ရွေးကောက်ပွဲ မတိုင်မီ ရာထူးမှ နုတ်ထွက်ရန် တောင်းဆိုချက်ကို ထိုင်းဝန်ကြီးချုပ် ပယ်ချ

ပို့စ်တင်ချိန် - 12/12/2013 09:14:00 AM

ဒီဇင်ဘာ ၁၀ ရက်တွင် ဘန်ကောက်ရှိ Army Club သို့ ရောက်ရှိလာသော ၀န်ကြီးချုပ် ယင်လက်က ထိုင်းရိုးရာပုံစံ လက်အုပ်ချီ နှုတ်ဆက်နေစဉ် (Photo:AFP)

လာမည့် ကြားဖြတ်ရွေးကောက်ပွဲ မတိုင်မီ ရာထူးမှ နုတ်ထွက်ပေးရန် အစိုးရဆန့်ကျင် ဆန္ဒပြသူများ၏ တောင်းဆိုချက်များကို ထိုင်းဝန်ကြီးချုပ် ယင်လက်ရှင်နာဝပ်က ဒီဇင်ဘာ ၁၀ ရက်တွင် ပယ်ချခဲ့ပြီး ဆန္ဒပြသူများ အနေဖြင့် "ပြည်သူ့တော်လှန်ရေး" ကို စွန့်လွှတ်ရန် တိုက်တွန်းခဲ့သည်။

အစိုးရဆန့်ကျင် ဆန္ဒပြသူ ၁၄၀၀၀၀ ၀န်းကျင်သည် မြို့တော် ဘန်ကောက်တွင် ဒီဇင်ဘာ ၉ ရက်၌ စုဝေးခဲ့ကြပြီး အစိုးရကို နုတ်ထွက်ရန် တောင်းဆိုခဲ့ကြသည်။ သို့သော် ယင်လက်က နိုင်ငံရေး မတည်ငြိမ်မှု ပြေလျော့စေရန် ကြိုးပမ်းမှုအဖြစ် ကြားဖြတ်ရွေးကောက်ပွဲကို ကျင်းပပြီး ၎င်းတို့အစိုးရက ရွေးကောက်ပွဲ ကျင်းပသည့် အချိန်အထိ အိမ်စောင့်အစိုးရအဖြစ် တာဝန်ယူမည်ဖြစ်ကြောင်း ဒီဇင်ဘာ ၉ ရက်တွင် ကြေညာခဲ့သည်။

ဆန္ဒပြသူများသည် ရွေးကောက်ပွဲ စနစ်အား အသုံးချပြီး အစိုးရသစ်ကို ရွေးချယ်သင့်ကြောင်း ယင်လက်က ဒီဇင်ဘာ ၁၀ ရက် အစောပိုင်းတွင် အစိုးရအဖွဲ့ အစည်းအဝေး အပြီး၌ ပြောကြားခဲ့သည်။ ဖေဖော်ဝါရီ ၂ ရက်တွင် ကျင်းပမည့် ရွေးကောက်ပွဲ၌ ယှဉ်ပြိုင်မည့် ကိစ္စကို ပါတီအဖွဲ့ဝင်များနှင့် ဆွေးနွေးခဲ့ခြင်း မရှိဟု ယင်လက်က ပြောကြားခဲ့သည်။

၎င်းတို့ မိသားစုကို ထိုင်းနိုင်ငံမှ ဖယ်ရှားမည်ဟု ဆန္ဒပြသူများ၏ တောင်းဆိုမှုများအား ယင်လက်က ဒေါသတကြီး တုံ့ပြန်ခဲ့ပြီး မိမိဘက်မှ တတ်နိုင်သမျှ လိုက်လျောပေးခဲ့ သကဲ့သို့ မိမိကိုလည်း မျှမျှတတ ဆက်ဆံသင့်ကြောင်း ၎င်းက ပြောကြားခဲ့သည်။

သက်ဆင် မဟာမိတ် အစိုးရကို အင်အားသုံးပြီး ရာထူးမှ နုတ်ထွက်ရန် ကြိုးပမ်းပါက ထိုင်းတွင် နိုင်ငံရေး အကြမ်းဖက်မှု တစ်ကျော့ပြန် ဖြစ်လာနိုင်ကြောင်း လေ့လာသူများက သုံးသပ်ခဲ့ကြသည်။ ယင်လက်၏ အာဏာရ ဖြူထိုင်းပါတီသည် လာမည့်ရွေးကောက်ပွဲတွင်လည်း သက်ဆင်၏ သြဇာလွှမ်းမိုးမှုကြောင့် အနိုင်ရမည်ဟု ကျယ်ကျယ်ပြန့်ပြန့် ခန့်မှန်းထားကြသည်။ အတိုက်အခံ ဒီမိုကရက် ပါတီက ကြားဖြတ်ရွေးကောက်ပွဲတွင် ယှဉ်ပြိုင်၊ မပြိုင် ကိစ္စကို မဆုံးဖြတ်ရသေးဟု ဒီဇင်ဘာ ၉ ရက်တွင် ပါတီတာဝန် ရှိသူများက ပြောကြားခဲ့သည်။

ဖမ်းဝရမ်း ထုတ်ခံထားရသော ဆန္ဒပြခေါင်းဆောင် ဆူသက်သောင် ဆူဘန်က ရွေးကောက်ပွဲ ကျင်းပမည့် အစီအစဉ်ကို ပယ်ချခဲ့သည်။ စင်ပြိုင်အစိုးရ ထူထောင်ပြီး အခြေခံ ဥပဒေသစ် ရေးဆွဲသွားမည်ဟု ၎င်းကပြောကြားခဲ့သည်။ ယင်လက်နှင့် သူ၏အဖွဲ့ဝင်များ အိမ်စောင့်အစိုးရမှ နုတ်ထွက်ရန် ဆူသက်က ဒီဇင်ဘာ ၉ ရက်ညတွင် ရာဇသံ ပေးခဲ့သည်။

Ref:AFP
Myawady News