မြန်မာ-အိန္ဒိယ နယ်စပ်ဂိတ် တရားဝင် ဖွင့်လှစ်ရန် နှစ်နိုင်ငံ သဘောတူညီမှု မရသေး

ပို့စ်တင်ချိန် - 11/19/2013 07:11:00 PM

ကလေး၊ နိုဝင်ဘာ ၁၈

မြန်မာနိုင်ငံ တမူးမြို့နှင့် အိန္ဒိယနိုင်ငံ မိုရေးမြို့တို့ ကြားရှိ နယ်စပ် ဂိတ်ပေါက်ကို တရားဝင် ဖွင့်လှစ်ရန် နှစ်နိုင်ငံ သဘောတူညီမှု မရရှိသေးကြောင်း လူဝင်မှု ကြီးကြပ်ရေးနှင့် အမျိုးသား မှတ်ပုံတင်ရေး ဦးစီးဌာန ညွှန်ကြားရေးမှူးချုပ် ဦးမောင်မောင်သန်းက ပြောကြားသည်။

ပြည်ထောင်စုလွှတ်တော် နာယက၏ ခရီးစဉ်အတွင်း တမူးမြို့ဒေသခံများက အိန္ဒိယနိုင်ငံ အင်ဖာမြို့သို့ ဆေးကုသရေးနှင့် ပတ်သက်ပြီး တရားဝင် သွားရောက် နိုင်ရေးအတွက် မေးမြန်းရာတွင် ၎င်းက အထက်ပါအတိုင်း ဖြေကြားခဲ့ခြင်း ဖြစ်ပြီး တစ်နိုင်ငံနှင့် တစ်နိုင်ငံ ဝင်ပေါက် ထွက်ပေါက်များမှ ခရီးသွားလာကြသော နယ်စပ်ဂိတ်များ ဖွင့်လှစ်ရေး ကိစ္စမှာ နှစ်နိုင်ငံ သဘောတူညီချက်ဖြင့် လက်မှတ်ထိုးကာ တရားဝင် ဆောင်ရွက်ရသော ကိစ္စ ဖြစ်ကြောင်း ၎င်းကရှင်းပြသည်။
“နှစ်နိုင်ငံ နယ်ခြားကော်မတီ အစည်းအဝေးတွေမှာ နှစ်စဉ်နှစ်တိုင်းပဲ ဆွေးနွေးနေတဲ့ အချက်တစ်ချက်ပါ။ အခုချိန်ထိ နှစ်နိုင်ငံ သဘောမတူနိုင်သေးပါဘူး” ဟု ဦးမောင်မောင်သန်းက ဆိုသည်။

နယ်စပ်ရှိ နန်းဖာလုံဈေးနှင့် မိုရေး မြို့သို့ ဝင်ထွက်ခွင့် ပြုထားခြင်းမှာ နှစ်နိုင်ငံ နားလည်မှုဖြင့် ဆောင်ရွက်နေခြင်း ဖြစ်ပြီး ဂိတ်ဖွင့်လှစ်ရန်အတွက် နားလည်မှု စာချွန်လွှာ (MoU) ထိုးရန် ကိစ္စမှာ တစ်နိုင်ငံနှင့် တစ်နိုင်ငံ မိမိနိုင်ငံ၏ နိုင်ငံရေး၊ လုံခြုံရေး၊ စီးပွားရေးစသော အခြေအနေများ အပေါ်တွင် မူတည် သုံးသပ်ကာ ဆောင်ရွက်ခြင်း ဖြစ်ကြောင်း ၎င်းကရှင်းပြသည်။

နယ်စပ်ဂိတ်များ ဖွင့်လှစ်ရန် ဆောင်ရွက်ရာတွင် ၎င်းတို့ ဝန်ကြီးဌာန တစ်ခုတည်း၏ သဘောထား မဟုတ်ဘဲ နိုင်ငံခြားရေး၊ ပြည်ထဲရေး ဝန်ကြီးဌာနများ အပါအဝင် အခြားသော သယ်ယူ ပို့ဆောင်ရေး လုပ်ငန်းများ၏ သဘောတူညီချက်ဖြင့် ဆောင်ရွက်ရမည် ဖြစ်ကြောင်း၊ ယင်းကဲ့သို့ မြန်မာနိုင်ငံဘက်မှ ဆောင်ရွက်နိုင်သော်လည်း တစ်ဖက်နိုင်ငံက လက်ခံ မဆောင်ရွက်နိုင်လျှင် အဆင်မပြေကြောင်း ဦးမောင်မောင်သန်းက ဆက်လက် ရှင်းပြသည်။
“ဟိုဘက်နိုင်ငံက ဆေးနဲ့ကိရိယာတွေ ပိုစုံပြီး ပိုကောင်းတယ်။ ဒါကြောင့် အဲဒီဘက်ကို သွားကုချင်ကြတာ။ အခု လောလောဆယ်မှာ မိုရေးလောက် ထိတော့ ဝင်ထွက်လို့ ရနေတယ်။ ဒါပေမဲ့ သူတို့ ဘက်ကလာရင် Border Pass နဲ့လာတယ်။ ကျွန်တော်တို့က သွားရင် ဘာမှမလိုဘူး။ ဒီတိုင်း ဝင်သွားရုံပဲ။ လုံခြုံမှုတော့ မရှိဘူးပေါ့” ဟု အိန္ဒိယနိုင်ငံသို့ သွားရောက် ဆေးကုသဖူးသူ တမူးမြို့ ဒေသခံတစ်ဦးက ဆိုသည်။

လက်ရှိတွင် မြန်မာနိုင်ငံဘက်မှ မိုရေးမြို့ဘက်သို့ အလည်အပတ် သဘောမျိုးဖြင့် သွားရောက်လေ့ ရှိကြသော်လည်း တစ်ဖက်နိုင်ငံကမူ တမူးမြို့ နန်းဖာလုံဈေးသို့ အစားအသောက်၊ အဝတ်အထည် စသောပစ္စည်းများ ဝယ်ယူရန်အတွက် နေ့စဉ် ဝင်ရောက်မှု ရှိနေကာ ဈေးအထိ လွတ်လပ်စွာ ဝင်ရောက်ခွင့် ရကြကြောင်း၊ တမူးမြို့ထိ လာရောက်မည် ဆိုလျှင် အိန္ဒိယ ရူပီးငွေ ၁၀ ပေးဆောင်ကြရကြောင်း တမူးမြို့ ဒေသခံများထံမှ သိရသည်။

မြတ် (ကလေး)
The Voice Weelky