မိခင်နှင့် စကားများသူကို သားကဓားဖြင့်ထိုး

ပို့စ်တင်ချိန် - 6/28/2013 12:09:00 PM

မန္တလေးတိုင်း ဒေသကြီး ပြည်ကြီး တံခွန်မြို့နယ် (ဇ)ရပ်ကွက်တွင် ဇွန်လ၂၅ ရက်နေ့ မွန်းလွဲ ၁နာရီ ၄၅ မိနစ်ခန့်က ၁၉ နှစ်အရွယ် လူငယ် တစ်ဦးသည် ၎င်း၏ မိခင်နှင့် စကားများ ထားသူကို မကျေနပ် သဖြင့် ထိုသူ၏ နေအိမ်ပေါ်တက်၍ တာယာ လှီးဓားဖြင့် နားထင်ကို ထိုးမှု တစ်ခု ဖြစ်ပွားခဲ့ကြောင်း မန္တလေးတိုင်း ဒေသကြီး ရဲတပ်ဖွဲ့မှူးရုံးနှင့် အဆိုပါ ဓားထိုးခံရသူ မိသားစု များထံမှ သိရှိရသည်။
ဓားဖြင့်ထိုးသူမှာ ကျော်စိုးနိုင်ဆိုသူ ဖြစ်ပြီး ပြင်ပသင်ဆရာမ အသက် ၃၂ အရွယ် ဒေါ်သန္တာဦးအား လက်ဝဲနားအထက်ကို အရိုးအသွား ၅ လက်မခန့် ရှိသောဓားဖြင့် ထိုးခဲ့ကြောင်း မန္တလေးတိုင်း ဒေသကြီး ရဲတပ်ဖွဲ့မှူးရုံးထံမှ သိရသည်။

“လွန်ခဲ့တဲ့ တစ်ပတ်လောက်တုန်းက ကျော်စိုးနိုင်ရဲ့အမေနဲ့ စကားများ ရန်ဖြစ်ထားတယ်၊ တစ်ယောက်တစ်ခွန်း စကားများကြတာ။ အဲဒီတုန်းကတော့ ဒီကောင်လေးမရှိဘူး။ မကျေနပ်လို့ လုပ်တာထင်တယ်။ ကလေးကလည်း နည်းနည်းဆိုးတယ်၊ မနက်ကတော့ ခွဲခန်းထဲမှာ ဆရာဝန်ကြီးက မစိုးရိမ်ရဘူး လို့တော့ ပြောတယ်” ဟု ဒေါ်သန္တာဦး၏ ခင်ပွန်းဖြစ်သူ ပြည်ကြီးတံခွန်မြို့နယ် အ.ထ.က (၂၇) စက်မှု (၁) အလယ်တန်းပြ ကျောင်းဆရာ ဦးသိန်းထွန်းက The Voice သို့ ပြောကြားသည်။
ဒေါ်သန္တာဦးသည် အရိုးအသွား ၅ လက်မခန့်ရှိ ဓားတန်းလန်းနှင့် ထိုးသွင်းဒဏ်ရာ တစ်ချက်၊ ဝဲလက်ဖျံတွင် ပြတ်ရှဒဏ်ရာတစ်ချက် ဒဏ်ရာရရှိ၍ မန္တလေး ပြည်သူ့ဆေးရုံကြီးရှိ ဦးနှောက်နှင့် အာရုံကြော ကုသဆောင်တွင် ဆေးကုသမှု ခံယူလျက် ရှိကြောင်း ဦးသိန်းထွန်းက ဆက်လက် ပြောကြားသည်။ ယင်းဖြစ်စဉ်နှင့် ပတ်သက်၍ ဦးသိန်းထွန်းက ပြည်ကြီးတံခွန် မြို့မရဲစခန်းတွင် ကျော်စိုးနိုင်ကို အမှုအမှတ် (ပ) ၂၅၆/၂၀၁၃ ပုဒ်မ ၄၅၂/၃၂၆အရ အမှုဖွင့်ထားကြောင်း မန္တလေးတိုင်းဒေသကြီး ရဲတပ်ဖွဲ့မှူးရုံး ထံမှ သိရသည်။
From:Voice