မိကျောင်းကန် မြေသိမ်းခံရသူများနဲ့ လွှတ်တော်အမတ်များ တွေ့ဆုံ

ပို့စ်တင်ချိန် - 11/07/2013 09:53:00 AM

လယ်ယာမြေနဲ့ အခြားမြေများသိမ်းဆည်းခံရမှု စုံစမ်းစစ်ဆေးရေးကော်မရှင်အဖွဲ့ဝင် ပြည်သူ့လွှတ်တော် ကိုယ်စားလှယ်တွေဟာ သင်္ဃန်းကျွန်းမြို့နယ် မိကျောင်းကန်ရပ်ကွက်က မြေသိမ်းခံရသူတွေကို ခေါ်ယူတွေ့ဆုံပြီး လိုအပ်တဲ့အချက်အလက်တွေကို မေးမြန်းခဲ့တယ်လို့ သိရပါတယ်။

ပြည်သူ့လွှတ်တော် ကိုယ်စားလှယ် ဦးခိုင်မောင်ရီ၊ ဦးအောင်သိန်းလင်းတို့နဲ့ တွေ့ဆုံဆွေးနွေးခဲ့တာဖြစ်ကြောင်း မိကျောင်းကန်ရပ်ကွက်သား မြေဆုံးရှုံးသူတစ်ဦးဖြစ်တဲ့ ဦးစိန်သန်းက ပြောပါတယ်။

“ကျနော်တို့ မိချောင်းကန်ကနေ တင်ပြထားတာရှိပါတယ်၊ မြေယာကော်မတီအနေနဲ့ မြေသိမ်းဥပဒေနဲ့ မညီညွှတ်တဲ့ သိမ်းထားတဲ့မြေတွေကို လုပ်ငန်းဆောင်ရွက်တဲ့ကိစ္စတွေအပေါ်မှာ အစိုးရအဖွဲ့ကနေပြီးတော့ ညှိနှိုင်းပူးပေါင်းဆောင်ရွက်မှုမရှိဘူးဆိုရင် လွှတ်တော်ကော်မတီနဲ့ ကျနော်တို့ မိချောင်းကန်ပြည်သူတွေပူးပေါင်းပြီး မိချောင်းကန်ပြည်သူတွေဘက်ကလည်း လုပ်ရမယ့်ကမ်ပိန်းတွေကိုလည်းလုပ်ပါမယ်၊ လွှတ်တော်ကော်မတီကလည်း အကောင်းဆုံးနည်းနဲ့ အစိုးရဘက်ကို ထိတွေ့ဆက်ဆံပြီးတော့၊ မြေယာတွေကို မြေသိမ်းဥပဒေနဲ့အညီပြန်ပေးဖို့ တောင်းဆိုမှုတွေနဲ့ တင်ပြချက်တွေကိုလည်း လုပ်သွားပါမယ်ဆိုတဲ့အကြောင်း ကျနော်တို့ကို ကတိပေးထားပါတယ်”

မိကျောင်းကန်ရပ်ကွက် အမှတ် ၁၊ ၂၊ ၃ တို့ကို လွန်ခဲ့တဲ့ ၁၉၉၁ ခုနှစ်လောက်က တပ်မ ၂၂ က သိမ်းယူခဲ့ပြီး အဲဒီရပ်ကွက်ကဒေသခံတွေကို တခြားနေရာတွေကို ရွှေ့ပြောင်းစေခဲ့တာပါ။

အခုဆိုရင် ရပ်ကွက် ၁ မှာ အဆောက်အဦးတွေရှိနေပြီး ရပ်ကွက် ၂ နဲ့ ၃ မှာလည်း ခြံစည်းရိုးခတ်တာတွေရှိနေတဲ့အတွက် အဲဒီလိုလုပ်ဆောင်နေတာကို ရပ်တန့်ပေးဖို့လည်း တင်ပြခဲ့တယ်လို့ ပြောပါတယ်။

မိကျောင်းကန်ရပ်ကွက်ကမြေတွေကို ပြန်ပေးဖို့အတွက် မိကျောင်းကန်သားတွေဟာ သင်္ဃန်းကျွန်းမြို့နယ်နဲ့ ရန်ကုန်မြို့ မြို့တော်ခန်းမရှေ့တွေမှာ ၇ ကြိမ်တိုင်တိုင် ဆန္ဒပြတောင်းဆိုခဲ့သလို ပြီးခဲ့တဲ့ အောက်တိုဘာလက ရန်ကုန်မြို့ မြို့တော်ခန်းမရှေ့မှာ ၄ ရက်ကြာ သပိတ်စခန်းဖွင့် ဆန္ဒပြခဲ့ကြပါတယ်။

RFA Burmese