တမူးမြို့နယ်တွင် အသေးစားပေါက်ကွဲမှုဖြစ် အသေအပျောက်မရှိ

ပို့စ်တင်ချိန် - 11/21/2013 07:02:00 PM

21.11.2013

မုံရွာ၊ မဇ္ဈိမ။ ။ မြန်မာ - အိန္ဒိယ နယ်စပ် တမူးမြို့နယ် အောင်ဇေယျမြို့ သစ်တွင် နိုဝင်ဘာလ ၂၁ရက် နံနက် ၁နာရီ ၀၅ မိနစ်ခန့်က ပေါက်ကွဲမှု တစ်ခုဖြစ်ပွားသည်ဟု သနန်မြို့သစ်၊ မြို့နယ်ခွဲ အထွေထွေအုပ်ချုပ်ရေး ရုံးဝန်ထမ်းတစ်ဦးက မဇ္ဈိမကို ပြောသည်။လက်ရှိတွင် ဖောက်ခွဲသူများ နေထိုင်နိုင်သည်ဟု ယူဆရသည့် နေရာများသို့ ခလရ(၈၇)တပ်မှ ဦးစီး၍ အောင်ဇေယျနယ်မြေရဲစခန်းမှူးတို့က စုံစမ်းလျက်ရှိပြီး ပေါက်ကွဲမှု ဖြစ်ပွားခဲ့သည့် အိမ်ပိုင်ရှင်မှာ ဒေါ်ဝင်းတင်ဖြစ်ပြီး အိမ်ဈေးဆိုင်နှင့် သူမ၏ မိခင်ဖြစ်သူ ဒေါ်ပုတို့ဖြစ်သည် ဟု ရဲဌာန၏ မှတ်တမ်းတွင် ဖော်ပြထားသည်။

ထိုပေါက်ကွဲမှုကြောင့် လူအသေအပျောက် ထိခိုက်ဒဏ်ရာများ မရရှိ ခဲ့သော်လည်း ဒေါ်ဝင်းတင်၏ နေအိမ်အတွင်းရှိ စားပွဲဝိုင်းမှ ဖိုက်ဘာ ထိုင်ခုံ ငါးလုံး၊ မှန်ပြတင်တံခါး ရှစ်ချပ်နှင့် အိမ်းမိုးသွပ်ပြားတစ်ချပ်တို့ ပျက်စီး သွားခဲ့သည်။ ထို့အပြင် သူမ၏ မိခင်ဖြစ်သူ ဒေါ်ပု၏ နေအိမ် လှေကား ခုံများလည်း ပျက်စီးခဲ့သည်။

၂၀၁၂ခုနှစ်ကလည်း အဆိုပါဒေသတွင် သံကူကွန်ကရစ် သံဘေလီဘောင် တံတားတစ်စင်းအား အမည်မသိ လက်နက်ကိုင် အဖွဲ့တစ်ခုမှ မိုင်းထောင် ဖောက်ခွဲခဲ့သည့်အတွက် တံတား၏ ကိုယ်ထည်အစိတ်အပိုင်းများ ပျက်စီးဆုံးရှုံးခဲ့သည်။

Mizzima - News in Burmese