အမျိုးသားပြန်လည်သင့်မြတ်ရေးကို အမှန်တကယ် ရှေ့ရှုစဉ်းစားလုပ်ဆောင်တယ်ဆိုရင် တပ်မတော်ထောက်လှမ်းရေးများအားလုံးကိုလည်း ပြန်လွှတ်ပေးစေချင် ...
ပို့စ်တင်ချိန်
- 12/15/2013 01:54:00 PM
“တပ်မတော်ထောက်လှမ်းရေးများ နိုင်/ကျဉ်းစာရင်းတွင် ထည့်သွင်းမည်မဟုတ်” ဆိုတဲ့ သတင်းတပုဒ် မနေ့က Mizzima မှာ ဖတ်လိုက်ရတဲ့အပေါ် ကျနော့်စိတ်ထဲ ရိုးသားစွာ ဘ၀င်မကျဖြစ်မိပါတယ်။ နိုင်/ကျဉ်းစိစစ်ရေးကော်မတီ အဖွဲ့ဝင်တဦးကတော့ “သူတို့ ထောင်ကျတာက အာဏာပြိုင်မှုပုဒ်မတွေ၊ အဂတိတိုက်ဖျက်ရေးပုဒ်မတွေနဲ့ ကျကြတာ” မို့ မစဉ်းစားကြောင်း ပြောပါတယ်။
ကျနော့်တဦးတည်းအမြင်အရ ဦးသိန်းစိန်အစိုးရမင်းတွေနဲ့ နိုင်/ကျဉ်းစိစစ်ရေးကော်မတီအဖွဲ့ဝင်တွေကို အကြံပြုလိုတာကတော့ အမျိုးသားပြန်လည်သင့်မြတ်ရေးကို (အမှန်တကယ်) ရှေ့ရှုစဉ်းစားလုပ်ဆောင်တယ်ဆိုရင် ဦးခင်ညွန့်ရဲ့တပ်မတော်ထောက်လှမ်းရေးတွေကို နိုင်/ကျဉ်းအဖြစ် မသတ်မှတ်ရင်တောင် ထောင်ကနေ ပြန်လွှတ်ပေးဖို့ စဉ်းစားသင့်တယ်လို့ အကြံပြုချင်ပါတယ်။
ဒီလိုအကြံပြုလို့ ဖွဘုတ်မိတ်ဆွေတွေက ကျနော့်ကို “ခင်ဗျားက ဦးခင်ညွန့်နဲ့ သူ့ရဲ့စစ်ထောက်လှမ်းရေးတွေ နှိပ်စက်တာ ကိုယ်တိုင်မှ မခံရတာပဲ။ ခံခဲ့ရတဲ့ နိုင်/ကျဉ်းတွေအပေါ် ဘယ်ကိုယ်ချင်းစာနိုင်မလဲ” လို့ မေးခွန်းထုတ်ချင်ကြလိမ့်မယ် ထင်ပါတယ်။
ဟုတ်ပါတယ်၊ ကျနော်ကိုယ်တိုင်တော့ ဦးခင်ညွန့်နဲ့ သူ့ရဲ့စစ်ထောက်လှမ်းရေးတွေ နှိပ်စက်တာ မခံခဲ့ရဖူးပါဘူး။ ဒါပေမယ့် အဲဒီအချိန်က မန္တလေးဆေးကျောင်းတက်နေတဲ့ ကျနော့်ညီအရင်း(နို့ညှာ)တယောက်တော့ ဦးခင်ညွန့်ရဲ့စစ်ထောက်လှမ်းရေးတွေ နှိပ်စက်လို့ အပြစ်မရှိဘဲ ထောင် ၇ နှစ်ချခံရပြီး မန္တလေး အိုးဘိုထောင်နဲ့ မြင်းခြံထောင်တွေမှာ ၄ နှစ်ကျော်နေခဲ့ရပါတယ်။ သူ ထောင်ကျတော့ ကျနော်လည်း ရန်ကုန်ကနေ မန္တလေးနဲ့ မြင်းခြံအထိ ထောင်ဝင်စာ အကြိမ်ကြိမ် သွားတွေ့ရတဲ့ အလုပ်ပျက်အကိုင်ပျက်ဒုက္ခတွေကို အလီလီ ကြုံတွေ့ခဲ့ရသူမို့ ဦးခင်ညွန့်ရဲ့စစ်ထောက်လှမ်းရေးတွေ နှိပ်စက်တဲ့ဒဏ်ကို သွယ်ဝိုက်တဲ့နည်းနဲ့ ခံစားခဲ့ဖူးသူလို့တော့ ဆိုနိုင်ပါတယ်။
မည်သို့ပင်ဆိုစေ ကျနော့်တဦးတည်းအမြင်ကတော့ အဲဒီအချိန်က “တူ” နေရာကနေ နိုင်/ကျဉ်းတွေကို နှိပ်စက်ခဲ့ကြတဲ့ ဦးခင်ညွန့်နဲ့ သူ့ရဲ့စစ်ထောက်လှမ်းရေးတွေရော “ပေ” အဖြစ် ညှဉ်းပန်းနှိပ်စက်မှုတွေ ခံစားခဲ့ကြရတဲ့ နိုင်/ကျဉ်းတွေအားလုံးရော စစ်အာဏာရှင်စနစ်ဆိုးရဲ့ သားကောင်တွေလို့ပဲ မြင်မိပါတယ်။
တနည်းအားဖြင့်ဆိုရရင် မြန်မာပြည်သူတွေ ကံဆိုးမိုးမှောင်ကျခဲ့ကြတဲ့ စစ်အာဏာရှင်စနစ်ဆိုးကြီး (ရင်နင့်ကြေကွဲဖွယ်ရာပြဇာတ်ကြီး) ထဲမှာ ဦးခင်ညွန့်နဲ့ သူ့ရဲ့စစ်ထောက်လှမ်းရေးတွေက “တူ” နေရာကနေ ကပြအသုံးတော်ခံခဲ့ရပြီး နိုင်/ကျဉ်းတွေအားလုံးက “ပေ” နေရာကနေ ကပြအသုံးတော်ခံခဲ့ရသူတွေလို့လည်း ပြဇာတ်ဆန်ဆန် ရှုမြင်မိပါတယ်။
ဒါပေမယ့် အခုအချိန်မှာ အမျိုးသားပြန်လည်သင့်မြတ်ရေးကို အမှန်တကယ် အလေးထား စဉ်းစားပြီဆိုရင်တော့ နစ်နာခဲ့မှုတွေ၊ နာကြည်းချက်တွေကို မေ့ဖျောက်ပြီး စစ်အာဏာရှင်စနစ်ဆိုးရဲ့ သားကောင်တွေဖြစ်ခဲ့ကြတဲ့ ဦးခင်ညွန့်ရဲ့စစ်ထောက်လှမ်းရေး(တူ)တွေအားလုံးရော၊ နိုင်/ကျဉ်း(ပေ)တွေအားလုံးကိုပါ စနစ်ဆိုးထဲကနေ အတူတကွ လွတ်မြောက်စေလိုတဲ့အနေနဲ့ ထောင်ကနေ အကုန်လွှတ်ပေးဖို့ လေးစားစွာ အကြံပြုလိုက်ရပါတယ်။
ဦးခင်ညွန့်အပါအ၀င် ပြန်လွတ်လာမယ့် ထောက်လှမ်းရေးအားလုံးကလည်း အမျိုးသားပြန်လည်သင့်မြတ်ရေးကို တန်းဖိုးထားလေးစားတဲ့အနေနဲ့ ဆရာကြီးဦးဝင်းတင် ပြောခဲ့သလို သူတို့ကြောင့် ဒုက္ခအဖုံဖုံ ခံစားခဲ့ကြရတဲ့ နိုင်/ကျဉ်းတွေ၊ ဘ၀ပျက်ခဲ့ရတဲ့ ပြည်သူတွေကို ၀န်ချတောင်းပန်ဖို့နဲ့ အမှားကျူးလွန်ခဲ့တဲ့ သူတို့ကိုယ်သူတို့လည်း တောင်းပန်ဖို့ လိုမယ်လို့ အကြံပြုချင်ပါတယ်။
(နိုင်/ကျဉ်းစိစစ်ရေးကော်မတီအဖွဲ့ဝင်တဦး ပြောတဲ့ “သူတို့ ထောင်ကျတာက အာဏာပြိုင်မှုပုဒ်မတွေ၊ အဂတိတိုက်ဖျက်ရေးပုဒ်မတွေနဲ့ ကျကြတာ” ဆိုတဲ့ အကြောင်းပြချက်ကတော့ အဲဒီခေတ်က လူတယောက်ကို ထောင်ချချင်ပြီဆိုရင် ဂျပိုးကို လိပ်ဖြစ်အောင် အမှုဆင်ခဲ့တဲ့ခေတ်ဖြစ်တာရယ်၊ အခေါင်အချုပ်ဖြစ်တဲ့ ဦးခင်ညွန့်ကိုတောင် အကျယ်ချုပ်ကနေ ပြန်လွှတ်ပေးထားပြီမို့ လျှော့ပေါ့စဉ်းစားလို့ ရမယ်ထင်ပါတယ်။)
အားလုံးသို့လေးစားစွာဖြင့် ...
drlunswe
