မြန်မာ - ထိုင်း ဗီဇာမဲ့ အပြန်အလှန် သွားလာခွင့် မကြာမီ ခွင့်ပြုမည်ဟု ထိုင်းသံအမတ်ကြီးဆို

ပို့စ်တင်ချိန် - 11/28/2013 12:08:00 PM

ရန်ကုန်၊ နိုဝင်ဘာ ၂၇

ထိုင်းနှင့် မြန်မာနှစ်နိုင်ငံ ပြည်ဝင်ခွင့် ဗီဇာမလိုဘဲ အခက်အခဲ အတားအဆီးမရှိ အပြန်အလှန် သွားလာခွင့်ကို မကြာမီ အချိန်အတွင်း ခွင့်ပြုတော့မည် ဖြစ်ကြောင်း မြန်မာနိုင်ငံ ဆိုင်ရာ ထိုင်းသံအမတ်ကြီး Mr. Pisanu Suvanajata က The Voice နှင့် သီးခြား တွေ့ဆုံရာတွင် အတည်ပြု ပြောကြားသည်။

ယင်းကိစ္စနှင့် ပတ်သက်၍ ဆွေးနွေးမှုများ ပြုလုပ် ထားပြီး ဖြစ်ကြောင်း နိုဝင်ဘာလ ၂၇ ရက်နေ့တွင် မြန်မာနိုင်ငံဆိုင်ရာ ထိုင်းသံရုံး၌ ၎င်းက ပြောကြားခဲ့ခြင်း ဖြစ်သည်။
“နယ်စပ်ဒေသမှာလည်း ပံ့ပိုးမှုတွေ ပိုများလာပါမယ်” ဟု Mr. Pisanu Suvanajata က ဆိုသည်။

ယခုနှစ်အတွင်း ထိုင်းနိုင်ငံသားများ မြန်မာနိုင်ငံသို့ လာရောက်မှုနှင့် မြန်မာနိုင်ငံသားများ ထိုင်းနိုင်ငံသို့ သွားရောက်မှုမှာ ယခင်နှစ်များထက် အဆပေါင်းများစွာ တိုးတက်လာကြောင်း ၎င်းက ဖြည့်စွက် ပြောကြားသည်။

ထိုင်း-မြန်မာပြည်ဝင်ခွင့် ဗီဇာ ကင်းလွတ်ခွင့်ကို ယခုတိုင် ခွင့်ပြုထားခြင်း မရှိသေးသော်လည်း ကင်းလွတ်ခွင့်ပြုပြီး ဖြစ်သည်ဟု ထင်မှတ်သူများ ရှိသဖြင့် ယင်းကိစ္စနှင့် ပတ်သက်၍ ဆွေးနွေးဆဲအဆင့်သာ ရှိသေးကြောင်း မြန်မာနိုင်ငံ ဆိုင်ရာ ထိုင်းသံရုံးတွင် သတင်းထုတ်ပြန် ထား သည်။

ယင်းကဲ့သို့ ဗီဇာကင်းလွတ်ခွင့် ပြုလိုက်ပါက နှစ်နိုင်ငံ ကုန်သွယ်ရေးနှင့် ခရီးသွား လုပ်ငန်းများ ပိုမိုတိုးတက်လာမည် ဖြစ်ပြီး နှစ်နိုင်ငံ ပြည်သူပြည်သားများ ပိုမိုထိတွေ့ ဆက်ဆံလာကာ နှစ်နိုင်ငံ သံတမန် ဆက်ဆံရေးကို သမိုင်းသစ် ဖွင့်လှစ်နိုင်မည် ဖြစ်ကြောင်း မစ္စတာ Pisanu က မှတ်ချက်ပြုသည်။

အလုပ်အကိုင် အခွင့်အလမ်း နည်းပါးသော မြန်မာနိုင်ငံကို အလုပ်အကိုင် အခွင့်အလမ်း ပေါများသော ထိုင်းနိုင်ငံက ပြည်ဝင်ခွင့်ဗီဇာ ကင်းလွတ်ခွင့် ပြုလိုက်ပါက မြန်မာနိုင်ငံသား အလုပ်လက်မဲ့များ ထိုင်းနိုင်ငံတွင်းသို့ စုပြုံ ဝင်လာနိုင်ပြီး လူမှုရေးနှင့် လုံခြုံရေး ဆိုင်ရာ နောက်ဆက်တွဲ ပြဿနာများ ပေါ်ပေါက်စေနိုင်သဖြင့် ထိုင်းနိုင်ငံဘက် ယင်းပြည်ဝင်ခွင့် ကင်းလွတ်ရေးကို အချိန်ယူ ဆွေးနွေး ညှိနှိုင်းနေခြင်း ဖြစ်နိုင်ကြောင်း အလုပ်သမားအရေး စောင့်ကြည့် လေ့လာသူများက သုံးသပ်သည်။

ထိုင်းနိုင်ငံသို့ အလုပ်သွားလုပ်သည့် မြန်မာနိုင်ငံသား ရွှေ့ပြောင်းလုပ်သား သုံးသန်းအထိ ရှိပြီး ယင်းပမာဏမှာ ထိုင်းနိုင်ငံရှိ ရွှေ့ပြောင်း လုပ်သား အားလုံး၏ ၈၀ ရာခိုင်နှုန်း ရှိကြောင်း ရွှေ့ပြောင်း အလုပ်သားစာရင်း ကောက်ယူသူများက ခန့်မှန်းသည်။

The Voice Weekly