ရေကျိုငါးပိ ပြဿနာ ထပ်မံပေါ်လာပါက ငါးပိ လုပ်ငန်းရှင်အသင်း တာဝန်ယူမည်

ပို့စ်တင်ချိန် - 10/14/2013 05:43:00 PM

ရန်ကုန်၊ အောက်တိုဘာ ၁၃

ရန်ကုန်မြို့တော်တွင် ရေကျိုငါးပိနှင့် ပတ်သက်သော ပြဿနာများ ထပ်မံပေါ်ပေါက်ပါက မြန်မာနိုင်ငံ ငါးပိ၊ ငါးခြောက်၊ ငံပြာရည် လုပ်ငန်းရှင်များ အသင်းက တာဝန်ယူ ဖြေရှင်းပေးမည် ဖြစ်ကြောင်း အောက်တိုဘာလ ၁၃ ရက်နေ့ ပန်ဒါဟိုတယ်တွင် ပြုလုပ်သော ပြည်သူများ ဘေးကင်းလုံခြုံ စိတ်ချစွာ စားသုံးနိုင်သော ရေကျိုငါးပိ ဈေးကွက် ပေါ်ထွန်းရေး အလုပ်ရုံ ဆွေးနွေးပွဲ၌ အဆိုပါအသင်း ဒုတိယဥက္ကဋ္ဌ ဦးခင်လတ်က ပြောကြားသည်။

လက်ရှိ အချိန်တွင် ငါးပိ ၊ ငါးခြောက်၊ ငံပြာရည် လုပ်ငန်းရှင်များ အသင်းတွင် အသင်းဝင် နှစ်ရာနီးပါး ရှိပြီး အသင်းဝင်တိုင်း၏ စားသောက်ကုန် အရည်အသွေးကို အသင်းက တာဝန်ယူ စစ်ဆေးပေးထားကြောင်း ၎င်းက ထပ်လောင်းပြောကြားသည်။

ရေကျိုငါးပိတွင် ယူရီးယား တွေ့ရှိသည်ဆိုသော စားသုံးသူ ကာကွယ်ရေး အသင်း၏ ထုတ်ပြန်ချက်ကြောင့် ငါးပိ ဈေးကွက် ရောင်းအား နှစ်ဆ နီးပါး လျော့ကျခဲ့ရာက စားသုံးသူများအတွက် လုံခြုံစိတ်ချမှု ရှိသော သန့်ရှင်းသော ငါးပိဈေးကွက် ပေါ်ပေါက်ရန် အောက်တိုဘာလ ၁၃ ရက်နေ့တွင် ပြုလုပ်သည့် ဆွေးနွေးပွဲ၌ ငါးပိလုပ်ငန်းရှင်များ၊ စားသုံးသူ ကာကွယ်ရေးအသင်း၊ ဇီဝဓာတု ပညာရှင်များနှင့် စားသုံးသူများ စုစည်းကာ ပထမဆုံး အဖြေရှာခဲ့ခြင်း ဖြစ်သည်။
“ကျွန်တော်တို့က အခုဆို အချိုမှုန့်ရော၊ ကြက်သားမှုန့်ကိုပါ ရှောင်ထားကြတယ်။ အဓိက ငါးပိ၊ ငံပြာရည် တို့ကိုပဲ အားကိုးပြီး သုံးနေရတာပါ။ ဒါကိုရောင်းတဲ့ လုပ်ငန်းရှင်တွေက တာဝန်ယူ ပေးနိုင်ရင် ကောင်းမယ်” ဟု စားသုံးသူတစ်ဦးက ဆိုသည်။

ယင်းကြောင့် စားသုံးသူ ကာကွယ်ရေး အသင်းက စားသုံးသူများ၏ အခွင့်အရေးနှင့် အန္တရာယ် ဖြစ်စေမည့် အရာများကို အခါအခွင့် သင့်တိုင်း ထုတ်ပြန်သွားမည် ဖြစ်ကြောင်း အဆိုပါ အသင်း၏ အတွင်းရေးမှူး ဒေါက်တာရီလွင်ကျော်က ပြောကြားသည်။

မြန်မာနိုင်ငံ ငါးပိ၊ ငါးခြောက်၊ ငံပြာရည် လုပ်ငန်းရှင်များ အသင်းကို ဒဂုံမြို့သစ် (အရှေ့ပိုင်း) မြို့နယ်တွင် တည်ထောင်ထားပြီး အကျယ်အဝန်းအားဖြင့် မြေဧက ၉၀၀ ကျော် ရှိကြောင်း၊ ဧရာဝတီတိုင်းဒေသကြီးဘက်က ရရှိသော ငါးများကို ငါးပိအဖြစ် အဆင့်ဆင့် ပြုလုပ်ကာ တစ်နိုင်ငံလုံးကို ဖြန့်ဖြူး ရောင်းချနေကြောင်း ငါးပိလုပ်ငန်းရှင်များထံမှ သိရသည်။
The Voice Weekly