ရန်ကုန်တွင် ကျူးကျော်အလုံးအရင်း တိုးပွားမှု အရေးယူတော့မည်
ပို့စ်တင်ချိန်
- 12/31/2013 05:10:00 PM
ရန်ကုန်တိုင်းဒေသကြီး လှိုင်သာယာ မြို့နယ်နှင့် တွံတေးမြို့နယ် တို့တွင် ကျူးကျော် အိမ်ခြေများ အလုံးအရင်း တိုးပွားနေမှုကို ဥပဒေနှင့်အညီ အရေးယူနိုင်ရန် တိုင်းဒေသကြီး အစိုးရအဖွဲ့က စီစဉ်လျက်ရှိကြောင်း ရန်ကုန်တိုင်းဒေသကြီး အစိုးရအဖွဲ့ ထံမှ စုံစမ်းသိရှိရသည်။
အဆိုပါ ကျူးကျော်အိမ်ခြေ တည်ဆောက်မှု ပြဿနာများကို သေချာစွာ စိစစ်နေသောကြောင့် အရေးယူမည့် အချိန်ကာလ ကိုမူ လတ်တလောတွင် ပြောကြားနိုင်ခြင်း မရှိကြောင်း အဆိုပါ အစိုးရအဖွဲ့မှ တာဝန်ရှိသူတစ်ဦးက The Voice သို့ ပြောကြားသည်။
"သူတို့ (ကျူးကျော်နေထိုင်သူများ) ကို မြေကွက်တွေ ချထားပေးမယ် ဆိုတဲ့ သတင်းတွေက လျှောက်ပြောနေတာပါ၊ သက်ဆိုင်ရာ ဥပဒေတွေနဲ့ အရေးယူမှာပါ" ဟု ၄င်းကဆိုသည်။
ပန်းလှိုင်မြစ်ကမ်း ပေါ်တွင် နေထိုင်သူများမှာ လှိုင်သာယာမြို့နယ်တွင် နေထိုင်သူများ ဖြစ်ပြီး သက်ဆိုင်ရာ အာဏာပိုင်များက ၄င်းတို့၏ နေအိမ်များကို ဒီဇင်ဘာလ ၂ ရက်နေ့ နောက်ဆုံးထားကာ ဖျက်သိမ်း ပြောင်းရွှေ့ပေးရန် စာဖြင့် ညွှန်ကြားထားသဖြင့် နေစရာမြေ မရှိခြင်းကြောင့် ယခုကဲ့သို့ ဝင်ရောက်ကာ တောများခုတ်ထွင် ရှင်းလင်း၍ နေထိုင်ရန် တဲများဆောက်လုပ်ခြင်း ဖြစ်ကြောင်း အိုးအိမ်မဲ့ တည်ဆောက်ရေး ခေါင်းဆောင် ဦးကျော်ထက်နိုင်က ပြော ကြားသည်။
လှိုင်သာယာ-တွံတေး ကားလမ်း ဝဲယာ တစ်လျှောက်တွင် အစိုးရက မြေကွက်များ ချထားပေးမည် ဆိုသော သတင်းများ ဒီဇင်ဘာ လဆန်းပိုင်းက ထွက်ပေါ်လာ ပြီးနောက် ယင်းနေရာများတွင် မြေကွက်များကို ဦးယူ နေကြပြီး ပန်းလှိုင်မြစ်ကူး တံတားအနီး ပန်းလှိုင်မြစ်ကမ်း တစ်လျှောက်ရှိ မြေနုကျွန်းများ၊ ဥယျာဉ်ခြံများ တွင်လည်း “ဆင်းရဲဒုက္ခ ရောက်နေသည့် အိုးမဲ့အိမ်မဲ့ ပြည်သူများ သောင်ထွန်းမြေနုကျွန်း ပေါ်တွင် ခေတ္တယာယီ တဲထိုး နေထိုင်ရာဒေသ” ဟူ၍ ဗီနိုင်းပိုစတာများ စိုက်ထူကာ အဆောက်အအုံများ ထောင်နှင့်ချီကာ ဆောက်လုပ်လျက်ပြီး ယင်းတို့အထဲတွင် သာသနာ့ အဆောက်အအုံ တစ်ခုလည်း ပါဝင်သည်။
"သူတို့က ဒီမှာ မင်းမဲ့စရိုက် ဆန်ဆန်ပဲ၊ အုပ်ချုပ်ရေးမှူးတွေ၊ ရဲတွေလည်း ဒီအတိုင်း ကြည့်နေရတယ်။ ဒီမှာရှိတဲ့မြေကွက် လပ်မှန်သမျှ သူတို့ကလွဲပြီး တခြားလူ မဦးရဘူး။ တဲထိုးပြီးရင် တခြားလူကို ပြန်ရောင်း စားတယ်" ဟု တွံတေးမြို့နယ် ခလောက်ချိုက် ကျေးရွာအုပ်စုတွင် နေထိုင်သူ အသက် ၃၀ ကျော်အရွယ် အမျိုးသမီး တစ်ဦးက ဆိုသည်။
ယင်းအပြင် လှိုင်သာမြို့နယ်၊ စက်မှုဇုန် အချို့ရှိ ပိုင်ရှင်ရှိ မြေကွက်များ ပေါ်တွင်လည်း လူအုပ်စု အလုံးအရင်းဖြင့် နေအိမ်၊ အဆောက် အအုံများ ဝင်ရောက်ဆောက်လုပ်ခြင်းများ ရှိနေပြီး ဒေသခံ ကျေးရွာသားများနှင့်လည်း မကြာခဏ ပဋိပက္ခများ ဖြစ်ပွားကြောင်း ဒေသခံများထံမှ စုံစမ်းသိရှိရသည်။
ပန်းလှိုင် မြစ်ကူးတံတား အနီးတွင် ခလောက်ချိုက် ကျေးရွာအုပ်စု၊ ပဒံရေကျော် ကျေးရွာတွင် ဒီဇင်ဘာလ ၄ ရက်နေ့နှင့် ဒီဇင်ဘာ ၂၈ ရက်နေ့များက လည်းကောင်း၊ လှိုင်သာယာမြို့နယ် ရွှေလင်ပန်းကျေးရွာတွင် ဒီဇင်ဘာလ ၂၇ ရက်နေ့နှင့် ၂၈ ရက်နေ့ များတွင်လည်းကောင်း ကျူးကျော် ဝင်ရောက်သူတို့နှင့် ဒေသခံကျေးရွာသား များအကြား ပဋိပက္ခများ ဖြစ်ပွားခဲ့သည်။
The Voice Weekly Myanmar
