ကင်ဆာရောဂါ အဖြစ်အများဆုံး (၁၀)နိုင်ငံတွင် မြန်မာနိုင်ငံ ပါဝင်နေပြီး ဓာတုဆေး အသုံးပြုထားသော စားသောက်ကုန်များကြောင့် အဖြစ်အများဆုံးဟု သိရ

ပို့စ်တင်ချိန် - 8/14/2013 09:09:00 AM

အရောင်တင်ဆေး အသုံးပြုထားသော နနွင်းမှုန့်၊ ငရုတ်သီးမှုန့်များကို တွေ့ရစဉ် (ဓာတ်ပုံ-မို့မို့)
ကမ္ဘာ့ကျန်းမာရေး အဖွဲ့ကြီးမှ ထုတ်ပြန်ထားသော စာရင်းအရ မြန်မာနိုင်ငံသည် ကင်ဆာရောဂါ အဖြစ်အများဆုံး (၁၀) နိုင်ငံစာရင်းတွင် ပါဝင်နေပြီး ဓာတုဆေးဝါး မလွတ်ကင်းသော စားသောက်ကုန်များကြောင့် အများဆုံးဖြစ်ကြောင်း မြန်မာနိုင်ငံ စားသုံးသူ ကာကွယ်ရေးအသင်းမှ သိရသည်။
လက်ရှိမြန်မာနိုင်ငံတွင် ဓာတုဆိုးဆေးများ၊ အရောင်တင်ဆေးများဖြင့် ဟင်းသီးဟင်းရွက်များနှင့် စားသောက်ကုန်များကို ၀ယ်ယူသူများအောင် ပြုလုပ်နေကြပြီး ထိုစားသောက်ကုန်များကို ကြာရှည်စားသုံးပါက အစာအိမ် အူလမ်းကြောင်းကင်ဆာ၊ အူမကြီးကင်ဆာ၊ အသည်းကင်ဆာတို့ကို ဖြစ်ပွားစေနိုင်ကြောင်း သိရသည်။
ထို့အပြင် ကလေးငယ်အများစု တိုက်ကျွေးလျက်ရှိသော နို့မှုန့်များသည် တရုတ်နိုင်ငံမှ အ၀င်များပြီး အန္တရာယ်များသော အကြောဆွဲနိုင်သည့် မယ်လမင်းဓာတ်များ ပါဝင်နေကြောင်း၊ ကော်ဖီမစ်နှင့် Creamer များတွင်လည်း ကဖိန်း၊ အုန်းသီးခွံအမှုန့်များ ထည့်သွင်းထားသောကြောင့် ကျောက်ကပ်ပျက်စီးခြင်း၊ ရင်သားကင်ဆာ၊ ဆီးကျိတ်ကင်ဆာ၊ အမျိုးသမီးများ ကိုယ်ဝန်မဆောင်နိုင်သည်အထိ ဖြစ်စေနိုင်ကြောင်း သိရသည်။
"ယခုနောက်ပိုင်း တချို့ပြည်တွင်းထုတ်ကုန်တွေမှာ Expire Date ကို ပြန်ပြင်ပြီးတော့ ဆိုင်တွေမှာ တင်တာတွေ ရှိလာတယ်။ စားသုံးသူတွေက Date ကိုကြည့်ပြီး ၀ယ်စားတာ များတဲ့အတွက်ကြောင့် အထဲမှာ မှိုတက်နေတာကို မသိနိုင်ပါဘူး။ အဲတော့ ဖြစ်စေချင်တာက Date လွန်နေတဲ့ဟာ ၀ယ်မိပြီဆိုရင် ဆိုင်ကိုချက်ချင်း ပြန်ပြောပါ။ ပြန်ပြောမှ ဆိုင်ကနောက်ဆိုရင် သေချာစစ်ပြီး ကုန်ပစ္စည်းကို ဆိုင်ပေါ်တင်ရင် စားသုံးတဲ့သူလည်း အန္တရာယ် မရှိနိုင်တော့ဘူး။ Date ပြောင်းတဲ့ ကုမ္ပဏီကလည်း နောက်ဆိုမလုပ်ရဲ တော့ဘူးပေါ့။ အဓိက နယ်စပ်က ၀င်လာတဲ့ ကုန်ပစ္စည်း အများစုကို မသိဘဲ စားမိတဲ့သူတွေ၊ ဆိုင်ပေါ်တင်မိတဲ့ သူတွေကြောင့် ကင်ဆာရောဂါ ရှိသူဦးရေ တိုးပွားလာရတာပါ" ဟု မြန်မာနိုင်ငံ စားသုံးသူ ကာကွယ်ရေးအသင်း အတွင်းရေးမှူး၊ ဒေါက်တာရီလွင်ကျော်ဇော၏ ပြောကြားချက်အရ သိရသည်။
ကင်ဆာရောဂါ ဖြစ်ပွားမှုကို လျော့ကျနိုင်စေရန် ဓာတုပစ္စည်း ပါဝင်သည့် စားသောက်ကုန်များအပြင် ကင်ဆာဓာတ်ကို ဖြစ်ပွားစေနိုင်သော လူသုံးကုန် ပစ္စည်းများဖြစ်သည့် ပလတ်စတစ်အိတ်၊ တစ်ခါသုံးဖော့ဘူးများ၊ ခြင်ဆေးခွေ၊ ဖိုက်ဘာပစ္စည်းများကို အသုံးပြုခြင်းမှ ရှောင်ကြဉ်ရန် မြန်မာနိုင်ငံ စားသုံးသူကာကွယ်ရေး အသင်းမှ တိုက်တွန်းအကြံပြုထားကြောင်း သိရသည်။
Eleven Media Group