အထည်ချုပ် ကျွမ်းကျင်လုပ်သားရှားပါးမှုပြဿနာ ပိုဆိုးလာ

ပို့စ်တင်ချိန် - 12/31/2013 04:58:00 PM

ဒီဇင်ဘာ ၃၁ ရက်၊ အင်္ဂါနေ့၊ ၂၀၁၃ ခုနှစ်

ပြည်တွင်းအထည်ချုပ်လုပ်ငန်းများတွင် ကျွမ်းကျင်လုပ်သားရှားပါးမှုပြဿနာသည် ပိုမိုဆိုးရွားလာနေ ကြောင်း အထည်ချုပ်လုပ်ငန်းရှင်များက မဇ္ဈိမသို့ပြောကြားသည်။

အမေရိကန်နှင့် EU တို့က မြန်မာနိုင်ငံအပေါ် စီးပွားရေးပိတ်ဆို့မှုများ ဖြေလျှော့ပေးလာပြီးနောက်ပိုင်း တွင် မြန်မာနိုင်ငံသို့ လက်ခစားအဆင့် (CMP) အထည်ချုပ်လုပ်ငန်းများ ၀င်ရောက်ရင်းနှီးမြှုပ်နှံမှုများပြားလာခြင်းကြောင့် ရှိရင်းစွဲကျွမ်းကျင်လုပ်သားများအနေဖြင့် လုပ်ငန်းသစ်များသို့ ရွှေ့ပြောင်းလုပ်ကိုင်မှုများ ပြားလာရာ အထက်ပါအကျပ်အတည်းအား ပိုမိုရင်ဆိုင်လာနေရခြင်းဖြစ်ကြောင်း ယင်းတို့က ဆက်လက် ပြောကြားသည်။

အထည်ချုပ်လုပ်ငန်းရှင်များအသင်း ဥက္ကဋ္ဌ ဦးမြင့်စိုးက “လုပ်ငန်းအတွက် ကျွမ်းကျင်လုပ်သားကတော့ မရတော့ဘူး။ အသစ်တွေကိုပဲ သင်တန်းပေးနေရတယ်။ အထည်ချုပ်သင်တန်းကျောင်းက ထုတ်ပေးတာတွေကို အဖွဲ့ဝင်အထည်ချုပ်စက်ရုံတွေက သင်တန်းဆင်းရင် လာယူပြီး ခေါ်သွားတယ်။ ကိုယ်ပိုင် (အထည်ချုပ်စက်ရုံတစ်ရုံချင်း) လည်းသင်ပေးကြတယ်” ဟု မဇ္ဈိမသို့ ပြောကြားသည်။

မြန်မာနိုင်ငံတွင် ဂျပန်ပြည်ပကုန်သွယ်ရေးအဖွဲ့အစည်း (JETRO) ၏ ပံ့ပိုးမှုဖြင့် ၂၀၀၉ ခုနှစ်မှစတင်ကာ အထည်ချုပ်သင်တန်းကျောင်းဖွင့်လှစ်ကာ ပြည်တွင်းလုပ်ငန်းများအတွက် လုပ်သားများ မွေးထုတ်ပေး လျက်ရှိသော်လည်း ကျယ်ပြန့်လာသည့်ဈေးကွက်အတွက် လုံလောက်သည့်ပမာဏ မဟုတ်သေး ကြောင်း အဆိုပါလုပ်ငန်းရှင်အသိုင်းအ၀ိုင်းက ဆိုသည်။

ဦးမြင့်စိုးက “အဲ့ဒီ(သင်တန်းကျောင်း)မှာလာသင်တဲ့ ကလေးတွေကတော့ တတ်လည်းတတ်တယ်။ အလုပ်အကိုင်အခွင့်အလမ်းလည်း တန်းရတယ်။ သင်တန်းပြီးတော့မယ်ဟေ့ဆိုရင် စက်ရုံအသီးသီးက လာပြီးခေါ်သွားတယ်။ သူတို့ဟာသူတို့ သဘောတူညီချက်တွေနဲ့ ယူသွားကြတယ်” ဟု ဆက်လက်ပြော ကြားသည်။

မြန်မာနိုင်ငံ၏ အထည်ချုပ်လုပ်ငန်း နယ်ပယ်တွင် ၂၀၁၂ ခုနှစ် အောက်တိုဘာလကုန်အထိ လုပ်သားဦး ရေ တစ်သိန်းကိုးထောင်ကျော်ရှိရာမှ စီးပွားရေးပိတ်ဆို့မှုများဖြေလျှော့ပေးလာမှု နောက်ပိုင်းတွင် စက်ရုံ အသစ်များ တိုးပွားလာမှုကြောင့် လက်ရှိအချိန်တွင် လုပ်သားအင်အား နှစ်သိန်းခွဲခန့်ရှိလာပြီဖြစ်ကြောင်း အထည်ချုပ်လုပ်ငန်းရှင်များအသင်း၏ စာရင်းများအရသိရသည်။

မြန်မာနိုင်ငံတွင် အထည်ချုပ်လုပ်ငန်းများကို ၁၉၉၀ ခုနှစ်တွင် ဆီးဂဲနှင့်ဒေ၀ူးတို့က အစိုးရနှင့်ဖက်စပ် CMP လုပ်ငန်းများအနေဖြင့် စတင်ခဲ့ခြင်းဖြစ်ကာ ၁၉၉၉ ခုနှစ်တွင် စက်ရုံပေါင်း ၂၉၁ ရုံအထိ တိုးပွား လာကာ လုပ်ငန်းအရှိန်မြင့်တက်ခဲ့ပြီး ၂၀၀၀နှင့် ၂၀၀၁ခုနှစ်များတွင် အမေရိကန်နှင့် EU ဈေးကွက်တို့ အထိ တင်ပို့နိုင်ကာ အထည်ချုပ်လုပ်ငန်းကဏ္ဍ အအောင်မြင်ဆုံးကာလဖြစ်ခဲ့သည်။

သို့ရာတွင် ၂၀၀၃ ခုနှစ်မှစတင်ကာ စီးပွားရေးပိတ်ဆို့မှုများကြောင့် အထည်ချုပ်လုပ်ငန်းကဏ္ဍပြန်လည် ကျဆင်းသွားခဲ့ပြီး ၂၀၀၅ ခုနှစ်အတွင်း အဆိုးရွားဆုံး အခြေအနေကို ရင်ဆိုင်ခဲ့ရသော်လည်း ၂၀၀၇ ခုနှစ်တွင် တောင်ကိုရီးယားနှင့် ဂျပန်သို့တင်ပို့နိုင်မှုကြောင့် ပြန်လည်ရပ်တည်နိုင်ခဲ့ကာ ၂၀၁၂ ခုနှစ် အောက်တိုဘာအထိ ရန်ကုန်တိုင်းအတွင်း CMP လုပ်ငန်းစက်ရုံပေါင်း ၁၄၆ ရုံ၊ CMP လုပ်ငန်း တစ်ဆင့် ခံစက်ရုံ - ၃၅ ရုံ၊ စုစုပေါင်း ၁၈၁ ရုံရှိကြောင်း အထည်ချုပ်လုပ်ငန်းရှင်အသင်း၏ စာရင်းများအရသိရ သည်။

အထည်ချုပ်လုပ်ငန်းကဏ္ဍမှ ၂၀၀၉ -၁၀ ဘဏ္ဍာနှစ်တွင် အမေရိကန်ဒေါ်လာသန်း ၂၈၀ ကျော်ရရှိခဲ့ပြီး ၂၀၁၀-၁၁ ဘဏ္ဍာနှစ်( ဇန်န၀ါရီလအထိ) တွင် ပြည်ပ၀င်ငွေ အမေရိကန်ဒေါ်လာသန်း ၂၉၀ ခန့်ရှိခဲ့ကြောင်း တစ်နှစ်လျှင် ဒေါ်လာသန်း ၃၀၀ ခန့်ရှာဖွေပေးနိုင်သော လုပ်ငန်းဖြစ်ကြောင်း အထည်ချုပ်လုပ် ငန်းရှင်အသင်း၏ စာရင်းများတွင် ဖော်ပြထားသည်။

ရဲလင်းထွဋ်
Mizzima Burmese