သံချောင်း (ခေါ်) စ၀်ခွန်ကျော်အား RCSS ၏ ထောက်ခံချက်ဖြင့် နိုင်/စစ် ကော်မတီမှ စစ်ဆေးနေပြီး ပါဂျောင် လူသတ်မှုကို CID က စတင်စစ်ဆေး

ပို့စ်တင်ချိန် - 11/23/2013 09:55:00 AM

သာယာဝတီ အကျဉ်းထောင်အတွင်း အကျဉ်းကျခံနေရသည့် သံချောင်း (ခေါ်) စ၀်ခွန်ကျော်အား ၎င်း၏ မိခင်အဖွဲ့အစည်းဖြစ်သည့် RCSS ၏ ထောက်ခံချက်ဖြင့် နိုင်ငံရေး အကျဉ်းသားများ စိစစ်ရေး ကော်မတီမှ စစ်ဆေးနေသော်လည်း တစ်ပြိုင်နက်တည်း မြန်မာပြည် မြောက်ပိုင်း ပါဂျောင်ဒေသတွင် ဖြစ်ပွားခဲ့သည့် လူသတ်မှုနှင့် ပတ်သက်ပြီး သံချောင်းအား သာယာဝတီ ထောင်အတွင်း CID တပ်ဖွဲ့က လွန်ခဲ့သည့် နှစ်လခန့်က စစ်ဆေးခဲ့ပြီး သက်ဆိုင်သူများကိုလည်း ထပ်မံမေးမြန်း စုံစမ်းနေကြောင်း မေးမြန်းခံရသူများထံမှ သိရသည်။

မေးမြန်းစုံစမ်း ခံခဲ့ရသည့် မြောက်ပိုင်းမှ ပြန်လည် ရောက်ရှိလာသော ကိုသိန်းထွန်းက ''CID ရုံးမှာပဲ ကျွန်တော်တို့ အဖွဲ့တွေကို အမှုအသွားအလာကို မေးတာပါ။ ဖြစ်ခဲ့တဲ့ ဖြစ်စဉ်တွေကိုပေါ့နော်။ ဥပဒေ လမ်းကြောင်းအရ ဘယ်လောက် အရေးယူနိုင်မလဲ ဆိုတာကို စောင့်ကြည့်နေပါတယ်။ သူတို့က ရာဇ၀တ်မှုကို ကျူးလွန်ခဲ့တာပါ။ သူတို့ ကျူးလွန်ခဲ့တဲ့အတိုင်း အရေးယူ စေချင်ပါတယ်။ ကိုထွန်းအောင်ကျော် အမေကလည်း တိုင်ချက်ဖွင့်ထားတယ်။ တချို့က သမ္မတဆီကို စာတင်ထားတယ်။ အခုလည်း သမ္မတရဲ့ ညွှန်ကြားချက်အရ လာရောက် မေးမြန်းတဲ့အကြောင်း သူတို့ကပြောတယ်။ နောက်ထပ်လည်း ကျွန်တော်တို့ မြောက်ပိုင်းပြန်တွေ စုပြီးစာထပ်တင်ဖို့ ရှိပါတယ်။ အရေးယူမှု အနေနဲ့ကတော့ ကျွန်တော်တို့ ထင်သလောက် မပေါက်ဘူး ဖြစ်နေပါတယ်။ ကျွန်တော်တို့ အနေနဲ့ အဲဒီတုန်းက ရိုက်ကူးထားတဲ့ ဗီဒီယို အခွေတွေလည်း ရှိနေပါတယ်။ သက်သေခံ အမျိုးမျိုးလည်း ရှိနေတယ်။ ဒါပေမဲ့ သူတို့ဘက်က ဘယ်လိုယူဆလို့လဲတော့ မသိဘူး။ အမှုက ကြန့်ကြာနေသလို ဖြစ်နေတယ်'' ဟု ကိုသိန်းထွန်းက ပြောကြားသည်။

ထိုအမှုတွင် ကိုယ်တိုင်ကြုံတွေ့ခဲ့သူ ဦးညီညီကျော်က မျက်မြင်သက်သေ ဖြစ်နိုင်သူများကို မေးမြန်းစုံစမ်း ခဲ့ခြင်းဖြစ်ပြီး အဖြစ်အပျက် မှန်ကန်ကြောင်း လာရောက်မေးမြန်း ခဲ့ခြင်းဖြစ်ပြီး ၎င်းက ဆက်လက်၍ ''ဒီကိစ္စဟာ သာမန်လူသတ်မှုတစ်ခု မဟုတ်ပါဘူး။ သမိုင်းဖြတ်သန်းမှုမှာ အရေးကြီးတဲ့ ဖြစ်စဉ်တစ်ခုပါပဲ။ ဒီနေ့ ဒီမိုကရေစီ အပြောင်းအလဲမှာရော၊ ငြိမ်းချမ်းရေး ကိစ္စတွေမှာပါ ဒီကိစ္စဟာ မဖြေရှင်းလို့ မရတော့ပါဘူး။ ဒီကိစ္စမှာ ကျွန်တော်တို့ အနေနဲ့ အမှန်တရား ပေါ်ပေါက်ရေးကို အလေးထားပါတယ်။ ဒါကြောင့်မို့ ဒီကိစ္စကို ရဲစခန်းတစ်ခုမှာ အမှုဖွင့်ခဲ့တာ ဖြစ်ပေမယ့် CID လို အထူးအဖွဲ့တွေက ဆောင်ရွက်လာတာ ဖြစ်တယ်။ ဒါကြောင့် သာမန်အမှုတွေလို လျစ်လျူရှုမယ်လို့တော့ မထင်ပါဘူး။ ဒီအပေါ်မှာ မျှော်လင့်ချက် ရှိပါတယ်'' ဟု ဖြေကြားသည်။

ထို့ပြင် ကိုထွန်းအောင်ကျော်တို့ မိသားစု အနေနှင့် မြောက်ပိုင်းတွင် ဖြစ်ပွားခဲ့သည့် ကိစ္စကြောင့် မိသားစု ရပ်တည်ရေး အတွက်ပါ ခက်ခဲခဲ့သည့် အကြောင်း ပြောကြားသည်။ ထို့အပြင် ယခုတစ်ခေါက်တွင် သမ္မတက ပေးအပ်မည့် လွတ်ငြိမ်းချမ်းသာခွင့်တွင် ပါဝင်လာနိုင်ကြောင်းနှင့် ထိုသို့ ပါဝင်လာရန်အတွက် နိုင်စစ်ကော်မတီတွင် စစ်ဆေးနေကြောင်း ပြောကြားလိုက်ပြီး ထိုသို့ပါဝင် လာပါကလည်း ယခုကိစ္စတွင် ထပ်မံရင်ဆိုင်ရမည် ဖြစ်ကြောင်းကိုလည်း ဦးညီညီကျော်က ပြောကြားသည်။

သံချောင်းခေါ် စ၀်ခွန်ကျော်အား နိုင်ငံရေး အကျဉ်းသား စိစစ်ရေး ကော်မတီတွင် စိစစ်နေသည်မှာ မှန်ကန်သည်ဟုလည်း နိုင်/ စစ် ကော်မတီဝင် ကိုရဲအောင်က အတည်ပြု ပြောကြားသည်။

ပါဂျောင်တွင် ဖြစ်ပွားခဲ့သည့် ကျောင်းသားအချင်းချင်း စွပ်စွဲသတ်ဖြတ်မှုကို CID မှ ကိုင်တွယ်ဖြေရှင်း နေမှုအား အတည်ပြုရန် မေးမြန်းခဲ့သော်လည်း ပြန်လည်ဖြေကြားခြင်း မရှိခဲ့ပေ။

Eleven