မန္တလေးတိုင်းတွင် လျှပ်စစ်ဓာတ်အားပေး စက်ရုံနှစ်ရုံ နွေရာသီအမီ တည်ဆောက်မည်ဟုဆို

ပို့စ်တင်ချိန် - 11/10/2013 06:25:00 PM

မန္တလေး၊ နိုဝင်ဘာ ၉

မန္တလေးတိုင်းဒေသကြီး မြင်းခြံနှင့် မိတ္ထီလာခရိုင်တို့အတွင်း နေရောင်ခြည် စွမ်းအင်သုံးနှင့် သဘာဝဓာတ်ငွေ့သုံး လျှပ်စစ်ဓာတ်အား ထုတ်သည့် စက်ရုံနှစ်ရုံ လာမည့် နွေရာသီအမီ အပြီးတည်ဆောက် မည် ဖြစ်ကြောင်း မြန်မာ့လျှပ်စစ်ဓာတ်အား ဖြန့်ဖြူးရေးလုပ်ငန်း တိုင်းလျှပ်စစ် အင်ဂျီနီယာဌာနထံမှ သိရသည်။

မဂ္ဂါဝပ် ၂၅၀ စီ ထုတ်လုပ်နိုင်မည့် အဆိုပါ စက်ရုံနှစ်ရုံကို မြင်းခြံခရိုင် နဗူးအိုင်ရွာတွင် ဆိုလာမှ ထုတ်လုပ်မည့် လျှပ်စစ်ဓာတ်အားပေး စက်ရုံကို လည်းကောင်း၊ မိတ္ထီလာခရိုင် အတွင်းရှိ ဝမ်းတွင်းမြို့နယ်နှင့် သာစည်မြို့နယ်ကြားတွင် သဘာဝဓာတ်ငွေ့မှ လျှပ်စစ်ဓာတ်အား ထုတ်လုပ်မည့် စက်ရုံကို လည်းကောင်း တည်ဆောက်မည် ဖြစ်ကြောင်း အဆိုပါ ဌာနထံမှ စုံစမ်းသိရှိရသည်။

ဆိုလာ လျှပ်စစ်ဓာတ်အား စက်ရုံမှ ထွက်ရှိသော လျှပ်စစ်ဓာတ်အားကို မြင်းခြံခရိုင်ရှိ သပြေဝခွဲရုံသို့ ပို့လွှတ်မည် ဖြစ်ပြီး သဘာဝဓာတ်ငွေ့သုံး စက်ရုံမှ ထွက်ရှိသော လျှပ်စစ်ဓာတ်အားကို မိတ္ထီလာခရိုင် ဘဲလင်းခွဲရုံသို့ ပို့လွှတ်မည် ဖြစ်ကြောင်း အဆိုပါဌာနထံမှ ထပ်မံသိရှိရသည်။
“လုပ်ချင်တာကတော့ ဒီနှစ်နွေရာသီ အမီပဲ။ ဒါပေမဲ့ ဘတ်ဂျက် အခြေအနေပေါ်မှာ ကြည့်ပြီး ဆောင်ရွက်ရမှာပါ” ဟု တိုင်းလျှပ်စစ် အင်ဂျီနီယာဌာနမှ အဆင့်မြင့် အရာရှိတစ်ဦးက ပြောကြားသည်။

မန္တလေးတိုင်းဒေသကြီးတွင် နွေရာသီကာလတွင် လျှပ်စစ်ဓာတ်အား သုံးစွဲမှုပမာဏမှာ မဂ္ဂါဝပ် ၄၀၀ ကျော် ရှိကြောင်း တိုင်းဒေသကြီး လျှပ်စစ်အင်ဂျင်နီယာ စာရင်းများအရ သိရသည်။
The Voice Weekly