မဝင်းမော်ဦး၏မိခင် ဒေါ်ခင်ဌေးဝင်းနှင့်တွေ့ဆုံခြင်း

ပို့စ်တင်ချိန် - 8/11/2013 03:02:00 AM

ရှစ်လေးလုံး အရေးတော်ပုံတွင် သေဆုံးခဲ့သူများ၌ ကမ္ဘာကျော်ဓာတ်ပုံ ဖြစ်သည့် မျက်မှန် (နိုင်ငံကျော်အဆိုတော် ထူးအိမ်သင်နှင့် တူသည်ဟုဆိုသည်) လူငယ်ဆရာဝန်နှစ်ဦး သယ်ဆောင်လာသည့် အသက် ၁၆ နှစ်အရွယ် အဋ္ဌမတန်းကျောင်းသူ မဝင်းမော်ဦး၏ မိခင် ဒေါ်ခင်ဌေးဝင်းနှင့် ရှစ်လေးလုံး ငွေရတုအခမ်းအနားတွင် တွေ့ဆုံမေးမြန် ခဲ့သည်များကို ကောက်နုတ် ဖော်ပြအပ်ပါသည်။

Voice ။ ။ ရှစ်တန်းကျောင်းသူ တစ်ယောက်က ရှစ်လေးလုံးအရေးတော်ပုံမှာ ဘယ်လို အကြောင်းနဲ့ ပါဝင်ဖြစ်သွားသလဲ ဆိုတာ မှတ်မိသလောက် ပြောပြပါဦး။

DKHW ။ ။ မဝင်းမော်ဦးက အန်တီနဲ့ ဈေးကူရောင်းပေးတယ်။ ၈၈အရေးအခင်း ကာလတစ်လျှောက်မှာ ဈေးဆိုင်ရှေ့ကနေ လူအုပ်စုလိုက် ချီတက်ပြီးတော့ ဆန္ဒပြနေ တာကို မြင်ကတည်းက သမီးက စိတ်ပါနေတာ ဘယ်လိုပဲတားတား သမီးကမရဘူး။ နောက်ပိုင်းစစ်တပ်က အာဏာသိမ်းပြီး နောက်ပိုင်း ဆန္ဒပြတဲ့သူတွေကို ပစ်နေတဲ့အကြောင်း ပြောပေမယ့် သမီးကတားလို့ မရတော့ဘူး။ သူ့သူငယ်ချင်းတွေနောက် လိုက်လိုက်သွားတာ။ နောက်ပိုင်း သမီးက အသေခံ တိုက်ပွဲဝင်မယ်လို့ ပြောလာတယ်။

Voice ။ ။ မဝင်းမော်ဦး သေဆုံးသွားတာကို အန်တီတို့ ဘယ်လိုသိလဲ ဘယ်သူ တွေလာပြောတာလဲ။

DKHW ။ ။ စက်တင်ဘာ ၁၉ ရက်နေ့က ည ၁၀ နာရီထိ အိမ်ကိုပြန်မလာတာနဲ့ ကျောင်းကို သွားစုံစမ်းတော့ မနက်က ဆန္ဒပြတဲ့အဖွဲ့ နဲ့အတူ ဗိုလ်ချုပ်ဓာတ်ပုံ ကိုင်ပြီးပါသွားတယ်လို့ ကျောင်းနားမှာနေတဲ့ လူတွေပြောမှ သိရတာ။ နောက်သူ့ကို ကယ်လိုက်တဲ့ ဆရာဝန်က အိမ်ကို ဖုန်းဆက်ပြီး အကြောင်းကြားလို့ ဝင်းမော်ဦး ဆေးရုံတင်ထားရမှန်း သိရတယ်။ ကုန်သည်လမ်း ထောင့်မှာ အပစ်ခံရတာ။ ညာဘက်ဒူး၊ ဘယ်ဘက်ပေါင်နဲ့ ဘယ်ဘက်လက်မောင်း ကိုဖောက်ပြီး အဆုတ်ကို ထိသွားတာ။ အဲဒီ ဒဏ်ရာကြောင့်ပဲ ဆုံးသွားရတာ။

Voice ။ ။ လူထုခံစားချက်တွေ ရေးခွင့်ပြုထားတဲ့ နေရာမှာ ဒီမိုကရေစီအစစ် ရမှ မဝင်းမော်ကို အမျှဝေမယ်လို့ လူအတော်များများ ရေးထားတာ တွေ့ရပါတယ်။ အန်တီတို့ရော သမီးအတွက် အမျှဝေပြီးပလား။

DKHW : ။ ။ မသေခင်မှာ သမီးက မှာသွားတယ်။ စစ်မှန်တဲ့ဒီမိုကရေစီ မရသေးသရွေ့ သမီးအတွက် အမျှမဝေပါနဲ့တဲ့။ သမီး သေဆုံးသွားခဲ့တာ ၂၅နှစ် ကြာသွားပေမယ့် ယနေ့အချိန်ထိ သမီးအတွက် ဘာလို့ အမျှမဝေလဲဆိုတော့ လက်ရှိနိုင်ငံရေးအပေါ် ယုံကြည်မှု မရသေးလို့ပါ။ ထောင်တွင်း နိုင်ငံရေးအကျဉ်းသားတွေ ကျန်ရှိနေသေး တာရယ်၊ နယ်စပ်တွေမှာ စစ်ပွဲများ ဆက်လက် ဖြစ်ပွားနေတာရယ်ကို ကြည့်တာနဲ့ အန်တီ့သမီး မျှော်လင့်ခဲ့သော စစ်မှန်သော ဒီမိုကရေစီ မရရှိသေးဘူးလို့ ယူဆလို့ အမျှ မပေးသေးတာပါ။

Voice ။ ။ ဒီမိုကရေစီ အရေးတော်ပုံကြီးမှာ ရှစ်တန်းကျောင်းသူ အဖြူအစိမ်းဝတ် ကျောင်းသူတစ်ဦး သေနတ်ဒဏ်ရာနဲ့ သေဆုံးခဲ့ရတာနဲ့ ပတ်သက်လို့ တော်တော်များများ စိတ်မကောင်းဖြစ်ရတယ် စိတ်ထိခိုက်ကြတယ်။ အဲဒါနဲ့ ပတ်သက်လို့ နည်းနည်းပြောပေးပါ။

DKHW : ။ ။ ဘောပင်ပဲ ကိုင်တတ်တဲ့ ကျောင်းသူလေးက ရှစ်လေးလုံး အရေးတော်ပုံ မှာ အသက်ပေးပြီး တိုက်ပွဲဝင်ခဲ့တာ ၂၅နှစ်ကြာပြီ။ ဒါပေမဲ့ ၂၅ နှစ်ကြာပေမယ့် သမီး မျှော်လင့်ခဲ့သော ဒီမိုကရေစီအစစ် ယနေ့ထိ မရသေးတာကြောင့် မဝင်းမော်ဦး အသက်ပေးပြီး တိုက်ပွဲဝင်ခဲ့တာ ထိုက်တန်တယ်လို့ မယူဆနိုင်သေးပါဘူး။ အန်တီ ခံစားခဲ့ရသလိုမျိုး ကျန်အမေတွေ ဒီခံစားမှုမျိုး ထပ်မရှိ ကြပါစေနဲ့လို့ အမြဲ ဆုတောင်းနေပါတယ်။
(စကားပြောနေရင်း မျက်ရည်များ သိသိသာသာ ရစ်ဝဲလာသည်။)

(ခိုင်စိုးလင်း)
The Voice Weekly