး ချာလည်လည်နေတာ မဟုတ်ပါဘူး၊ ကွေ့ဖို့ ကြိုးစားရင်း နှစ်လမ်းသွား လမ်းကျဉ်းထဲမှာ ရှေ့တိုး နောက်ဆုတ် ပဲ ဖြစ်တာပါ၊ သူတိုက်ခဲ့တဲ့ ကားကလူတွေကလည်း လိုက်လာကြပြီး၊ ကားကိုရပ်ဖို့၊ ကားမရပ်ရင် ရိုက်မယ်နှက်မယ်လို့ ဝိုင်းပြောပြီး ကားရပ်ပြီး ဆင်းလာဖို့ ပြောတာကို သူကလည်း ကြောင်နေတယ်” ဟု အဆိုပါ နေရာသို့ စစ်ဆေးရန် ရောက်ရှိသူ နယ်ထိန်း ရဲတပ်ဖွဲ့ဝင်တစ်ဦးက ပြောကြားသည်။
အဆိုပါ ဆလွန်းယာဉ် လုယက်သူသည် ဆရာစံရပ်ကွက် တက္ကသိုလ်ရိပ်သာ လမ်းသစ်တွင် နေထိုင်သည့် ဇော်ဆက်လွင်ဆိုသူ ဖြစ်ကြောင်း၊ ၎င်းကို ပြစ်မှုပုဒ်မ ၃၈၆ ဖြင့် အမှုဖွင့်ထားကြောင်း ရန်ကင်းမြို့နယ် ရဲစခန်းထံမှ သိရှိရသည်။
The Voice Weekly Myanmar
