ချစ်သုဝေနှင့် တွေ့ဆုံခြင်း
ပို့စ်တင်ချိန်
- 11/29/2013 10:43:00 AM
ရုပ်ရှင်နဲ့ ဂီတနယ်ပယ် နှစ်ခုစလုံးမှာ ပရိသတ် အခိုင်အမာ ရရှိထားတဲ့ သရုပ်ဆောင်၊ တေးသံရှင် ချစ်သုဝေနှင့် တွေ့ဆုံပြီး မကြာမီ ရုံတင်ပြသမည့် သူမပါဝင် သရုပ်ဆောင်ထားသည့် သေးသေးလေးပဲလား ကြီးကြီးလား ရုပ်ရှင်ဇာတ်ကား အကြောင်း၊ သူမ မရိုက်ကူးလိုသည့် ဇာတ်ကောင် စရိုက်များအပေါ် သဘောထားအမြင်နှင့် လတ်တလော အနုပညာ လှုပ်ရှားမှုများ အကြောင်းကို The Voice ကမေးမြန်းထားခြင်း ဖြစ်သည်။
Voice : သေးသေးလေးပဲလား ကြီးကြီးလား ရုပ်ရှင်ဇာတ်ကားမှာ ချစ်သုဝေ သရုပ်ဆောင်ထားတဲ့ ဇာတ်ကောင်စရိုက်ကို ပြောပြပေးပါဦး။
CTW : ထရီဇာက ဒီကားမှာ သီရိသံစဉ်ဆိုတဲ့ ကောင်မလေးနေရာက သရုပ်ဆောင် ထားပါတယ်။ ဒီဇာတ်ကားလေးက ဟာသကားလေး ဖြစ်တဲ့အတွက် Character ထူးထူးခြားခြားရယ်လို့ မရှိပါဘူး။ မမျှော်လင့်တဲ့ အကြောင်းအရာ တစ်ခုကြောင့် မင်းသားနဲ့ ဆုံတယ်။ ထရီဇာတို့ နှစ်ယောက်က တစ်ကားလုံးမှာပါတဲ့ သူတွေကို လိုက်မွှေရတဲ့ သူတွေပေါ့နော်။ ထရီဇာကတော့ ဒီကားလေးကို ပရိသတ်တွေ လာကြည့်စေချင်တယ်။ ဒီကားက တစ်ကားလုံး အလှုပ်၊ အသွက်။ နောက်ပြီး ပါဝင်တဲ့ သရုပ်ဆောင်တွေလည်း အရမ်းများတယ်။ ဇာတ်အိမ် ဖွဲ့ထားတာလည်း အရမ်းများတယ်။ ဇာတ်ကားအစကနေ အဆုံးအထိလည်း ရယ်နေရတယ်။
Voice : ဒီဇာတ်ကားကို အထူးပွဲ ကြည့်ပြီးတဲ့ အချိန်မှာရော ကိုယ့်ရဲ့ သရုပ်ဆောင်မှုကို အားရကျေနပ်လား။
CTW : ဒီဇာတ်ကားလေးမှာ ကိုယ်ကိုယ်တိုင်ရော၊ ဇာတ်ပို့ သရုပ်ဆောင်တွေ ဖြစ်တဲ့ ဦးခင်လှိုင်တို့၊ ကိုဇော်ဇော်အောင်တို့ရဲ့ သရုပ်ဆောင်မှုတွေကိုရော ကြည့်ရတာ ပျော်စရာကြီး။ ကိုယ်ပါရတဲ့ ကားလေးမို့လို့ မဟုတ်ဘူး။ ပရိသတ် တစ်ယောက် နေရာကနေ ကြည့်ပြီးတော့ကို ဒီကားလေးကို ထရီဇာ ကြိုက်တယ်။ ညစ်ညမ်းတဲ့ ဟာသတွေလည်း မပါဘူး။ ကိုယ်ပါတဲ့ အခန်းတွေရော၊ ကိုယ်မပါတဲ့ အခန်းတွေရော ထရီဇာ ကြိုက်တယ်။
Voice : ချစ်သုဝေက Romance၊ Drama ဇာတ်ကားတွေ ရိုက်တာများပြီး ဟာသကား အရိုက်နည်းတယ်လေ။ ဟာသကားတွေမှာ သရုပ်ဆောင်ရတာ ချစ်သုဝေအတွက် ဘယ်လို အခက်အခဲတွေ တွေ့ရလဲ။
CTW : ဒီဇာတ်ကားက ညစ်ညမ်းတဲ့ စကားတွေ မပါဘူး။ ညစ်ညမ်းတဲ့ စကားလုံးတွေ ဆိုရင်တော့ ထရီဇာကပြောဖို့ ပါးစပ်မရဲဘူး။ အဲ့ဒီအတွက် ဟာသကားလေးတွေကို နည်းနည်းရှောင်တာ များတယ်။ ဒီဇာတ်ကားလေးကတော့ ကိုယ်ဇာတ်ညွှန်း ဖတ်ကတည်းက ကိုယ်ပြောနိုင်လို့ လက်ခံခဲ့တာပါ။ ထရီဇာက Romance၊ Drama တွေ ရိုက်တာ များနေတဲ့အတွက် အခုနောက်ပိုင်းတော့ Fancy လေးတွေ၊ Comedy ဇာတ်ကားလေးတွေ ရွေးပြီး ရိုက်ပါတယ်။
Voice : ချစ်သုဝေ သရုပ်ဆောင်တဲ့ ဗီဒီယို ဇာတ်ကားတွေက ဇာတ်လမ်းလေးတွေ ကောင်းတယ်လေ။ ဇာတ်လမ်းတွေကို ဘယ်လို စဉ်းစားရွေးချယ် ဖြစ်လဲဆိုတာ ပြောပြပေးပါဦး။
CTW : ထရီဇာကတော့ ဇာတ်ကားတစ်ခု ကောင်းဖို့က ဇာတ်လမ်းရယ်၊ အတူတွဲပြီး သရုပ်ဆောင်ရမယ့် သူတွေရယ် ဒါရိုက်တာရယ်က အရေးကြီးဆုံးလို့ ထင်တဲ့အတွက် ကိုယ့်ကို ဇာတ်လမ်းတစ်ခု လာပြတဲ့ အခါမှာလည်း ဒါတွေကို ကြည့်ပြီးရွေးတော့၊ ကိုယ်ပါတဲ့ ဇာတ်ကားလေးတွေ ထွက်လာတဲ့ အခါမှာ သပ်သပ်ရပ်ရပ်လေး ထွက်လာတယ် ထင်ပါတယ်။ ထရီဇာ လက်ခံထားတာ တစ်ခုက ရုပ်ရှင်တို့၊ ဗီဒီယိုတို့ဆိုတာ Team Work ကောင်းမှကောင်းမယ်။ ဇာတ်ကား တစ်ကားမှာ ပါဝင်တဲ့သူတွေ အကုန်လုံး မြိုင်မြိုင်ဆိုင်ဆိုင် ကြိုးစားကြမယ်ဆိုရင် ဇာတ်ကားကောင်း တစ်ကားကို ဖန်တီးနိုင်မယ်လို့ ထရီဇာ ယုံကြည်ထားတယ်။
Voice : အနုပညာရှင် တချို့က ဘယ်လို ဇာတ်ကောင်စရိုက်မျိုး ဆိုရင်တော့ သရုပ်မဆောင်ချင်ဘူးလို့ ပြောကြတယ်။ ချစ်သုဝေရော သရုပ်မဆောင်ဖို့ ကန့်သတ်ထားတဲ့ ဇာတ်ကောင်စရိုက် ရှိလား။
CTW : အနုပညာရှင်ဆိုတာ အားလုံး သရုပ်ဆောင်နိုင်ရမယ်လို့ ပြောကြတယ်။ ကိုယ့်ရဲ့ Role အရ ကန့်သတ် ထားတာမျိုးတော့ မဟုတ်ဘူး။ ကိုယ်မလုပ်ရဲ မပြောရဲတဲ့ အရာမျိုးကို သရုပ်ဆောင်ပြမယ် ဆိုရင်လည်း ဘယ်လိုမှ ကောင်းနိုင်မှာ မဟုတ်ဘူး။ အဓိက ကတော့ ထရီဇာက ကိုယ်ပီပီ ပြင်ပြင် သရုပ်မဆောင်နိုင်တဲ့ ဇာတ်ရုပ်တွေကို မလုပ်တဲ့ သဘောပါ။ ကိုယ့်စိတ်ထဲမှာ မနှစ်မြို့ဘူး၊ မကြိုက်ဘူး ဆိုတဲ့အရာ တစ်ခုကို သရုပ်ဆောင်ရရင် ဘယ်လိုမှ ပီပြင်မှာ မဟုတ်ဘူးလေ။ မပီပြင်တဲ့ အရာတစ်ခု ကိုလည်း ပရိသတ်တွေကို ချမပြချင်ဘူး။
Voice : အခုချိန်အထိ ချစ်သုဝေ သရုပ်မဆောင်ဖူးသေးတဲ့ ဇာတ်ကောင် စရိုက်တွေကို ပြောပြပေးပါဦး။
CTW : ထရီဇာ စကားမပြောတတ်တဲ့ သူတစ်ယောက် ပုံစံမျိုး သရုပ်မဆောင်ဖူးသေးဘူး။ ဆိုက်ကိုဆန်ဆန် လူသတ်ကားမျိုးတွေ မရိုက်ဖူးသေးဘူး။ အဲဒီလို ကားမျိုးလေးတွေ ရိုက်ချင်တဲ့အတွက် ကိုယ်နဲ့ ရင်းနှီးတဲ့သူတွေကို ပြောပေမယ့် ဘယ်သူ့ပြောပြော ရိုက်ဖို့ အားမသန်ကြဘူး။
Voice : မီးအိမ်ကဗျာ ဗီစီဒီကရော ဘယ်တော့လောက် ထွက်ဖို့ မှန်းထားလဲ။
CTW : မီးအိမ်ကဗျာ ဗီစီဒီကို ၂၀၁၄ ခုနှစ် ဇန်နဝါရီလမှာ ထွက်ဖို့ မှန်းထားပါတယ်။ သရုပ်ဆောင်တွေကတော့ ကိုနေတိုး၊ အောင်ရဲလင်း၊ ရဲမင်းသူ၊ သန္တာဗိုလ်၊ ပိုင်ဖြိုးသူတို့ ပါမယ်။ ဒါရိုက်တာတွေကတော့ ကိုညိုမင်းလွင်၊ ကိုမင်းထင်ကိုကိုကြီး၊ ပွင့်သိင်္ဂီဇော်နဲ့ နောက်ပြီးထရီဇာ ရိုက်တဲ့ သီချင်းတစ်ပုဒ် ပါမယ်။ အဲဒီသီချင်းကို ကိုနေတိုးနဲ့ ရိုက်မှာပါ။
Voice : လင်းလင်းရဲ့ တစ်ကိုယ်တော် ရှိုးပွဲမှာ စုံတွဲသီချင်း ဝင်ဆိုဖြစ်သွားပုံလေး ပြောပြပေးပါဦး။
CTW : အဲဒီပွဲကို ထရီဇာ ပရိသတ် တစ်ယောက်အနေနဲ့ သွားကြည့်ခဲ့တာပါ။ စင်အောက်က ပရိသတ်တွေက နားလည်မှု သီချင်းလေးကို ဆိုပေးဖို့ ထရီဇာ့နာမည်ကို အော်အော်ပြီး တောင်းကြတယ်။ ကိုလင်းကလည်း ကြေညာထား ကတည်းက Solid One Man Show ဆိုပြီး ကြေညာထားတော့ တက်ဆိုဖို့လည်း အစီအစဉ် မရှိဘူး။ နောက်ပိုင်း ပရိသတ်က အရမ်းအော်တော့ ကိုလင်းကလည်း စင်ပေါ်ခေါ်လိုက်တော့ ဒီတိုင်း တက်သွားတာ စလွယ်သိုင်း အိတ်ကြီးတောင် ပါသွားတယ်။ သီချင်းလည်း မတိုက်ထားဘဲနဲ့ ဆိုလိုက်ရတယ်။ စင်ပေါ် ရောက်တော့လည်း တလွဲတွေ ဖြစ်တာပေါ့နော်။ ထရီဇာ ဆိုနေကြက D Key ကို C Key နဲ့ တီးလိုက်တော့ Key ထပ်မြှင့်ခိုင်းရတယ်။ အလွဲအချော်လေးတွေနဲ့ပေါ့။
Voice : လင်းလင်းရဲ့ တစ်ကိုယ်တော် ရှိုးပွဲက သူရဲ့အမာခံ ပရိသတ်နဲ့ သူနဲ့ တစ်သားတည်း ကြတယ်လေ။ ချစ်သုဝေရော ဒီပွဲလေးကို ပရိသတ် တစ်ယောက် နေရာကကြည့်ပြီး ဘယ်လိုမြင်လဲ။
CTW : ဒီရှိုးပွဲလေးက အနုပညာမြောက်တဲ့ ပွဲလေးပေါ့နော်။ ကိုလင်းက သူ့အနုပညာကို သေသေချာချာ လုပ်တယ်။ သီချင်း ဆိုရင်လည်း ဒီသီချင်းလေးကို ပုံစံမတူအောင် ပရိသတ်ကို တင်ဆက်မလဲဆိုတာ သူသေချာ ပြင်ဆင်ထားတယ်။ ပရိသတ်ကို သူလေးစားပုံက အပြင်ပန်းတွေ မပါဘူး။ သူ့ရဲ့ အတွင်းစိတ်ထဲက အနုပညာအရ ပေးဆပ်ချင်တဲ့ စိတ်လေးက လေးစားဖို့ ကောင်းတယ်။ သူက ရှိုးပွဲမတိုင်ခင် ထရီဇာတို့ စတူဒီယိုမှာ သီချင်းတွေ လာတိုက် ကတည်းက ဒီပွဲလေးကို ထရီဇာ ကြည့်ချင်ခဲ့တာပါ။ သူနဲ့ စုံတွဲ ဆိုဖြစ်သွားတာကလည်း ပရိသတ်တွေက အရမ်းတောင်းဆို ကြတဲ့အတွက် ဆိုဖြစ်သွားတာပါ။
Voice : ချစ်သုဝေရဲ့ လတ်တလော အနုပညာ လှုပ်ရှားမှုလေးကို ပြောပြပေးပါ။
CTW : ထရီဇာရဲ့ အနုပညာ လှုပ်ရှားမှုကတော့ ဗီဒီယို ဇာတ်ကားတွေ ရိုက်ဖြစ်နေတယ်။ ထရီဇာ့ ဒုတိယ တစ်ကိုယ်တော် စီးရီးအတွက် သီချင်းတွေ စုနေတာလည်း တစ်ဝက်လောက် ရပြီဆိုတော့ ရှေ့နှစ်လယ် လောက်တော့ စလုပ်ဖြစ်မှာပါ။
Voice : ချစ်သုဝေကို အားပေးနေကြတဲ့ ပရိသတ်တွေအတွက် ပြောချင်တာတွေ ရှိရင် ပြောပေးပါဦး။
CTW : ထရီဇာ့ကို အားပေးနေကြတဲ့ ပရိသတ်တွေအတွက် စိတ်ချမ်းသာ ကိုယ်ကျန်းမာပါစေ။ အတိုက်အခိုက် အနှောင့်အယှက် ကင်းတဲ့ဘဝမှာ ငြိမ်းငြိမ်းချမ်းချမ်း ပျော်ပျော်ရွှင်ရွှင် နေထိုင်နိုင်ကြပါစေလို့ ဆုတောင်းပေးပါတယ်။
(သန့်ဇင်ဦး)
The Voice Weekly
