စိတ်ပိုင်း လိင်ပိုင်းဆိုင်ရာ ထိခိုက်မှုမြင့်တက်လာသည့် အမျိုးသမီးလုံခြုံမှု
ပို့စ်တင်ချိန်
- 11/17/2013 02:38:00 PM
.jpg)
အမျိုးသမီးများအဖို့ လိုင်းကားများပေါ်တွင် ပုရိသယောက်ျားများ၏ သားကောင်သဖွယ် စိုးရိမ်ကြီးစွာ ခံစားနေကြရသည် အမျိုးသမီးများ၏ စိတ်ရင်းခံ အရှက်တရား၊ အကြောက်တရားကို အသုံးချ၍ ယခုကဲ့သို့ ပြုမူနေခြင်းသည် အမျိုးသမီးများ၏ လုံခြုံမှုစည်းဘောင် ပျက်ယွင်းနေသည်ကို သက်သေတစ်ခုအဖြစ် မြင်တွေ့နေရခြင်းဖြစ်သည် . . .
မြန်မာနိုင်ငံတွင် အမျိုးသမီးများ အနေဖြင့် ယောက်ျားများနှင့် တန်းတူ အခွင့်အရေး ရရှိကာ ရင်ပေါင်တန်း လုပ်ကိုင်လျက် ရှိသော်လည်း အသုံးပြု တတ်ခြင်း မရှိသည့်အတွက် အမျိုးသမီး များ၏ စိတ်ပိုင်းဆိုင်ရာ လုံခြုံမှု၊ လိင်ပိုင်းဆိုင်ရာ လုံခြုံမှုများသည် ထိခိုက်မှု မြင့်တက်လျက် ရှိသည်ဟု အမျိုးသမီး အရေး လှုပ်ရှားနေသည့် အဖွဲ့ အစည်း များက သုံးသပ် ပြောဆို ခဲ့ကြသည်။
အမျိုးသမီး အများစုသည် ၁၀၀ ရာခိုင်နှုန်းတွင် ပျမ်းမျှအားဖြင့် စိတ်ပိုင်းဆိုင်ရာ ထိခိုက်စေမှု လေးဆယ် ရာခိုင်နှုန်း၊ (လိင်ပိုင်းဆိုင်ရာ) ထိခိုက်မှုတွင် သိသာ ထင်ရှားခြင်းနှင့် မသိလိုက်သည့် ထိခိုက်မှုများသည် စုစုပေါင်း သုံးဆယ်ရာခိုင်နှုန်း ရှိနေသဖြင့် အမျိုးသမီးများ၏ စိတ်ပိုင်းဆိုင်ရာ၊ လိင်ပိုင်း ဆိုင်ရာများကို ကာကွယ်ပေးနိုင်မည့် ခုခံကာကွယ်နိုင်ခွင့် စသည့် လုံလောက်သော ဥပဒေများကို တိကျစွာပြဋ္ဌာန်းကာ ကောင်းစွာ အသုံးချ တတ်ရန် လိုအပ်လာပြီ ဖြစ်ကြောင်း …အမျိုးသမီးများ ကိုယ်စား အမျိုးသမီးဘ၀ မြှင့်တင်ရေး အဖွဲ့က တောင်းဆို ထားသည်။
စိတ်ပိုင်းဆိုင်ရာ ထိခိုက်ခံစား စေရမှုများသည် ပတ်ဝန်းကျင် အနေအထားအရ ဖြစ်ပေါ်လာခြင်း ဖြစ်ပြီး အထူးသဖြင့် ဆယ်ကျော်သက် အမျိုးသမီးငယ်များ၏ အရှက်သိက္ခာပိုင်း ဆိုင်ရာများကို ထိပါးပြောဆိုခြင်း၊ မဖွယ်မရာ ပြောဆိုခြင်း ပတ်ဝန်းကျင်တွင် အတူနေထိုင်သူများက မဟုတ်မမှန်သည့် သိက္ခာပိုင်းဆိုင်ရာ ပြောဆိုမှုများ (ဥပမာ- မကောင်းသည့် မိန်းကလေးအဖြစ် လုပ်ကြံပြောဆိုမှုများ)အပြင် ခြိမ်းခြောက် ပြောဆိုမှုများလည်း ပါဝင်သည်။
ဤကဲ့သို့ စိတ်ပိုင်းဆိုင်ရာ ထိခိုက်ခံစား နေရသည့် တာမွေမြို့နယ်၊ ကျောက်မြောင်းမှ အမျိုးသမီးငယ် တစ်ဦးက ““ကျွန်မက သာမန်ဝန်ထမ်း တစ်ယောက်ပါ။ ကျွန်မကို စိတ်ဝင်စားနေတဲ့ ကောင်လေး တစ်ယောက်က သူ့ကို ပျစ်ပျစ်နှစ်နှစ် ပြောလိုက်တော့ ကျွန်မကို ရပ်ကွက်ထဲမှာ ဟိုလိုမျိုး လုပ်စားနေတဲ့ မိန်းကလေးပါလို့ အဆင့်ဆင့် လိုက်ပြောတယ်။ ကျွန်မ ရုံးသွား၊ ရုံးပြန်ဆို ရပ်ကွက်ထဲက မခေါ်ချင် မပြောချင်နဲ့။ ကျွန်မ မဟုတ်တဲ့ အတွက် ဂရုမစိုက်ပါဘူး။ ကျွန်မကို ဒီလိုမျိုး ယုံကြည်ပြီး ဆက်ဆံနေတဲ့ အတွက် ကျွန်မ နေ့ရောညရော စိတ်ထိခိုက် ရတယ်။ အားငယ်ရတယ်။ ဒီလို ပြောနေတာ တွေကို ကျွန်မ ဘာမှပြန်လုပ်လို့ မရဘူးလား”” ဟူ၍ ရင်ဖွင့် ပြောကြားခဲ့သည်။
လိင်ပိုင်းဆိုင်ရာ ထိခိုက်မှုများသည် မနက်မိုးလင်း ရုံးသွားကြရသည့် အမျိုးသမီးများ အဖို့ လိုင်း ကားများ ပေါ်တွင် ပုရိသ ယောက်ျားများ၏ သားကောင်သဖွယ် စိုးရိမ်ကြီးစွာ ခံစားနေကြရသည်။ အမျိုး သမီးများ၏ စိတ်ရင်းခံ အရှက်တရား၊ အကြောက်တရားကို အသုံးချ၍ ယခုကဲ့သို့ ပြုမူနေခြင်းသည် အမျိုးသမီးများ၏ လုံခြုံမှုစည်း ဘောင်ပျက်ယွင်း နေသည်ကို သက်သေတစ်ခု အဖြစ် မြင်တွေ့နေရခြင်း ဖြစ်သည်။
အမျိုးသမီးများသည် အလားတူ ဖြစ်ရပ်များကို ရင်ဆိုင်နိုင်စေရန် အဓိက မိမိကိုယ်ကိုယ် ယုံကြည် မှုရှိရန် လိုအပ်ပြီး အကြမ်းဖက်မှုသည် အိမ်တွင်း၊ အိမ်ပြင် ဖြစ်ပွားနိုင်သဖြင့် ငယ်စဉ်မှ စိတ်အားငယ်သူ၊ ဖြတ်သန်း ရသည့် ဘ၀အတွေ့ အကြုံခါးသီးသူ များတွင် ပိုမိုဖြစ်ပွားကြောင်း လေ့လာတွေ့ရှိရသည်။
ထိုကဲ့သို့ လေ့လာတွေ့ရှိမှု အပေါ် အမျိုးသမီးများ၏ လူမှုပိုင်းဆိုင်ရာ လူမှုအကြံပေးဖြစ်သူ ဒေါ်စုစုလှိုင်က ““အမှန်အတိုင်းဆိုရင် တခြားနိုင်ငံက အမျိုးသမီးတွေက အစ်မတို့ မြန်မာနိုင်ငံထက် အခွင့်အရေး ပိုဆုံးရှုံးပါတယ်။ အဲဒါကြောင့် အခွင့်အရေးရပြီး အသုံး မချတတ်ကြဘူး။ အမျိုးသမီးတွေက ကိုယ်ရည်ကိုယ်သွေး မြင့်မားမယ်၊ အသိဉာဏ် မြင့်မားမယ်ဆိုရင် ကာကွယ်နိုင်မယ်။ ကိုယ်ရည် ကိုယ်သွေး ဆိုတာလည်း အတတ်ပညာတွေ၊ ဘွဲ့တွေရဖို့ကို ပြောတာမဟုတ်ဘူး။ စိတ်ပိုင်းဆိုင်ရာ အားနည်းသူကို ပြောတာပါ။ အဲဒီလို ကိုယ်ရည် ကိုယ်သွေး မြင့်မားနေတဲ့ သူတွေက ဘယ်မှာဖြစ်ဖြစ် လုပ်ငန်းခွင်ထဲမှာပဲ ဖြစ်ဖြစ် အကြမ်းဖက်ခံရမှု နည်းတာ တွေ့ရတယ်”” ဟူ၍ သုံးသပ်ပြောကြားခဲ့သည်။
လိင်ပိုင်းဆိုင်ရာ ထိခိုက်စေမှု၊ အကြမ်းဖက်ခံရမှုများ ဖြစ်ပွားရသည့် အကြောင်းရင်းများ Tringle Women Support ၏ တာဝန်ခံ ဒေါ်ခင်လေးက ““ဘယ်နိုင်ငံမှာမှတော့ ပပျောက်တယ်ဆိုတာ မရှိသေးဘူး။ ဒါပေမဲ့ မြန်မာနိုင်ငံ မှာတော့ ပိုတယ်လို့ ပြောရမှာပါ။ ဥပမာ ဘတ်စ်ကားစီးရင် အစ်မ တို့နိုင်ငံရဲ့လိုင်းကားတွေက တစ်ဦးအသား တစ်ဦးကပ်နေတော့ မစီးလို့လည်း မရဘူး။ အဲဒီမှာ အခွင့်အရေး ယူချင်တဲ့ ယောက်ျားတွေ အတွက် အဆင်သင့် လို့ပေါ့။ အပျို မိန်းကလေး တန်မဲ့လည်း တိုးဝှေ့ စီး နေရတဲ့အတွက် မိမိကိုယ်ကိုယ် စိတ်ဓာတ်မြင့်မား နေဖို့လည်း လိုတယ်။ ပကတိမျက်နှာမှာ မလုံခြုံဘူးလို့ ခံစားနေရရင် သူတို့အတွက် သွေးတိုး စမ်းချင်စိတ်ကို ပိုဖြစ်ပေါ် စေနိုင်တယ်။ ဒါပေမဲ့လည်း အမျိုးသမီးတွေကို ကာကွယ်ထားတဲ့ ကာယိနြေ္ဒ ပျက်ပြားစေတာကို ကာကွယ်ထားတဲ့ ဥပဒေထုတ်ထားပေမယ့် တရားရုံးမှာ အဆင့်ဆင့် ရင်ဆိုင်ရတဲ့အတွက် သူတို့က အရှက်ကွဲမှာစိုးလို့ တိုင်တန်း တာတွေ၊ ဘာတွေ မလုပ်ရဲကြဘူး။ အရမ်းကို ဆိုးရွားမှပဲ တိုင်ကြ တာလေ။ ဒါ တောင် တချို့ မိဘတွေကသိမှ မိဘတွေက တိုင်တာရှိတယ်””ဟူ ၍ ပြောသည်။
အမျိုးသမီးများသည် အခွင့်အရေးများကို ကောင်းစွာ အသုံးချတတ်ရန် လိုအပ်ပြီး နိုင်ငံတကာတွင် နိုင်ငံအလိုက် ဦးဆောင်နေသည့် အမျိုးသမီးများနှင့် အတူ ယုံကြည်မှုရှိစွာ နေထိုင်နိုင်ရန် လိုအပ်လာပြီဖြစ်သည်။
မြန်မာနိုင်ငံတွင် လူဦးရေ သန်း ၆၀ ကျော် ရှိရာ အမျိုးသမီး ဦးရေသည် လူဦးရေ၏ ၅၀ ဒသမ ၃ ရာခိုင်နှုန်း ရှိသည်ဟု မြန်မာနိုင်ငံလုံး ဆိုင်ရာ အမျိုးသမီးအဖွဲ့ချုပ်၏ ထုတ်ပြန်ချက်တွင် ဖော်ပြထားသည်။
ထိုကဲ့သို့ များပြားလှသည့် အမျိုးသမီးထုကြားတွင် အမျိုးသမီးအရေး လှုပ်ရှားသူများ၊ အမျိုးသမီး စွမ်းဆောင်ရည် အဖွဲ့များ ပေါ်ပေါက် လာကာ ဦးဆောင်လှုပ်ရှားနေကြ သော်လည်း ရှေ့တန်းသို့ ရောက်ရှိ သူအလွန် နည်းပါးကြောင်း တွေ့ရှိရသည်။
အမျိုးသမီး ကိုယ်စားပြု စွမ်းဆောင်ရည် လှုပ်ရှားသူများသည် နိုင်ငံရေး၊ လူမှုရေး၊ စီးပွားရေး၊ ကျန်းမာရေး၊ ပညာရေးစသည့် နယ်ပယ်စုံမှ ဦးဆောင်လျက်ရှိပြီး ၎င်းတို့၏ စွမ်းဆောင်ရည်နှင့် လုပ်ကိုင်မှုများ အပေါ် အသိအမှတ်ပြု လက်ခံရန် လိုအပ်လာပြီ ဖြစ်သည်။
အမျိုးသမီးတစ်ဦး၏ ခံယူချက်နှင့် စိတ်ထား ထားရှိမှုအပေါ် အမျိုးသမီး အခန်းကဏ္ဍ တိုးတက် မြင့်မားရေး ဆောင်ရွက်သူ၊ ရုပ်ရှင် ဒါရိုက်တာတစ်ဦးဖြစ်သူ ဒါရိုက်တာ ကြည်ဖြူသျှင်က ““ကျွန်မ ကိုယ့်ကိုယ်ကိုယ် အလုပ်လုပ်တဲ့ နေရာမှာ မိန်းကလေးလို့ တစ်ခါမှ မတွေးဘူး။ မတွေးဘူး ဆိုပေမယ့် ပြောစရာ မရှိအောင် နေတယ်။ ယုံကြည်မှုရှိရှိ နေတယ်။ ငါက မြန်မာ မိန်းကလေးပဲလို့ တွေးလိုက်ရင် ယောက်ျားတွေနဲ့ ရင်ပေါင်တန်း တဲ့အခါ ရှေ့ရောက်မှာ မဟုတ်ဘူး။ ကိုယ့်ဘာသာ ထိန်းကျောင်းနိုင်ရမယ်။ ကိုယ်လုပ်ရတဲ့ အလုပ်၊ တာဝန်၊ အခန်းကဏ္ဍမှာ မိန်းကလေးမို့လို့ မလုပ်နိုင်ဘူး ဆိုတာ မရှိဘဲ ကျေပွန်စွာ ထမ်းဆောင်နိုင်ရ မယ်။ အမျိုးသမီးတစ်ဦး ဆိုပေမယ့် အစ်မက ဒါရိုက်တာ ဆိုတော့ အုပ်ချုပ်မှုပိုင်း လုပ်ရတယ်။ အဲဒါကြောင့် အမျိုးသမီး ဆိုပေမယ့် တစ်ခါတလေ ယောက်ျားလေးတွေ နဲ့တန်းတူ လုပ်နိုင်စွမ်း ရှိရမယ်။ ပြတ်သားရမယ်။ အဲဒီလိုလုပ်ဖို့ ယုံကြည်မှုရှိပြီး မှန်ကန်ရမယ်။ ဒါ ဆိုထက်မြက်တဲ့ အမျိုးသမီးတွေ အများကြီးရှိလာမှာပါ””ဟု သုံးသပ် ပြောကြားခဲ့သည်။
ဝတ်ရည်နွေးနွေး
မြန်မာသံတော်ဆင့်
