စိတ်ပိုင်းဆိုင်ရာ ဖွံ့ဖြိုးရင့်ကျက်မှုနှင့် အဆောင်နေ ကျောင်းသားဘ၀

ပို့စ်တင်ချိန် - 11/10/2013 08:28:00 PM

ရန်ကုန် နည်းပညာတက္ကသိုလ် (YTU) နှင့် မန္တလေး နည်းပညာတက္ကသိုလ် (MTU) တို့တွင် ၂၀၁၃-၂၀၁၄ ပညာသင်နှစ်မှ စတင် တက်ရောက်ကြမည့် ကျောင်းသား ကျောင်းသူများ အဆောင်နေထိုင်ခွင့် ရရှိရေးအတွက် အဆင့်မြင့် နည်းပညာ တက္ကသိုလ်များ ဦးစီးကော်မတီမှ သက်ဆိုင်ရာသို့ တင်ပြထားကြောင်း သိရသည်။

ယခင် မြန်မာနိုင်ငံ ပညာရေး ကော်မတီဥက္ကဋ္ဌအဖြစ် ဒုတိယ ဗိုလ်ချုပ်ကြီးခင်ညွန့် တာဝန်ယူခဲ့ချိန်မှစ၍ တက္ကသိုလ် အဆောင်များကို ပိတ်ပစ်ခဲ့သည်။ နည်းပညာတက္ကသိုလ် အပါအ၀င် ၁၉၉၀ ပြည့်လွန်နှစ်များ နောက်ပိုင်း အသစ်ဖွင့်လှစ်ခဲ့သည့် တက္ကသိုလ်ကျောင်းများကိုလည်း မြို့နှင့် လွန်စွာဝေးကွာသော နေရာများ၌ ဆောက်လုပ်ခဲ့သည်။ နိုင်ငံရေး လှုပ်ရှားမှုများတွင် ကျောင်းသားများ၏ အဓိကစုရပ်သည် တက္ကသိုလ်အဆောင်များ ဖြစ်သည်ဟု ယူဆကာ တက္ကသိုလ်အဆောင်များကို ပိတ်ပစ်ခဲ့သည်ဟု ဝေဖန်မှုများ ရှိခဲ့သည်။ ကျောင်းသားများ ဆူပူဆန္ဒပြမှုများ ပြုလုပ်ပါက အလွယ်တကူ နှိမ်နင်း ဖြိုခွဲမှုများ ပြုလုပ်နိုင်ရန်အတွက်လည်း တက္ကသိုလ်ကျောင်းများကို သီးခြားဆန်သည့် နေရာများ၌ ထားရှိခဲ့ခြင်း ဖြစ်သည်ဟု ယူဆကြသည်။

ထို့ကြောင့် အိမ်မှ ကျောင်းတက်ရသည့် ကျောင်းသားများ အနေဖြင့် ငွေကုန် ကြေးကျများခြင်း၊ အသွားအပြန်ခရီး၌ ပင်ပန်းကာ အိမ်တွင်စာကြည့်ရန် စိတ်မ၀င်စားခြင်း၊ ကျောင်းပြေးခြင်း၊ စည်းကမ်းပျက်ခြင်း အစရှိသော ဆိုးကျိုးများ ဖြစ်ကြရသည်။ နယ်မှလာသော ကျောင်းသားများ အနေဖြင့်လည်း ကျောင်းပရိဝုဏ် ပြင်ပရှိနေရာများတွင် ဖြစ်သလို အိမ်ခန်းများ ငှားရမ်းနေထိုင်ရသောကြောင့် ဘ၀နေထိုင်မှု မလုံခြုံခြင်းနှင့် မလိုလားအပ်သော ပြဿနာများ ဖြစ်ပေါ်ခြင်းတို့နှင့် ကြုံတွေ့ရသည်။

အမှန်တကယ်၌ အဆောင်နေ ကျောင်းသားဘ၀သည် ရင့်ကျက်မှုနှင့်အတူ တာဝန်ယူတတ်မှုကို တည်ဆောက်ပေးသည်။ အရွယ်ရောက်ပြီးသော လူကြီးတစ်ဦးအဖြစ် ရင့်ကျက်လာသည့် ဆင့်ကဲဖြစ်စဉ်တွင် လူတစ်ဦးနှင့် တစ်ဦး မတူညီသော်လည်း အဆောင်နေ ကျောင်းသားဘ၀က ရင့်ကျက်မှုနှင့် တာဝန်ယူတတ်မှုတို့အတွက် များစွာ အထောက်အကူပြုသည်။ အဆောင်နေ ကျောင်းသားအဖြစ် နေထိုင်ဖူးသူသည် ကိုယ်ပိုင် ဆုံးဖြတ်ချက်များ ချမှတ်ပုံ၊ ကိုယ်ပိုင်ဘ၀ကို စီမံခန့်ခွဲပုံ၊ မိမိ၌ ရှိသည့်ငွေကို ထိန်းသိမ်းသုံးစွဲပုံတို့ကို လေ့လာသင်ယူခွင့် ရရှိသည်။ ဘ၀နောက်ခံ အမျိုးမျိုးမှ လာကြသူများ အဆောင်တစ်ခုတည်း၌ ဆုံစည်းကာ လက်ပွန်းတတီး နေထိုင်ရင်း မိမိတို့ကိုယ် မိမိတို့ စိတ်ပိုင်းဆိုင်ရာအရ ဖွံ့ဖြိုးတိုးတက်အောင် တည်ဆောက်ယူလျှက် လွတ်လပ်မှုနှင့် တာဝန်ယူမှုအကြောင်း သင်ကြားခွင့် ရရှိနိုင်သည်။

လူ့အဖွဲ့အစည်းတစ်ရပ်ကို မြှင့်တင်ရန်အတွက် ပျမ်းမျှပြည်သူများဟု ခေါ်ဆိုရမည့် အရပ်ထဲမှ လူအများစုထက် ဥာဏ်ပညာအပြင် စိတ်ဓာတ်ရေးရာအရ ပိုမိုမြင့်မားအောင် တက္ကသိုလ် ကျောင်းသားများကို ပြုစုပျိုးထောင်ပေးရာတွင် တက္ကသိုလ် အဆောင်များသည် တက္ကသိုလ် ကျောင်းသားများကို အရပ်သားများမှ ခွဲထုတ်လျှက် စခန်းသွင်း လေ့ကျင့်ပေးရာ နေရာများလည်း ဖြစ်သည်။ အဆောင်နေ ကျောင်းသားအချင်းချင်း အသိပညာ၊ အတတ်ပညာများ အနီးကပ် ဖလှယ်နိုင်သည့်အပြင် တစ်ကိုယ်ကောင်း စိတ်ဓာတ်များ ပပျောက်ကာ မိဝေးဖဝေး အချင်းချင်း ကူညီရိုင်းပင်းလျှက် ပရဟိတ စိတ်ထားများလည်း တိုးပွားလာစေနိုင်သည်။ ထို့ကြောင့် တက္ကသိုလ် အဆောင်များ ထားရှိရေးသည် နိုင်ငံနှင့် လူ့အဖွဲ့အစည်းအတွက် လွန်စွာ အရေးကြီးပါကြောင်း The Daily Eleven က ရေးသားအပ်ပါသည်။
နိုဝင်ဘာလ ၁၀ ရက်နေ့ထုတ် The Daily Eleven သတင်းစာ၏ အယ်ဒီတာ့ အာဘော်
Eleven Media Group