ဧရာဝတီ မြစ်ရေချိန်သည် မန္တလေးနှင့် စစ်ကိုင်းမြို့တို့၏ စိုးရိမ်ရေမှတ် ကျော်လွန်ရောက်ရှိနေပြီး တောင်သမန်အင်း အပါအ၀င် ကျေးရွာအများအပြား ရေနစ်မြုပ်

ပို့စ်တင်ချိန် - 9/15/2013 11:34:00 AM

ဧရာဝတီ မြစ်ရေချိန်သည် မန္တလေးမြို့နှင့် စစ်ကိုင်းမြို့တို့၏ စိုးရိမ်ရေမှတ်သို့ ကျော်လွန်ရောက်ရှိနေပြီး အနီးဝန်းကျင်ရှိ ကျေးရွာအများအပြားတွင် လူနေအိမ်ခြေများ ရေ၀င်နစ်မြုပ်လျက်ရှိကြောင်း သိရသည်။

ဧရာဝတီမြစ်ရေ တိုးသည့်အတွက် တောင်သမန်အင်း တွင်လည်း ရေမျက်နှာပြင် မြင့်တက်ကာ တောင်သမန် ကန်ပတ်လမ်း ရေကျော်ခြင်းနှင့် တောင်သမန် ကျေးရွာစဉ် တစ်လျှောက်လုံး၌ အနည်းဆုံး သုံးပေခန့် ရေ၀င်နစ်မြုပ်လျက် ရှိသည်။ "၂၀၀၄ ခုနှစ်က အင်းရေတက်လို့ ရွာတွေအကုန်လုံးလည်း ရေမြုပ်တယ်။ အဲဒီတုန်းက အင်းရေက ဦးပိန်တံတားပေါ်ထိ ကျော်လွန်သွားခဲ့တာ။ ခုရေ၀င်တာက နှစ်ရက်လောက်ပဲ ရှိသေးပြီး ရွာတွေထဲမှာ ၃ ပေ ၄ ပေလောက် ရှိနေပြီ" ဟု တောင်သမန် ရွာခံတစ်ဦးက ဆိုသည်။

ဧရာဝတီမြစ်ရေသည် မန္တလေးမြို့တွင် စက်တင်ဘာ ၁၃ ရက်က ယင်းမြို့၏ စိုးရိမ်ရေမှတ် ၂၃၀ စင်တီမီတာအထက် ကျော်လွန်ကာ ၂၃၁ ဒသမ ၀၄ စင်တီမီတာသို့ ရောက်ရှိခဲ့ပြီး စက်တင်ဘာ ၁၄ ရက်တွင် ၂၃၁ ဒသမ ၂၇ စင်တီမီတာသို့ ဆက်လက်မြင့်တက်ခဲ့ကြောင်း၊ ထို့အတူ စစ်ကိုင်းမြို့၌ စက်တင်ဘာ ၁၃ ရက်တွင် ယင်းမြို့၏ စိုးရိမ်ရေအမှတ်အထက် ၂ စင်တီမီတာသို့ ရောက်ရှိခဲ့ပြီး မြို့အနောက်ခြမ်းကျသော ဒေါင်းမ၊ ကြွယ်လူး၊ သလွန်ဖြူ၊ ဆင်မြေ၊ တဲကြီး၊ သဖြူး၊ မအူပင် စသည့်ကျေးရွာ များတွင် မြစ်ရေ၀င်ရောက်မှုကြောင့် မူလတန်းကျောင်းနှင့် အလယ်တန်းကျောင်းများ ပိတ်ထားခဲ့ကြောင်း သိရသည်။

"ခုချိန်က ကောက်ကြီးစပါး စိုက်ထားကြတာ။ ခုလို ရေမ၀င်တာ ကြာပါပြီ။ ရေနစ်မြုပ်တာ ကြာရင်တော့ စိုက်ထားတာတွေ ပျက်စီးဖို့ များတယ်။ ခုတောင် ရေ၀င်ရက်က ၅ ရက်လောက် ရှိနေပြီ" ဟု မအူပင်ကျေးရွာသား တစ်ဦးက ဆိုသည်။

စစ်ကိုင်းမြို့ ဧမြ၀တီရပ်ကွက်တွင်လည်း အိမ်ခြေ ၁၀၀ ကျော် ရေနစ်မြုပ်မှုကြောင့် လူဦးရေ ၆၀၀ ခန့်အား ညောင်ပင်သာ ဘုန်းတော်ကြီးကျောင်းဝင်းအတွင်း ပြောင်းရွှေ့နေရာ ချထားပေးလျက် ရှိသည်။ ထို့အတူ ဧရာဝတီမြစ်နှင့် ဒုဌ၀တီမြစ်ဆုံရာ နေရာတွင်ရှိသော တံတားဦး၊ အင်းဝဒေသ တစ်လျှောက်လုံး တွင် မြစ်နှစ်စင်း လုံး မြစ်ရေမြင့်တက် နေမှုကြောင့် စိုက်ပျိုးမြေများ အပါအ၀င် လူနေအိမ်ခြေများ၌လည်း ရေ၀င်နစ်မြုပ်ကာ ပျက်စီးဆုံးရှုံးမှု များနိုင်ကြောင်း စုံစမ်းသိရပါသည်။

မန္တလေးမြို့ ကမ်းနားလမ်းတစ်လျှောက်တွင် မြစ်ရေတိုးမှုဒဏ်ကို ကာကွယ်ရန် အောင်မြေသာစံမြို့နယ်၊ ကျွဲစွန်း ဆိပ်ကမ်း မြောက်ဘက်တာပေါင် တစ်လျှောက်တွင် သဲအိတ်ချထားခြင်းများ ပြုလုပ်လျက်ရှိကြောင်း သိရသည်။

(တောင်သမန်အင်း အတွင်းရှိ ရေနစ်မြုပ်နေသော ဆိုင်ခန်းအချို့နှင့် ဦးပိန်တံတားအား တွေ့ရစဉ်)
Eleven Media Group