အလောင်းရှာမတွေ့သည့် လူသတ်မှု မြိတ်လူထု အထူးစိတ်ဝင်စား
ပို့စ်တင်ချိန်
- 8/21/2013 04:55:00 PM
လွန်ခဲ့သော ၁၆ နှစ်ခန့်က တနင်္သာရီတိုင်းဒေသကြီး မြိတ်မြို့နယ်ရှိ ရော်ဘာခြံပိုင်ရှင်တစ်ဦး၏ ရော်ဘာ ခြံတွင် ရော်ဘာခြံ အလုပ်သမား တစ်ဦး ပျောက်ဆုံးသွားခဲ့သည်။ ထိုအလုပ်သမား ပျောက်ဆုံး သွားခြင်း အတွက် မိခင်ဖြစ်သူက ၂၀၁၃ခုနှစ် မေ ၂၆ ရက်တွင် မြိတ်မြို့နယ် သမုတ်ရဲစခန်းတွင် အရေးယူပေးပါရန် တိုင်ကြား ခဲ့ကြောင်း သိရသည်။
ကြားနာ
အဆိုပါအမှုကို မြိတ်ခရိုင် တရားရုံးမှ ၁၈/၇/၂၀၁၃ ရက်စွဲပါ စာအမှတ် ၅၉/၂၀၁၃ ဖြင့်လက်ခံ၍ ၁၅/၈/၂၀၁၃ ရက်အထိ တရားလိုပြသက်သေ ၁၀ ဦးကို မြိတ်ခရိုင်တရားရုံးရှိ မြိတ်လူထုရှေ့မှောက်တွင် စစ်ဆေးကြားနာခဲ့သည်။ အမှုကို ရာဇသတ်ကြီးပုဒ်မ ၃၀၂/၂၀၁ တို့ဖြင့် လူသတ်မှု အလောင်း ဖျောက်ဖျက်မှုတို့ဖြင့် ရုံးတင် စစ်ဆေးခဲ့သော်လည်း သက်သေများ၏ ထွက်ဆိုချက်များ အရ ရော်ဘာခြံအလုပ်သမား စောဒါးမြဆိုသူ မူးယစ်သောက်စားပြီး ရော်ဘာပင်များအား ဖျက်ဆီးသဖြင့် ရော်ဘာခြံ ၀န်ထမ်းများက ဖမ်းဆီးပြီး ရဲစခန်းသို့ သွားရောက်ပို့ဆောင်ခဲ့ခြင်းဖြစ်ကြောင်း သိရသည်။
စစ်ဆေးချက်
ပျောက်ဆုံးသွားသော ရော်ဘာခြံ အလုပ်သမား၏ မိခင် ဒေါ်နော်ဘောဝါ (ခ) ဒေါ်ဝါ၏ တရားရုံးတွင် ထွက်ဆိုချက်အရ လွန်ခဲ့သော ၁၆ နှစ်က မတိုင်ကြားခဲ့ခြင်းမှာ နယ်မြေဒေသ မအေးချမ်း၍ ဖြစ်ကြောင်း ယခုမှ တိုင်ကြားခြင်းမှာ တိုင်းဒေသကြီး ၀န်ကြီး တစ်ဦး၏ အမှုဖွင့် တိုင်ကြားရန် ပြောဆို တိုက်တွန်းချက် အရ တိုင်ကြားရခြင်းဖြစ်ကြောင်း တရားရုံး၏ စစ်ဆေးချက်များအရ သိရှိရသည်။ ထို့ပြင် သက်ဆိုင်ရာ တာဝန်ရှိသူများက လူသေအလောင်းမြှုပ်နှံသည်ဟု ယူဆရသော နေရာ နှစ်နေရာကိုလည်း နှစ်ကြိမ်တိုင် သွားရောက် တူးဖော် စစ်ဆေးခဲ့သော်လည်း လူသေအလောင်း မတွေ့ရှိခဲ့ကြောင်း သိရသည်။
အဆုံးအဖြတ်
ယင်းအမှုနှင့်ပတ်သက်၍ သံသယ တရားခံများ အဖြစ် ရော်ဘာခြံ ၀န်ထမ်းများဖြစ်သော ဦးသန်းခင်၊ ဦးလှိုင်ကြူတို့မှာ ဖမ်းဆီးခြင်း ခံနေရပြီး ရော်ဘာခြံ လုပ်ငန်းရှင် ဦးအောင်လင်းမှာ နိုင်ငံခြားတွင် ဆေးဝါးကုသမှု ခံယူနေကြောင်း သိရသည်။ လူသတ်မှု၊ အလောင်းဖျောက်ဖျက်မှုတို့ဖြင့် စွပ်စွဲခြင်းခံနေရသော သံသယရှိသူ သုံးဦးအတွက် ထိုသူများ၏ မိသားစုများ ဘ၀တူ အလုပ်သမားများ အမှန်တရားကို လိုလားကြသော မြိတ်မြို့နယ် လူထုများက အဖြစ်မှန်ကို ဖော်ထုတ်၍ တရားရုံးမှ တရားမျှတစွာ အဆုံးအဖြတ်ပေးနိုင်ရန် မျှော်လင့် စောင့်စားနေ ကြကြောင်း သိရသည်။
ကျော်ဇော၊ မြိတ်၊ သြဂုတ် -၁၉
မြိတ်ပုလဲမြေ
(၂၀၁၃ ခုနှစ်၊ သြဂုတ်လ ၂၀ ရက်နေ့ထုတ် စံတော်ချိန် နေ့စဉ် အတွဲ (၁)၊ အမှတ် (၁၂၉) ဂျာနယ်မှ ကူးယူဖော်ပြသည်။)
