အမျိုးသမီးအချို့ ခန္ဓာကိုယ်သွယ်လျစေရန် စိတ်ကြွဆေးသုံးစွဲမှုများရှိလာ

ပို့စ်တင်ချိန် - 11/10/2013 06:50:00 PM

အမျိုးသမီးငယ်အချို့ ခန္ဓာကိုယ်သွယ်လျစေရေးအတွက် စိတ်ကြွရူးသွပ်ဆေးဝါးများကို တလွဲအသုံးပြုမှုများရှိလာနေပြီး မည်သည့် အကြောင်းပြချက်ဖြင့်ဖြစ်စေ မူးယစ်ဆေးဝါးသုံးစွဲသည်ဟု စစ်ဆေးတွေ့ရှိပါက ဖမ်းဆီးအရေးယူသွားမည်ဖြစ်ကြောင်း မူးယစ်ဗဟိုမှ ဒုရဲမှူးကြီးဇော်လင်းထွန်းကပြောကြားသည်။

““အတွင်းသတင်းတွေအရတော့ စိတ်ကြွမူးယစ်ဆေးတွေကို အမျိုးသမီးလေးတွေ ပိန်အောင်လို့သုံးတယ်လို့ သတင်းတွေရထားပါတယ်။ ဒီဆေးတွေက သုံးရင်တက်ကြွနေတယ်။ အလုပ်လည်း များများလုပ်နိုင်တယ်။ လေ့ကျင့်ခန်းလည်း လုပ်စရာမလိုဘဲ အလိုအလျောက်ပိန်လာစေတယ်ဆိုတော့ သုံးကြတယ်။ ဘယ်လိုပဲသုံးသုံး ကျွန်တော်တို့ ရည်ရွယ်ချက်ကတော့ မူးယစ်ဆေးဝါးသုံးတာမိရင် ဖမ်းမှာပဲ”” ဟု နေပြည်တော်မူးယစ်ဗဟိုမှ ဒုတိယရဲမှူးကြီးဇော်လင်းထွန်းကပြောကြားသည်။

ထို့အပြင် ညပိုင်းတွင် အချိန်ပိုင်းအလုပ်လုပ်ကိုင်ကြသည့် အမျိုးသမီးငယ်များလည်း စိတ်ကြွရူးသွပ်ဆေးအပြင် တန်ဖိုးနည်းသော အိပ်ဆေးကဲ့သို့ လုပ်ငန်းခွင်ပင်ပန်းနွမ်းနယ်မှုဒဏ်ကို ခံနိုင်ရည်ရှိစေသည့် ဆေးဝါးများ သုံးစွဲလာကြကြောင်း စိတ်ရောဂါအထူးကုဆရာဝန်ကြီးတစ်ဦးကပြောကြားသည်။
မက်သာအက်ဖီတမင်း ဓာတုပစ္စည်းပါဝင်သည့် စိတ်ကြွရူးသွပ်ဆေးဝါး (ATS) များကို သုံးစွဲကြခြင်းဖြစ်ကြောင်း အဆိုပါဆရာဝန်ကြီးကပြောသည်။

““ဆေးလာဖြတ်တဲ့သူတွေထဲက မိန်းကလေးတွေကို ဘာလို့သုံးလည်းမေးကြည့်တော့ အများစုက ပိန်ချင်လို့သုံးပါတယ်လို့ ပြောကြတယ်။ ပြီးခဲ့တဲ့ ၂နှစ်လောက်ကစပြီး ဒီလိုလူနာတွေကိုတွေ့လာတာ။ တော်တော်လေးကြောက်ဖို့ ကောင်းတယ်။ ဆေးကိုတလွဲသုံးကြတာ””ဟု ရန်ကုန်တိုင်းဒေသကြီး မူးယစ်ဆေးဝါး တားဆီးကာကွယ်ရေးစီမံကိန်းတွင် တာဝန်ထမ်းဆောင်ခဲ့သော  အဆိုပါဆရာဝန်ကြီးက  ပြောကြားသည်။
““ကျွန်တော့် တက္ကစီငှားစီးတဲ့ အမျိုးသမီးတစ်ယောက်ဆို ကားစီးလာရင်း တအောင့်ကြာတော့ ကျွန်တော့်ကို ဆေးဘယ်မှာဝယ်လို့ရမလဲလို့မေးတယ်။ ကျွန်တော် တော်တော်အံ့သြတယ်။ ရုတ်တရက်လန့်သွားတယ်။ အရင်က ကျွန်တော်အရောင်းအ၀ယ်လုပ် ခဲ့ဖူးတာသိလို့ ရဲကလာအစ်တာထင်တာ။ သူ့ပုံစံကြည့်တော့မှ ဆေးတကယ်လိုနေမှန်း သိသွားတယ်။ ဒါပေမဲ့ ကျွန်တော် ဒါတွေမလုပ်တာ ကြာပြီဆိုတော့ သေချာနားလည်အောင်ရှင်းပြတော့ သူက ကားပစ္စည်းဆိုင်တစ်ခုရှေ့မှာ ရပ်ခိုင်းပြီး ခဏစောင့် ခိုင်းတယ်။ တအောင့်ကြာတော့ စက်ဘီးကျွတ်ဖာတဲ့ကော်ဘူးတွေ အများကြီးဝယ်ထွက်လာတယ်။ ကော်ရှုတာပေ့ါဗျာ””ဟု အငှားယာဉ်မောင်းတစ်ဦးက ပြောကြားသည်။

စိတ်ကြွရူးသွပ်ဆေးဝါး ပြဿနာကို မြန်မာနိုင်ငံတွင် လွန်ခဲ့သည့် ခြောက်နှစ်ခန့်မှစတင်၍ ရင်ဆိုင်လာရပြီး အရှေ့တောင်အာရှ ဒေသတွင်းထုတ်လုပ်မှုအမြင့်မားဆုံးနိုင်ငံဟု သတ်မှတ်ခံထားရသည်။ ထို့အပြင် ဆေးဝါးသုံးစွဲသူများမှာ ဆေးဖိုးစရိတ် ပြန်လည်ကာမိစေရန်အတွက် သုံးစွဲသူမှတစ်ဆင့် ရောင်းဝယ်ဖောက်ကားသူများဖြစ်သွားကြပြီး တစ်စထက်တစ်စ ဈေးကွက်ကျယ်ပြန့်လာသော စိတ်ကြွရူးသွပ်ဆေး ပြဿနာကို ဖြေရှင်းရန် ခက်ခဲနေသေးကြောင်း မူးယစ်ဗဟို တာဝန်ရှိသူတစ်ဦးကပြောကြားသည်။

7DAY DAILY