ကိုယ်ဝန်ဆောင် မိခင်များ မွေးဖွား ပြီးချိန်မှာ ဖြစ်ပွားတတ်သည့် လက္ခဏာများ
ပို့စ်တင်ချိန်
- 11/29/2013 10:44:00 AM
ကိုယ်ဝန်ဆောင် မိခင်တွေ အနေနဲ့ ကလေး မွေးဖွားပြီးချိန်မှာ ဖြစ်ပွားတတ်တဲ့ ကျန်းမာရေး ပြဿနာ အများ အပြား ရှိပါတယ်။
အဲဒီ ကျန်းမာရေး ပြဿနာတွေကို ဖြေလျှော့တဲ့ နည်းလမ်းတွေလည်း သိထားသင့် ပါတယ်။ သဘာဝ အတိုင်း ကလေး မွေးဖွားပြီးတဲ့ မိခင် အများစုဟာ မွေးဖွားပြီးချိန်မှာ နာကျင်ခြင်း၊ အညစ် အကြေးများ ဆင်းခြင်း၊ ရင်သား တင်းခြင်း၊ ဆံပင်ကျွတ်ခြင်း စသည်တို့ကို ခံစား ရတတ်ပါတယ်။
ကလေး မွေးဖွားပြီး ရက်သတ္တပတ် ခြောက်ပတ်ကျော် ကြာချိန်အထိ မိန်းမကိုယ်မှ အဖြူ၊ အနီ သွေးများ ဆင်းတတ် ပါတယ်။ သွေးဆင်းပြီး နောက်ပိုင်း တဖြည်းဖြည်း အရောင် ပြောင်းလဲ သွားတတ်ပါတယ်။ မိခင်များ အနေနဲ့ မွေးဖွားပြီး ဒဏ်ရာ ချုပ်ရိုး မကျက်မီ ရက်သတ္တပတ် အတွင်း ကူးစက်ပိုး ဝင်ပါက မိန်းမကိုယ် နာကျင်မှု ပြင်းထန်လာခြင်း၊ ဒဏ်ရာမှ ပူခြင်း၊ ရောင်ရမ်းခြင်း၊ နာကျင်ခြင်းနဲ့ ပြည်ကဲ့သို့ အရည် ထွက်ခြင်းတို့ ဖြစ်ပေါ်လာရင် ဆရာဝန်နဲ့ အမြန်ဆုံး တိုင်ပင် ဆွေးနွေး သင့်ပါတယ်။ မိခင်များ အနေနဲ့ ဆီးသွားချိန်အတွင်း နာကျင်မှု ဖြစ်ပေါ်ရင် စအိုနဲ့ မိန်းမကိုယ် တစ်ဝိုက် ရေအေးကပ်ခြင်းမျိုး ပြုလုပ်ရင် အလိုအလျောက် သက်သာ နိုင်ပါတယ်။
နို့တိုက်မိခင်များ အနေနဲ့ ကလေး နို့တိုက်ချိန်မှာ နို့မထွက်ရင် နို့ညှစ် ကိရိယာ (Br-est Pump) ကို အသုံး ပြုသင့် ပါတယ်။ ကလေးကို နို့ မတိုက်ကျွေးရတဲ့ အချိန်မှာ မိခင်တွေ အနေနဲ့ တင်းမာ ကောင်းမွန်တဲ့ ဘရာစီယာကို ဝတ်ဆင် သင့်ပါတယ်။ ကလေး နို့တိုက်ချိန်မှာ ရင်သားများ တင်းမာ လာပါက ရင်သားပေါ်ကို ရေအေး ကပ်ခြင်း၊ ရေခဲကပ်ခြင်း၊ ရေကျက်အေး ကပ်ခြင်းဖြင့်လည်း တင်းမာမှုကို သက်သာပျောက်ကင်း စေနိုင် ပါတယ်။ ကိုယ်ဝန်ဆောင် မိခင်တွေ အနေနဲ့ ဝမ်းသွားတဲ့ အခါ မိန်းမကိုယ်နဲ့ စအိုကို အလွန်အမင်း ညှစ်၍ ဝမ်းသွားပါက ဒဏ်ရာကို ပိုမို နာကျင် စေနိုင်ပါတယ်။ ဆီးသွားချိန် အတွင်း ဆီးကျန်သလို ခံစားရရင် ဆရာဝန်နဲ့ တိုင်ပင် ဆွေးနွေး သင့်ပါတယ်။ ကလေး မွေးဖွားပြီးတဲ့ မိခင် အများစုဟာ ရက်သတ္တ ၁၂ ပတ်ခန့် အထိ ချောင်းဆိုးခြင်း၊ ကိုယ်လက် လှုပ်ရှားမှု များခြင်း၊ ရယ်မောခြင်းများ ပြုလုပ်တဲ့ အခါတိုင်း ဆီးအိမ်မှ ဆီး စိမ့်ထွက်မှုတွေ ဖြစ်တတ်ပါတယ်။
ကလေး မွေးဖွားပြီး မိခင်တွေ အနေနဲ့ လိပ်ခေါင်းရောဂါ မဖြစ်အောင် လိပ်ခေါင်းရောဂါ ဖြစ်ပွားမှုကို အားပေးစေတဲ့ အသီးအနှံတွေကို ရှောင်ကြဉ် စားသောက် သင့်ပါတယ်။ အသီးအနှံနဲ့ ဟင်းသီးဟင်းရွက်များ စားခြင်း၊ အခွံ မချွတ်ရသေးတဲ့ အသီးအနှံများ စားခြင်း၊ ရေများများ သောက်ခြင်းတို့ ပြုလုပ် သင့်ပါတယ်။ မိခင်တွေ အနေနဲ့ ကလေး မွေးဖွားပြီး ရက်သတ္တ တစ်ပတ်ကျော်ခန့် အထိ ဝမ်းနည်းလွယ်ခြင်း၊ စိတ်ဓာတ် ကျခြင်း၊ စိတ်ဖိစီးမှုများ ခံစားရနိုင်တာကြောင့် အဲဒီ အချိန်တွေမှာ အိပ်ရေးဝဝ အိပ်ဖို့ အထူး လိုအပ်ပါတယ်။ ။
အိချယ်ရီအောင်
မြ၀တီ
