ကုန်သွယ်မှုဆိုင်ရာ အခွန်သက်သာခွင့်ကြောင့် အီးယူနိုင်ငံများမှ မြန်မာ့ဆန် စတင်ဝယ်ယူနေ

ပို့စ်တင်ချိန် - 7/05/2013 09:49:00 AM

ဂျပန်ဆိပ်ကမ်းသို့ ရောက်ရှိလာသည့် မြန်မာ့ဆန်များကို သယ်ယူနေစဉ် (Photo:MAPCO)

ဥရောပသမဂ္ဂမှ မြန်မာနိုင်ငံသို့ ပေးအပ်သည့် ကုန်သွယ်မှုဆိုင်ရာ အခွန်သက်သာခွင့်ကြောင့် အီးယူနိုင်ငံများမှ မြန်မာ့ဆန် စတင်ဝယ်ယူနေပြီ ဖြစ်ကြောင်း မြန်မာနိုင်ငံ ဆန်စပါး အသင်းချုပ်မှ သိရသည်။
အလားတူ ဂျပန်နိုင်ငံမှ မြန်မာ့ဒေသ မျိုးရင်း ဆန်စပါးများ ဖြစ်သော ဆင်းသွယ်လတ်၊ မှော်ဘီ-၂၊ အင်းမရဲဘော် ဆန်များကို တိုးမြှင့်ဝယ်ယူမည် ဖြစ်ကြောင်း ဂျပန်နိုင်ငံသို့ ဆန်များတင်ပို့နေသည့် မြန်မာ့ လယ်ယာစီးပွား အများပိုင် ကော်ပိုရေးရှင်းထံမှ သတင်းရရှိသည်။
''ဂျပန်ဈေးကွက်ဟာ စစ်ဆေးမှုများပြီး တင်းကျပ်တဲ့ ဈေးကွက်တစ်ခုပါ။ အခု အဲဒီဈေးကွက်ကို တန် ၅၀၀၀ အောင်မြင်စွာ တင်ပို့နိုင်ခဲ့တဲ့အတွက် မြန်မာ့ဆန်ဟာ အလားအလာ ကောင်းတဲ့ အနေအထားမှာ ရှိနေပါတယ်။ ဒါ့အပြင် အခုဆိုရင် အီးယူရဲ့ ကုန်သွယ်မှုဆိုင်ရာ အခွန်သက်သာခွင့်တွေကြောင့် မြန်မာ့ဆန်ကို အီးယူဈေးကွက်က စတင်ဝယ်ယူနေပါပြီ။ စပိန်၊ ဘယ်လ်ဂျီယံ၊ ပေါ်တူဂီစတဲ့ နိုင်ငံတွေက ၂၅ မှတ်၊ ၁၅ မှတ်၊ ၅ မှတ် ဆန်တွေအပြင် ဆန်ကွဲတွေပါ ၀ယ်ယူနေပါတယ်။ မြန်မာ့ဆန် FOB ဈေးက တစ်တန်ကို အမေရိကန်ဒေါ်လာ ၃၅၀ ဆိုရင် အခွန်သက်သာခွင့် အတွက် ဒေါ်လာ ၂၀၀ ပြန်ရမှာ ဖြစ်တဲ့အတွက် မြန်မာ့ဆန်ဈေးက ဒေါ်လာ ၁၅၀ နဲ့ ၀ယ်ရတဲ့ သဘောမျိုး ဖြစ်နေတယ်။ GSP အခွန် သက်သာခွင့်ကြောင့် အီးယူဈေးကွက်ကလည်း မြန်မာ့ဆန်ကို စတင်ဝယ်လာတာပါ'' ဟုလည်း မြန်မာနိုင်ငံ ဆန်စပါး အသင်းချုပ်မှ တာဝန်ရှိသူ တစ်ဦးက ပြောကြားခဲ့သည်။
ဂျပန်နုိုင်ငံသို့ ၄၅ နှစ်အတွင်း ပထမဦးဆုံး ပြန်လည်တင်ပို့ ရောင်းချသည့် မြန်မာ့ မြင့်ဆန် (ဆင်းသွယ်လတ်) တန်ချိန် ၅၀၀၀ ဂျပန်နိုင်ငံသို့ ရောက်ရှိခဲ့ပြီးနောက် မြန်မာဆန်သည် ရုပ်ပိုင်းဆိုင်ရာ အသွင်အပြင် ကောင်းမွန်ခြင်း၊ အရသာ ကောင်းမွန်ခြင်းနှင့် ဓာတုဗေဒ ဓာတ်ကြွင်း ကင်းစင်ခြင်းကြောင့် ပိုမိုတိုးမြှင့် ၀ယ်ယူသွားမည်ဖြစ်ကြောင်း သိရသည်။
''ပြည်ပဈေးကွက်ကို ဈေးကွက် ရှာဖွေတာတွေ တိုးချဲ့တင်ပို့နိုင်ဖို့ အတွက်က အလားအလာ ကောင်းလာပေမယ့် ပြည်တွင်းမှာ ဈေးကွက်ဝင် တန်းမြင့်ဆန်တွေ ထုတ်လုပ်နိုင်ဖို့က လိုအပ်နေပါသေးတယ်။ တန်းမြင့်ဆန်တွေ ကြိတ်ခွဲဖို့ လောလောဆယ်မှာ ပေါင်းဆန်စက် အလုံး ၂၀ က တချို့ စမ်းသပ်နေပြီ။ တချို့ကတော့ အခုမှ ပြည်ပက ရောက်ရုံပဲ ရှိနေသေးတယ်။ တောင်သူတွေဘက်က မျိုးကောင်းမျိုးသန့်တွေ ဈေးကွက်ဝင် ဆန်စပါး အမျိုးအစားတွေ ရွေးချယ်စိုက်ပျိုးနိုင်ဖို့ လိုအပ်နေပါသေးတယ်။ တောင်သူတွေ ဘက်ကလည်း ဘယ် စပါးမျိုးက ဈေးကွက်ဝင်တယ် ဆိုတာတွေ သိထားဖို့ လိုပါတယ်'' ဟုလည်း မြန်မာ့လယ်ယာစီးပွား အများပိုင် ကော်ပိုရေးရှင်း (MAPCO) မှ တာဝန်ရှိသူ တစ်ဦးက ပြောကြားခဲ့သည်။
၂၀၁၃-၂၀၁၄ ဘဏ္ဍာရေးနှစ်တွင် ပြည်ပသို့ ဆန်တန်ချိန် သုံးသန်းအထိ တင်ပို့သွားရန် စီစဉ်ထားကြောင်းလည်း စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန ပြည်ထောင်စုဝန်ကြီး ဦးဝင်းမြင့်က ပြောကြားခဲ့သည်။

From: EMG