လားရှိုးတွင် အပြည်ပြည်ဆိုင်ရာ ကမ္ဘောဇအာမခံလုပ်ငန်းရုံးဖွင့်လှစ်
ပို့စ်တင်ချိန်
- 12/31/2013 07:33:00 PM
လားရှိုး၊ ဒီဇင်ဘာ ၃၀။
ရှမ်းပြည်နယ်မြောက်ပိုင်း လားရှိုးမြို့တွင် အပြည်ပြည်ဆိုင်ရာ ကမ္ဘောဇအာမခံလုပ်ငန်း (IKBZ) ရှမ်းပြည်နယ်မြောက်ပိုင်း ရုံးချုပ်ကို ဘဏ္ဍရေးဝန်ကြီးဌာန ဒုတိယ၀န်ကြီး အာမခံလုပ်ငန်းကြီးကြပ်ရေးအဖွဲ့ဥက္ကဋ္ဌ ဒေါက်တာမောင်မောင်သိန်းမှ ဒီဇင်ဘာ ၃၀တွင် ဖွင့်လှစ်ခဲ့သည်။
ဖွင့်ပွဲအခမ်းအနားတွင်“ကျွန်တော်တို့ ကုမ္ပဏီရဲ့အဓိက၀င်ငွေကတော့ ကျောက်စိမ်းနဲ့ ကျောက်မျက်ရတနာ ရှာဖွေတူးဖေါ်ရေး လုပ်ငန်းပဲ ဖြစ်ပါတယ်။ ရှာဖွေတူးဖေါ်ရတဲ့ကျောက်မျက်ရတနာတွေကိုတော့ နိုင်ငံတော်ကကျင်းပတဲ့ ကျောက်မျက်ရတနာပြပွဲတွေမှာပြသပြီး အများရှေ့မှာပဲဈေးပြိုင်စနစ်နဲ့ ရောင်းချပါတယ်၊ ရောင်းရငွေတွေကိုတော့ သက်ဆိုင်ရာအခွန်အခတွေပေးချေပြီးတော့ နိုင်ငံပိုင်နဲ့နိုင်ငံခြားပိုင် ဘဏ်တွေမှာအပ်နှံထားပြီး စီးပွားရေး လုပ်ငန်းကြီးတွေကို ဆောင်ရွက်ထားပါတယ်။ တကယ်တော့အာမခံလုပ်ငန်းဆိုတာပြည်သူတွေရဲ့ အသက်၊ အိုးအိမ်နဲ့ဥစ္စာပစ္စည်းအရပ်ရပ်တွေရဲ့ ဆုံးရှံးမှုကို အစားထိုး ကာကွယ်ပေးတဲ့ လုပ်ငန်းပါ၊ပြည်သူများရဲ့ အသက်နဲ့ သဘာဝဘေးအန္တရာယ်များကြောင့် ပျက်စီးဆုံးရှံးခဲ့ရင်တောင်မှ ပြန်ပြီး အစားထိုးတည်ဆောက်မှုနဲ့ စီးပွားရေး အဆောက်အအုံ ကုန်ပစ္စည်းများဆုံးရှံးခဲ့ရင် ပြန်ဖြည့်ဆည်းတည်ဆောက်နိုင်ရေးအတွက် အနည်းငယ်သော အာမခံပရီမီယံကို ပေးဆောင်ခြင်းဖြင့် ကာကွယ်ပေးသွားမှာဖြစ်လို့ အာမခံလုပ်ငန်းကိုလုပ်ဆောင်ရခြင်းဖြစ်ပါတယ်”ဟု ဒေါက်တာမောင်မောင်သိန်းကပြောသည်။
ပြည်သူ့အခြေခံဝန်ဆောင်မှုလုပ်ငန်းများကို ဆောင်ရွက်လျက်ရှိရာမှ ယနေ့ခေတ်နိုင်ငံတော်အစိုးရသစ်ကနေ နိုင်ငံတော်ကြီးပွား တိုးတက်ရေးနှင့် ပြည်သူများ၏ အသက်အိုအိမ်စည်းစိမ်များ ကာကွယ်ရေးအတွက် အရေးကြီးလှသည့် အာမခံလုပ်ငန်းရပ်ကို ပုဂ္ဂလိကကဏ္ဍတွင် ပါဝင်ဆောင်ရွက်ရန် အတွက် ယခင်နှစ်က စတင်ခဲ့ကြောင်း ဆက်လက် ပြောသည်။
“ဒီလိုအာမခံလုပ်ငန်းဆိုတာ လုပ်သင့်တာကြာပြီ၊ ကျွန်တော်အရမ်း သဘောကျတယ်၊ဘာလို့လဲဆိုရင် အရင်ကလူတစ်ယောက်ပေါ့ဗျာ တစုံတခုဖြစ်ပြီဆိုရင် ဘာတခုမှရပိုင်ခွင့်မရှိခဲ့ဘူး ထိခိုက်တာလဲမရ ဆိုင်ကယ်ကား တစ်ခုခုနဲ့ တိုက်မိရင်လည်း ဘာကြေးမှမရဘူး၊ အခုလိုအာမခံလုပ်ငန်းတွေရှိတော့ လူအသက်အာမခံယာဉ်၊ ရေ၊မီး၊သဘာဝဘေးအန္တရာယ်အားလုံးကိုပေါ့နော် အာမခံထားခြင်းအာဖြင့် တခုခုနဲ့ ကြုံခဲ့ရင်တောင် အာမခံကြေးရှိတော့ နေထိုင်လုပ်ကိုင်စားသောက်ရတာ ပေါ့ပါးတာပေါ့ဗျာ”ဟု တပ်ထွက်အငြိမ်းစားတစ်ဦးကပြောသည်။
စိုးမင်းနိုင်
The Myanma Age
