ကြော်ငြာလွန် ဆေးခန်းများ၏ ဓားစာခံအသစ်

ပို့စ်တင်ချိန် - 11/24/2013 06:59:00 AM

နယ်က ခရီးသွား ဧည့်သည်မို့ ရန်ကုန်မြို့တွင် ဆေးရုံတက် ကုသချိန် မရသည်က တစ်ကြောင်း၊ လိပ်ခေါင်း ရောဂါကြောင့် အရှက်ရသည်က တစ်ကြောင်းမို့ အစိုးရ ဆေးရုံနှင့် အခြားပုဂ္ဂလိက ဆေးရုံများသို့ မသွားဘဲ အိမ်တိုင်ရာရောက် ကြော်ငြာထားသော လသာမြို့နယ် အတွင်းရှိ ခေတ်မီ ဆေးကုခန်းသို့သာ သွားရောက် ပြသခဲ့သည်။

ဆေးခန်း ရောက်ကတည်းက ဗမာ လူမျိုးဆိုတာ မမြင်ခဲ့ရသလို ဆရာဝန် ဆိုလျှင်လည်း ဆေးခန်းအဝတွင် ချိတ်ဆွဲထားသော ဗမာဆရာဝန် နာမည်ဆိုင်းဘုတ် သုံးခုသာ တွေ့ပြီး ဆေးခန်းထဲတွင် တရုတ်လူမျိုး ဆရာဝန်၊ သူနာပြုများသာ တွေ့ရသည်။

သို့သော် ခွဲစိတ်ခန်းဝင်ချိန်နှင့် ဆရာဝန် ပြချိန်ဆိုပါက ဘာသာပြန်နှင့် အပြန်အလှန် ပြောခွင့်ရသည်။ ကုန်ကျစရိတ်မှာလည်း ဆရာဝန်နှင့် ပြသချိန်က ကျပ် သုံးသိန်းသာ ကုန်ကျမည်ဟု သိထားခဲ့ရ သော်လည်း လက်တွေ့ ခွဲစိတ်ခန်းမှ ထွက်ချိန်တွင်မူ နောက်ဆက်တွဲ ကုသစရိတ်များ ပါဝင်လျှင် စုစုပေါင်း ကျပ် ၁၁ သိန်းခန့် ကုန်ကျမည်ဟု တရုတ်လူမျိုး ဆရာဝန်နှင့် ဘာသာပြန်က ဆိုသည်။

ယခင်က ဆေးခန်းက ဆေးဆက်လက် ကုသရန် တိုက်တွန်းခဲ့သော်လည်း ၎င်း အနေဖြင့် ခွဲစိတ်ပြီး နောက်ဆက်တွဲ ဆေးထည့်ရန်မှာ ကုန်ကျစရိတ် များပြီး ခရီးသွားဧည့်သည် ဖြစ်၍ ငွေကြေး မလုံလောက်ကြောင်း ပြောရာတွင် ပိုက်ဆံ မရှိပါက မကုသနိုင်ကြောင်း ဆေးခန်းက အကြောင်းပြန်သည့် အတွက် အသက် ၄၅ နှစ်အရွယ် လိပ်ခေါင်း ရောဂါသည် ဒေါ်ဖြူဖြူအေး အံ့အားသင့်ခဲ့သည်။
တစ်ဖက်တွင်လည်း ၎င်း ခွဲစိတ်ခဲ့သည့် ခေတ်မီဆေးခန်း တာဝန်ရှိသူများက ဆေးခန်းတွင် ဗမာလူမျိုး ဆရာဝန် လေးဦး ရှိကြောင်း၊ ဆေးကုသ စရိတ်မှာလည်း လူနာ၏ ရောဂါအခြေအနေပေါ် မူတည်ပြီး အနည်းဆုံး ကျပ်ငါးသိန်းမှ ဆယ်သိန်း ဝန်းကျင်အထိ ကုန်ကျကြောင်း The Voice သို့ ပြောကြားခဲ့သည်။

မည်သို့ပင်ဆိုစေ ဒေါ်ဖြူဖြူအေး တစ်ယောက် မိမိကဲ့သို့ ရောဂါဝေဒနာရှင် များစွာ ယင်းဆေးခန်းတွင် လာရောက် ကုသနေသည်ကို တွေ့ရသည်။ ၎င်းတို့ထဲတွင် ရန်ကုန်မြို့ နေထိုင်သူများသာမက နယ်ဝေးမှ ရန်ကုန်သို့ လာရောက် ကုသသူများလည်း ရှိကြောင်း အထွေထွေရောဂါကု ဆရာဝန် တစ်ဦးက ဆိုသည်။

ရန်ကုန်မြို့တွင် ဖွင့်လှစ် ကုသနေသော အဆိုပါဆေးခန်း အများစုသည် လိင်အင်္ဂါနှင့် ဆက်နွှယ်သော ရောဂါများကို အဓိက ကုသကြပြီး သွားရောက် ကုသကြသူ အများစုမှာ လိပ်ခေါင်း ဝေဒနာရှင်များ ဖြစ်ကြကြောင်း မျက်မြင် ကြုံတွေ့ဖူးသူ အချို့က The Voice သို့ ပြောကြားသည်။

အရှက်အကြောက် ကြီးသော မြန်မာ လူမျိုးများအတွက် လိပ်ခေါင်းရောဂါ ခံစားရလျှင် နီးစပ်ရာ လိုင်စင်ရ မြန်မာ ဆရာဝန်များကို သွားရောက် ပြသမည့်အစား ပုန်းလျှိုး ကွယ်လျှိုး ကုသနေကြသော နိုင်ငံခြားသား ဆရာဝန်များထံ သွားရောက် ကုသခြင်းသည် အသက်အန္တရာယ်အထိ ခြိမ်းခြောက် နိုင်ကြောင်း အထွေထွေရောဂါကု ဆရာဝန် ဒေါက်တာသီဟသစ်က သတိပေး ပြောကြားသည်။

လိပ်ခေါင်းရောဂါ လက္ခဏာ အချို့မှာ ဝမ်းသွားပါက သွေးပါခြင်း၊ အထိုင်များလျှင် စအိုက နာကျင်ခြင်း၊ စအိုမှ သွေးကြောထုံး အပြင်ထွက်လာခြင်း အပြင် အခါအားလျော်စွာ သွေးကြောထုံးက သွေးထွက်ခြင်းကြောင့် သွေးအားနည်း ရောဂါနှင့် သံဓာတ် ချို့တဲ့ခြင်းတို့ ဖြစ်နိုင်ကြောင်း ၎င်းက ရှင်းပြသည်။

ယခင်က လှုပ်ရှားမှု နည်းသော သက်ကြီးပိုင်းတွင်သာ ဖြစ်သော်လည်း ပြောင်းလဲလာသော နေထိုင်မှု စနစ်ကြောင့် လူငယ်ပိုင်းတွင်လည်း ပိုဖြစ်လာကြကြောင်း ဒေါက်တာသီဟသစ်၏ ပြောကြား ချက်များအရ သိရသည်။

ဒေါ်ဖြူဖြူအေးကလည်း တာချီလိတ်-ရန်ကုန် ခရီးကို အဝေးပြေးကားနှင့်လာစဉ် လိပ်ခေါင်းဝေဒနာ ပိုပြင်းထန်လာသောကြောင့် ၁၀ မိနစ်အတွင်း မနာမကျင် ခွဲစိတ်ပေးမည်ကို ယုံကြည်၍ သွားရောက် ကုသမိခြင်း ဖြစ်သည်။

မြန်မာနိုင်ငံ ဆေးကောင်စီက နိုင်ငံခြားသား လိုင်စင်မဲ့ ဆရာဝန်များ ဆေးကုသမှု ပိုများလာသည့် အတွက် ထုတ်ပြန်ချက် တစ်စောင်ကို ယခုနှစ် မတ်လ ၁၁ ရက်နေ့တွင် နိုင်ငံပိုင် သတင်းစာများက တစ်ဆင့် ထုတ်ပြန် ကြေညာထားသည်။ အဆိုပါ လိုင်စင်မဲ့ ဆေးကုသမှုများကို စစ်ဆေးတွေ့ရှိပါက ထောင်ဒဏ် ငါးနှစ် အပြင် ငွေဒဏ်လည်း ချမှတ်မည် ဖြစ်ကြောင်း ယင်းထုတ်ပြန်ချက်တွင် တစ်ပါတည်း ဖော်ပြသွားသည်။

သို့သော် လက်တွေ့ အကောင်အထည် ဖော်မှုပိုင်း အားနည်းချက်ကြောင့် လိုင်စင်မဲ့ ဆရာဝန်များ ဆက်လက် ရှိနေသည့် အတွက် လိုင်စင်မဲ့ ဆေးကုသမှုများနှင့် အလွန်အကျွံ ကြော်ငြာသည့် ဆေးကုခန်းများကို တားဆီးရန် ရန်ကုန်တိုင်း ဒေသကြီး အစိုးရအဖွဲ့က ယခုနှစ် ဇွန်လလယ်ခန့်တွင် ပုဂ္ဂလိက အထူးကုဆေးခန်း ငါးခုခန့်ကို သွားရောက် စစ်ဆေးခဲ့သည်။
ရန်ကုန်တိုင်း အစိုးရအဖွဲ့ စစ်ဆေးမှုတွင် ခေတ်မီ ဆေးကုခန်းလည်း ပါဝင်ကြောင်း ယင်းဆေးခန်း တာဝန်ရှိသူ တစ်ဦးက ဆိုသည်။

အစိုးရအဖွဲ့ တာဝန်ရှိသူများက ပုဂ္ဂလိက ဆေးခန်းများတွင် မှတ်ပုံတင် မရှိသော ဆေးနှင့် ဆေးပစ္စည်းများ စစ်ဆေးခြင်း၊ ဆေးကောင်စီနှင့် တိုင်းရင်းဆေးကောင်စီ မှတ်ပုံတင် ရှိ၊ မရှိ စစ်ဆေးခြင်း တို့ကို ပြုလုပ်ခဲ့ကြောင်း ယခုနှစ် ဇူလိုင်လခန့်တွင် ရန်ကုန်တိုင်း ဒေသကြီး အစိုးရအဖွဲ့ တာဝန်ရှိသူ တစ်ဦးက The Voice သို့ ဆိုသည်။
သို့သော် ယခုအချိန်ထိ ကြော်ငြာလွန်းသော ဆေးကုခန်းများနှင့် လူစည်ကားရာ နေရာများတွင် မနာမကျင် ကုသပေးမည် ဆိုသော လိပ်ခေါင်းရောဂါ ဆေးကုခန်း လက်ကမ်းကြော်ငြာ များစွာ တွေ့ရှိနေရသေးသည်။

ယင်းကြောင့် လိပ်ခေါင်း ဝေဒနာရှင်များ ကိုယ်တိုင် သတိမူကာ လုံခြုံစိတ်ချရပြီး ကျန်းမာရေး ဝန်ကြီးဌာန အာမခံချက်ရှိသော ဆေးကုခန်းများကို ရွေးချယ်သင့်ကြောင်း၊ မိမိကုသမည့် ဆရာဝန်ကိုလည်း လိုင်စင်ရ ပြည်တွင်း၊ ပြည်ပ ဆရာဝန်များ ဟုတ်၊ မဟုတ် စိစစ်ပြီးမှသာ ကုသကြရန် လိုအပ်ကြောင်း အထွေထွေရောဂါကု ဆရာဝန် ဒေါက်တာသီဟသစ်က အကြံပြု ပြောဆိုသည်။

ကျန်းမာရေး ကုသစရိတ်ကြီးသော ရန်ကုန်မြို့ကြီးတွင် ဝန်ဆောင်မှု အပြည့်နှင့် ဆေးကုသပေးနေသော ပုဂ္ဂလိက ဆေးကုခန်းများ ရှိသကဲ့သို့ ဝန်ဆောင်မှု လျော့ရဲပြီး လူနာ အသက်အန္တရာယ် အတွက် အာမခံချက် မရှိသော ဆေးခန်း များစွာလည်း ကျန်ရှိနေသေးကြောင်း ဒေါ်ဖြူဖြူအေး၏ ကိုယ်တွေ့ဖြစ်ရပ်က သက်သေခံနေသည်။ ယခုထိလည်း ဒဏ်ရာဆီက တစ်ချက် နာကျင်တိုင်း ဒေါ်ဖြူဖြူအေးတစ်ယောက် ရိုက်စား ဆေးခန်းများအကြောင်း ခါးခါးသီးသီး ထပ်မံ ညည်းညူမိတော့သည်။

လဲ့ရည်မြင့်၊ ရလေး

“ခွဲစိတ်ခါနီးထိ နားကြပ်နဲ့ တိုင်းတာ တစ်ခုမှ မရှိဘူး။ သွေးပေါင်ချိန် တိုင်းတာလည်း မရှိဘူး။ မတည့်တဲ့ဆေး ဘာညာ မေးတာလည်း တစ်ခုမှ မရှိဘူး...”

ရန်ကုန်မြို့သို့ လာရောက်လည်ပတ်ရင်း လိပ်ခေါင်းဝေဒနာ ပြင်းထန်လာ သည့်အတွက် ခွဲစိတ်ကုသခဲ့ရသူ တာချီလိတ်မြို့နေ ဒေါ်ဖြူဖြူအေးနှင့် တွေ့ဆုံမေးမြန်းချက် များထဲမှ အချို့ကို ကောက်နုတ်ဖော်ပြလိုက်ပါသည်။

Voice : ဒီဆေးခန်း သွားပြဖြစ်တဲ့ အကြောင်းကို ရှင်းပြပေးပါ။

DPPA : ဆေးခန်းသွားပြတဲ့ နေ့ကတည်းက ကျွန်မ ခရီးသွားရင်းနဲ့ လိပ်ခေါင်း ဖြစ်လို့ အရမ်း ခံစားနေရတယ်။ လေးရက်ရှိပြီး သွေးထွက်တာနဲ့၊ အရမ်းနာကျင်တာနဲ့ ဆေးခန်း လာပြတာပါလို့ ပြောတော့ စာအုပ် လုပ်ရမယ်။ ငါးထောင် (ကျပ်) ကျတယ်တဲ့။ စာအုပ်ဖိုးငါးထောင် ဆိုတော့ စာအုပ် လုပ်လိုက်တယ်။ နောက်တော့ ဆရာဝန်နဲ့ တွေ့ဖို့ ငါးထောင် (ကျပ်) ထပ်ပေးပါတဲ့။ ဆရာဝန် စစ်ဆေးကြည့်မှ ရောဂါအခြေအနေ သိရမယ် ဆိုပြီး ဆရာဝန် လာစစ်တယ်။ အဲဒီမှာ ဆရာဝန်က တရုတ်လူမျိုး။ မြန်မာစကား လုံးဝ မတတ်ဘူး။ ခေါ်သွားတဲ့ ဆရာမလေးက ဗမာလို ဘာသာပြန်ပေးတယ်။ ဆရာက ခွဲစိတ်မှ ရမယ်လို့ ပြောတော့ သူတို့ဘာသာ ပြန်တယ်။ ခြောက်သိန်းကျမယ် ဆိုတော့ ကျွန်မ ပိုက်ဆံ မပါဘူး။ ကျွန်မကို အချိန် တစ်ရက်ပေးပါလို့ ပိုက်ဆံ ရှာရဦးမှာ မို့လို့လို့ ပြောတော့ မနက်ဖြန် လာခွဲနိုင်တယ် ဆိုရင် ဒီနေ့ ဆေးထည့်ပေးလိုက်မယ်၊ သုံးသောင်း ပေးခဲ့တဲ့။ တကယ်လို့ မနက်ဖြန် လာခွဲဖို့ အဆင်ပြေရင် ကြော်ငြာ စာအုပ်လေးလည်း ပါတော့ သုံးသိန်းပဲ ပေးပါ။ ၅၀ ရာခိုင်နှုန်း လျှော့ပေးလိုက်မယ် ပြောတယ်။ ကျွန်မလည်း နှစ်သိန်းပါလာတော့ ဒီနေ့ ခွဲလို့ရမလား မေးလိုက်တော့။ ရတယ် သုံးသိန်းရရင် အဆင်ပြေတယ် ပြောတယ်။ အဲဒီနေ့ပဲ တစ်ခါတည်း ဖြတ်လိုက်တယ်။

Voice : ခွဲစိတ် ကုသတော့ သူတို့ဘက်က ဘယ်လို ဝန်ဆောင်မှုတွေ ပေးလဲ။

DPPA : ခွဲစိတ်ခါနီးထိ နားကြပ်နဲ့ တိုင်းတာ တစ်ခုမှ မရှိဘူး။ သွေးပေါင်ချိန် တိုင်းတာလည်း မရှိဘူး။ မတည့်တဲ့ဆေး ဘာညာ မေးတာလည်း တစ်ခုမှ မရှိဘူး။ ပိုးသတ်ဆေးပါတဲ့ ဝတ်စုံတွေလည်း လဲပေးတာ မရှိဘဲနဲ့ အခန်းထဲကို ဝင်ခိုင်းပြီး ခွဲမယ် ပြောတယ်။

Voice : အစိုးရဆေးရုံတွေ ရှိရက်နဲ့ ဘာကြောင့် ဒီဆေးခန်းကို ရွေးဖြစ်တာလဲ။

DPPA : ဆေးရုံလည်း မတက်ချင်ဘူး။ နာနာကျင်ကျင် ခွဲစိတ်ရမှာကိုလဲ မခံစားနိုင်ဘူး။ တကယ် ခွဲစိတ်တော့လည်း အင်မတန် နာပါတယ်။ ဒီဆေးခန်း ကြော်ငြာစာအုပ် တွေကလည်း အိမ်တိုင်ရာရောက် လိုက်ကမ်းလှမ်းတာ။ ကိုယ့်လည်း ရောဂါဖြစ်တဲ့ အချိန်နဲ့ တိုက်ဆိုင်သွားတော့ တခြားလည်း မေးမြန်းဖို့လည်း ရှက်တယ်လေ။ နာကျင်လွန်းလို့ အရေးပေါ် လက်လှမ်းမီရာကိုပဲ သွားခဲ့ရတာ။

ရလေး
Voice