တံတားဦးတွင် ဧကငါးထောင်ကျော် အကျယ်ရှိ ဟိုတယ်စီမံကိန်း စတင်မည်
ပို့စ်တင်ချိန်
- 11/18/2013 06:37:00 PM
မန္တလေး၊ နိုဝင်ဘာ ၁၇
မန္တလေးတိုင်း ဒေသကြီး တံတားဦး မြို့နယ်တွင် ဧကငါးထောင်ကျော် ကျယ်ဝန်းသည့် ဟိုတယ် စီမံကိန်းကို Myanmar Tourism Development Public Company က ယခုလအတွင်း စတင် အကောင်အထည် ဖော်မည် ဖြစ်ကြောင်း မန္တလေးတိုင်း ဒေသကြီး ဟိုတယ် လုပ်ငန်းရှင်များအသင်း ဥက္ကဋ္ဌ ဦးမြင့်အောင်က ပြောကြားသည်။
ယင်းကဲ့သို့ လုပ်ငန်း စတင်နိုင်ရန်အတွက် အများပိုင်ကုမ္ပဏီ တည်ထောင်ရာတွင် အဆိုပြု ရှယ်ယာရှင်များကို ရှယ်ယာငွေများ စတင် တောင်းခံနေပြီ ဖြစ်ကြောင်း၊ အများပြည်သူသို့ လာမည့် ၂၀၁၄ ခုနှစ် ဧပြီလတွင် ရောင်းချနိုင်ရန် ခန့်မှန်းထားကြောင်း ၎င်းက ပြောကြားသည်။
“ရှယ်ယာ ရောင်းချခွင့် ကျပြီဆိုတာနဲ့ အများပြည်သူကို ရောင်းချပေးမှာပါ၊ တစ်စုကို တစ်သောင်းကျပ် သတ်မှတ်ထားပါတယ်။ တစ်ဦးကို သိန်းပေါင်း တစ်သောင်းဖိုးထိ ဝယ်လို့ရပါတယ်” ဟု ဦးမြင့်အောင်က ဆိုသည်။
အဆိုပါ တံတားဦး စီမံကိန်း မြေနေရာတွင် ပါဝင်သည့် စိုက်ပျိုးမြေများကို လျော်ကြေးပေးရန် တောင်သူများနှင့် ညှိနှိုင်းနေကြောင်း ၎င်းက ထပ်မံ ပြောကြားသည်။
မြန်မာ့ခရီးသွားလုပ်ငန်း ဖွံ့ဖြိုး တိုးတက်လာခြင်းကြောင့် မန္တလေး မြို့တော်တွင် နိုင်ငံခြားသား ဧည့်အဝင် များလာနိုင်သည့်အတွက် ဟိုတယ် စီမံကိန်းကို အကောင်အထည်ဖော်ရန် စီစဉ်ထားပြီး ယင်းဟိုတယ် စီမံကိန်းကို ဧရာဝတီ မြစ်ကမ်းနံဘေး အင်းဝမြို့ဟောင်း အနီးတွင် အကောင်အထည်ဖော်မည် ဖြစ်ကြောင်း မန္တလေးတိုင်း ဒေသကြီး အစိုးရအဖွဲ့ တာဝန်ရှိသူထံမှ သိရသည်။
The Voice Weekly
